عه‌ليمير سه‌رچه‌وه‌ی خه‌بات كوردايه‌تی

شفق نيوز

ئمجا جی داخه‌ بڕيگ له‌و شار و ئاوايه‌يله‌ ك تا دويه‌كه‌ لانه‌ی خه‌بات كورده‌واری بوينه‌و مه‌ردمه‌گه‌يشی وه‌ دڵ و گيان وه‌رگری له‌ خاك كوردستان كرديان، دوينيد ئمڕوو پشتگووش خريانه‌و ده‌س ئاوه‌دانی و خزمه‌تگوزاری وه‌پيان نه‌ڕه‌سيه‌و له‌هويره‌و بريانه‌!

ناحيه‌ی قۆره‌توو سه‌ر وه‌ قه‌زای خانه‌قين ك له‌بان نه‌خشه‌ی كويه‌ن ئداری ٧٣ ئاوايی گرته‌سه‌ خوه‌ی، وه‌لی له‌بان ئداره‌ی گه‌رميان ٦١ ئاوايی، ك تائيسه‌ ٥١ ئاوايی له‌لی ئاوه‌دانه‌و بويه‌و باقی ئاوايه‌يلی هه‌ر وه‌و ويرانه‌و كه‌لاوه‌يی خوه‌يانه‌ مه‌ندنه‌و بوينه‌سه‌ شوون وماوای بايه‌قوشه‌يل.

ئه‌گه‌ر وه‌گشتی باس له‌ ناحيه‌گه‌ بكه‌يم، تويه‌نيم بويشيم قۆره‌توو ك وه‌ دويری نزيكه‌ی ٣٥ كم كه‌فته‌سه‌ باكوور شار خانه‌قين ژير زه‌ويه‌گه‌ی سه‌رچه‌وه‌ی ته‌ڵای سيه‌"نه‌فت"و بان زه‌ويه‌گه‌يشی خاكيگ پڕ پيت كشتوكاڵی وئاوياريه‌ ك وه‌ گووره‌ی ئامار ئداره‌ی گه‌رميان روی وه‌ره‌ گونجياگه‌گه‌ی ئه‌را كشتوكاڵی١٤٩٨٦٠دۆنمه‌و باقی روی وه‌ره‌گه‌يشی پيكهاتگه‌ له‌ دووڵ و ته‌په‌و جه‌وه‌ڵ و كوچگان ك يه‌يش نزيكه‌ی ٢٧٤٥٧٥ دۆنم زه‌ويه‌.

قۆره‌توو له‌ سه‌ره‌تای ساڵه‌يل هه‌يشتای وه‌رين وه‌تايبه‌ت له‌ وه‌خت ده‌سوه‌پيكردن جه‌نگ ناونی عراق – ئيران گشت مه‌رزه‌يلی له‌ڕوی ئيرانه‌و مينكاڵی كريا له‌لايه‌ن هيزه‌يل سه‌ربازی رژيم وه‌رين به‌عس، ك يه‌يش له‌يوا كرد فريه‌يگ له‌ مه‌ردم ئه‌و ناوچه‌ له‌وه‌ر مه‌ترسی مين له‌چاڵنرياگ روی له‌ شوونه‌يل ره‌سه‌ن خوه‌يان نه‌كه‌ن و هه‌ر وه‌و چووڵيه‌ بمينيد.

ئمجا يه‌كيگ له‌و ئاوايه‌يله‌ ك ئيسه‌ ته‌نيا كه‌لاوه‌ كويه‌نه‌گه‌ی مه‌ندگه، ئه‌ويش ئاوای"عه‌ليمير"ه‌، ك ئه‌را ماوه‌ی فيشتر له‌ ٢٠ ساڵه‌ حكوومه‌ت هه‌رێم كوردستان نه‌ك هه‌ر خزمه‌تيگ وه‌پی نه‌ڕه‌سانگه‌، به‌ڵكوو له‌ حاڵ مه‌ردمه‌گه‌يشی نه‌پرسيه‌ دويای ئه‌و هه‌مگه‌ ساڵ ماڵويرانيه‌ له‌ كوورا جيگير و سه‌قامگير بوينه‌!؟ به‌ڵی عه‌ليمير سه‌رچه‌وه‌ی خه‌بات كوردايه‌تی بوی و هه‌ميشه‌ چه‌وسياگ ده‌س خاپووركردن و زوڵم و سته‌م له‌ناكاو رژيم كاولكه‌ر بويه‌و چه‌نه‌ها جار مه‌ردمه‌گه‌ی ئاواره‌و ده‌روه‌ده‌ر بوينه‌ هه‌ر له‌سه‌رده‌م زه‌عيم سديق سه‌ركرده‌ی تيم په‌نج سه‌ربازی ك ده‌يه‌ها پياوه‌يل ناودار و سه‌رۆك هووز كورد ناوچه‌ی ده‌ورگرد خانه‌قين بيسه‌ر وشوون كرد و نازم گزار وه‌ڕيه‌وبه‌ر ئاسايش گشتی رژيم به‌عس بگر تا وه‌ختيگ ك باشوور كوردستان ئازاد كرياگه‌ له‌ كووتايی ساڵه‌يل سه‌ده‌ی وه‌رين.

مه‌ردم ره‌سه‌ن ئی ئاوايه‌ هه‌ميشه‌ وه‌ گيان كوردايه‌تيه‌و ته‌ماشای ئاينده‌ی كوردستان كردنه‌و رووڵه‌يڵ فريه‌يگيش وه‌و خاتر كرده‌سه‌ قوربانی و پێشمه‌رگه‌يل چه‌ونه‌ترس و ئازايگيش له‌تی هه‌ڵكه‌فتگه‌و له‌ خه‌بات چه‌كداری به‌ش شير كه‌فته‌سه‌ پييان و به‌شداری هه‌ردوگ شووڕش گه‌ورای ئه‌يلوول و گوڵانيش كردنه‌و نه‌خش باڵايگ داشتنه‌ له‌ جمشت رزگاريخواز كورد، هه‌ر وه‌و خاتريشه‌ ئوميده‌واريم له‌ حكوومه‌ت هه‌رێم كوردستان جوور ئه‌وه‌ك مه‌ردمه‌يل تر وه‌ ئاوايه‌يليان شاده‌و كرد، وه‌و جووريشه‌ ته‌ماشای مه‌ردم ئاوايی عه‌ليميريش بكاو ئه‌و وه‌رپرسه‌يليشه‌ ك رووژگاريگ له‌و ناوچه‌ ژيانه‌و چه‌ويان كه‌فته‌سه‌ كوردايه‌تی و مه‌ردايه‌تی خه‌ڵك ئه‌و ئاوايه‌ دريغی نه‌كه‌ن له‌ ره‌سانن په‌يام ئنسانيه‌ت و وه‌چه‌و ريز و حورمه‌ته‌و هه‌وڵ‌ ئاوه‌دانكردنه‌وه‌ی ئه‌و بيشكه‌ی كوردايه‌تيه‌ بيه‌ن ك وه‌خته‌يل فريه‌يگ له‌تی ميوان بوينه‌و له‌نزيكه‌و ئاشنايه‌تی وه‌ل مه‌ردمه‌گه‌يا په‌يا كردنه‌.

جه‌ماڵ ئه‌ركه‌وازی