وه‌ره‌و ره‌سینه‌وه‌ى تازه‌یگ له‌ په‌یام ره‌سانن

شفق نيوز

له‌په‌یوه‌ندى ره‌سانن یا ئعلام له‌ناونى ئاده‌میزاده‌یل، وه‌ل ئه‌وه‌یشا پیشكه‌فتن زانستى و ته‌كنۆلۆجى وه‌ پله‌ یه‌ك به‌شداره‌ له‌ دامه‌زرانن و گه‌شه‌كردن كوومه‌ڵگایه‌یل ئنسانى و ئیمه‌یش وه‌بى فامستن له‌و شیوازه‌یله‌ ك هووكاره‌یل په‌یوه‌ندى كاركه‌ن وه‌گووره‌ى، تواناى ره‌سینه‌وه‌ نه‌یریم له‌گوێریان كوومه‌ڵایه‌تى و رووشنهویرى ك هه‌میشه‌ باس كریه‌یگ  له‌باوه‌ت كوومه‌ڵگایه‌یل سه‌رده‌م. بیگومان هووكاره‌یل تازه‌یش دریژه‌ ده‌نه‌ كاركردن ئه‌ندامه‌یل لاشه‌ى ئاده‌میزاد، ئه‌را نموونه‌: مۆبایل دریژه‌ده‌ر كاركردن گووشه‌یلمانه‌و مایكرفۆنیش دریژه‌ده‌ر كاره‌یل زوانه‌یلمانه‌و ته‌له‌فزیۆنیش دریژه‌ده‌ر چه‌وه‌یلمانه‌، كۆمپیته‌ریش هه‌وڵ هویركردن ده‌یگه‌ پیمان و دریژه‌ده‌ر هوشیاریه‌.

مكلوهان له‌ كتاوه‌ ناوداره‌گه‌ى(چوین بڕه‌سیمنه‌وه‌ له‌ هووكاره‌یل په‌یوه‌ندى) ك له‌ناوڕاس ساڵه‌یل شه‌س سه‌ده‌ى گوزه‌یشت ده‌رچیه‌ ئویشیگ (گرینگى په‌یام له‌ كاره‌یل په‌یوه‌ندى ره‌سانن یا ئعلامى له‌ هووكاره‌یل جیوازكردنى نیازه‌یلى دیاره‌) یه‌یش وه‌و مه‌عنا ك سروشت گشت هووكار یا وه‌سیله‌یگ  نه‌ك ناوه‌ڕوكه‌گه‌ى بنه‌مایگه‌ له‌ دامه‌زرانن كوومه‌ڵگایه‌یل تازه‌. هه‌ر له‌وه‌ر ئه‌وه‌یش په‌یام بنه‌ڕه‌تى له‌ ته‌له‌فزیۆن په‌خش ته‌له‌فزیۆنیه‌ جویر ئه‌وه‌ك چوین په‌یام بنه‌ڕه‌تى له‌ كتاو ئه‌وه‌سه‌ ك چاپ له‌لى كریاگه‌، له‌وه‌ر ئه‌وه‌یش دوینیم ك ناوه‌ڕوك وه‌ گووره‌ى هویر وڕا گرینگ  یا موهم نیه‌، به‌ڵكوو گرینگ  ئه‌و هووكاره‌سه‌ ك چشته‌یل ناوى جیواز ئه‌كا، وه‌ل ئه‌وه‌یشا هه‌ر هووكار یا وه‌سیله‌یگیش مه‌ردم یا جمهوور خوه‌ى دیریگ  و خوه‌شه‌ویسى ئه‌ڕاى دیرن. ئمجا ته‌له‌فزیۆنیش جویر هووكاریگ  گرینگى مه‌ردم فره‌یگ  له‌ دوینه‌ره‌یل ئه‌ڕا خوه‌ى كیشیگ وه‌ بوونه‌ى ئه‌و شاشه‌وه‌ ك له‌یه‌ك وه‌خت ده‌نگ  و ڕه‌نگ  و جموجویل نیشانده‌یگ . وه‌ل ئه‌وه‌یشا هووكار په‌یوه‌ندى ره‌سانن كاریگه‌رى دیریگ  له‌و ناوه‌ڕوكه‌ یا باسكردنه‌ ك جیوازى ئه‌كاو له‌هه‌مان وه‌خت تویه‌نیگیش باوه‌ته‌گه‌ وه‌چه‌واشه‌وه‌ جیواز بكا ئه‌را مه‌ردم جویر ئه‌وه‌ك بڕیگ  له‌ كه‌ناڵه‌یل ئاسمانى ڕه‌سمى ئه‌نجامى ده‌ن له‌ ده‌وڵه‌ته‌یل دویاكه‌فتگ. راسه‌ ك ته‌له‌فزیۆن گرینگى یا ئه‌همیه‌ت فره‌یگ  دیریگ ، وه‌لى ئمڕوو كومپانیایه‌یل گه‌ورا له‌مه‌یدان كاروبار په‌یوه‌ندى گه‌ردنه‌ شوون ئه‌وه‌ك خزمه‌تگوزارى ره‌سانن تیكه‌ڵ بكه‌ن و له‌هه‌مان وه‌خت تووڕ ئه‌نته‌رنێتیه‌كیگه‌ له‌ خاسترین كاره‌یل ته‌كنۆلۆجى له‌ى سه‌رده‌م ئیسه‌ له‌مه‌یدان په‌یوه‌ندى و ره‌سانن ك به‌عزه‌ كه‌سه‌یلیگ وه‌ هووكار هووكاره‌یل(وسیله‌ الوسائل) په‌یوه‌ندى تاریفى كه‌ن.

بیگومان ئه‌و كوومه‌ڵگایه‌یل دویاكه‌فتگه‌ ك به‌شدارى نیه‌كه‌ن له‌ پیشكه‌فتن زانستى ته‌كنۆلۆجى له‌ى سه‌رده‌م ئیسه‌ نیه‌توان گه‌شه‌ بیه‌نه‌ ژیان و ڕوى له‌ پیشكه‌فتن بكه‌ن و هه‌میشه‌ ئه‌و كوومه‌ڵگایه‌یله‌ وه‌ جووریگ  تر ڕه‌سنه‌وه‌ له‌ پیشكه‌فتن زانستى ته‌كنۆلۆجى، یه‌یش مه‌عناى ئه‌وه‌سه‌ خوه‌یان دویره‌و خه‌ن له‌ تازه‌گه‌رى و په‌یوه‌ندى.