كورده‌يل فه‌يلى له‌ناونى كينه‌ت خوه‌رئاواو به‌زه‌يى خوه‌رهه‌ڵات

عه‌لى  حسێن فه‌يلى

شه‌فه‌ق نيوز/ غوربه‌ت و ئاواره‌كردن ديد و نوڕستنمان فراوان كرد له‌ڕوى مه‌ردمان تر و دويرمانه‌و خست له‌وه‌گ ره‌گه‌ز جوور پێوه‌ريگ ئه‌را پايه‌ى نه‌ته‌وه‌و ئه‌را وه‌كارهاوردن ره‌نگ بدێده‌ مه‌راميگ ئه‌را چويچيان، به‌ڵكوو له‌لى ياى گرتيم ك وه‌ ئاستيگ ئنسانيه‌و موخاتبه‌ى شه‌كه‌تى بكه‌يم و ئه‌را ماوه‌ى ساڵه‌يليگه‌ تونڕه‌وى له‌ناو فه‌يليه‌يل هوويچ ئه‌سه‌ريگى نه‌مه‌ندگه‌و ئحساس ئنسانى شوونى گرتگه‌ و له‌ خاك دڵته‌نگى تويه‌م ئه‌زره‌ت خستنه‌.

 

له‌ى باوه‌ته‌و، ئه‌ياده‌ هويرم ك له‌ناوڕاس ساڵه‌يل هه‌يشتاى سه‌رده‌ى وه‌رين سه‌ردان كه‌مپ "جه‌هرم" كردم ئه‌را ديده‌ن قه‌وم و خيشه‌يلم له‌ باشوور ئيران و يه‌كيگ له‌ليان وت: دوياى ساڵه‌يليگ له‌ناو ئى كه‌مپه‌ ئه‌زره‌ت ئه‌وه‌ ديرم ئجازه‌ى سايه‌قى وه‌ربگرم، وه‌لێ ياسا ڕى وه‌پيمان نايه‌ێد له‌وه‌ر ئه‌وه‌گ په‌نابه‌ريم. ئه‌و قسه‌كه‌ره‌ يه‌كيگ بوى له‌ كووچ وه‌پيكرياگه‌يل زووره‌ملى له‌ عراق ك حكومه‌ت به‌عس گشت به‌ڵگه‌يلى له‌لى سه‌ندوێده‌و، ئمجا دوياى نزيكه‌ى 25 ساڵ رووڵه‌يل ئه‌و قسه‌كه‌ره‌ ديم له‌ يه‌كيگ له‌ وڵاته‌يل خوه‌رئاواو خاوه‌ن باوه‌ڕنامه‌يل به‌رزيگ بوين و خاسترين پۆسته‌يليگ داشتن له‌ بواره‌يليان، وه‌لێ وه‌ل ئه‌وه‌يشا دڵته‌نگ بوين وه‌ مردن باوگيان ك ره‌گه‌زنامه‌ و ئجازه‌ى سايه‌قى وه‌رنه‌گرتگه‌ له‌ وڵاته‌يل خوه‌رهه‌ڵات.

 

وه‌ختى كووچ كريايم غوربه‌ت و دڵته‌نگى وه‌پيمان دريا، له‌وه‌رانوه‌ر ئه‌وه‌يش ئوميد وه‌ گله‌وخواردنمان وه‌پيان دايم و گشت توانايگ كرده‌وه‌يى و زانستيمان خستيمنه‌ خزمه‌تيان، ئمجا ئاده‌ميزاد فه‌يلى سه‌رد نيه‌ و ناخوازێد پشت وه‌ هه‌ر كومه‌ڵگايگ بووه‌سێد ك له‌تى وجوود ديرێد و هويچ رووژيگ له‌ رووژانيش هاوپه‌يمانى وه‌ل دوشمنه‌يل ئى و وڵات و ملله‌ته‌ نه‌كردگه‌، وه‌لێ وه‌ ته‌ماى سوپاسگوزارى و موكافئه‌يش نيه‌ دوياى مردنى.

 

ئمڕوو باوه‌ڕمان ئه‌وه‌سه‌ ك ملله‌ته‌يل جه‌هان چه‌ن خاڵه‌يليگ گرديانه‌و ئه‌كا، وه‌لێ هه‌وه‌جه‌يليان جياجياس، له‌وانه‌يش هه‌وڵداين ئه‌را پيشكه‌فتن و گه‌شه‌كردن، ئمجا پشت وه‌ ئه‌وه‌يش ئاده‌ميزاد ئه‌تويه‌نێد حاڵه‌تيگ له‌ سه‌قامگيرى بژيوى ژيان دروس بكا. ئى په‌يوه‌ندييشه‌ له‌ناونى ملله‌ته‌يل و مه‌ردميش موڵه‌تيگ ئه‌را نزيكه‌وبوين ئه‌ياد وه‌ل ئامێته‌يگ په‌يوه‌سبوين له‌ سووزدارى.

 

تاك فه‌يلى خوازياره‌ وژادنه‌يل خه‌فتگ هه‌ڵسنێد، وه‌لێ خاسيش ئه‌زانيد ك تواناى وه‌ئاگاهاوردن ئه‌وانه‌ نه‌يرێد ك وه‌غفڵه‌ت ته‌زاهوره‌ له‌بانى ئه‌كه‌ن، ئيمه‌ روێداگه‌يل پڕ ژانيگ هاته‌ تويشمان و خوسه‌و كينه‌ته‌يل سياسى زوڵممان كرد، يه‌يش بيجگه‌ نه‌فامى و تونڕه‌وى ره‌گه‌زى و سه‌ختيه‌يل سه‌قامگيرى و ژيان غوربه‌ت، ك بايه‌س بوى سه‌به‌بكاره‌يل وه‌ى هه‌مگه‌ كرده‌وه‌يله‌ بوياتانه‌ عبره‌ت و بخريانه‌ خانه‌ى خيانه‌ت گه‌ورا ئه‌را وڵات، ك ئايا ئى كاره‌ جيوه‌جى بويه‌؟

 

باوه‌ڕ ملله‌ته‌يل پيكهاتگه‌ له‌ يه‌كسانى و دادگه‌رى له‌ناونى گشت تاكه‌يلى، ئمجا ئايا ئه‌و هاوكيشه‌ له‌بان پيكهاته‌يل عراق جيوه‌جى ئه‌دێ و ئايا گشتيان يه‌كسانن؟ يه‌يش له‌وه‌ختيگ كه‌سيگ ئاواره‌ كريه‌ێد و وه‌ئاواره‌يى ئه‌يه‌رێده‌وه‌ى؟

عه‌لى حسێن فه‌يلى