ژن له‌ كومه‌ڵگاى نه‌فامى

شفق نيوز

 

ئبن عه‌باس ئویشید: ئه‌گه‌ر پیاویگ باوگ یا قه‌ومیگ نزیكى بمردیاد، خوه‌ى بویاده‌ سه‌رپه‌رش ژنه‌گه‌یان، ئمجا یا له‌لاى خوه‌ى هیشتیاده‌ى و دویاى مردن ژنه‌گه‌ ماڵ و دارایه‌گه‌ى خواردیاد یا ماره‌یه‌گه‌ى سه‌نیاده‌وه‌و ئازادى كردیاد. عه‌تا كوڕ "ئه‌بى ره‌باح"یش ئویشید: له‌ سه‌رده‌م نه‌فامێتى ئه‌گه‌ر پیاویگ بمردیادو ژن و مناڵ له‌شوونى بمه‌ندیاده‌ جى، ئه‌وه‌ قه‌وم وخیش مردگه‌گه‌ ژنه‌گه‌ له‌لاى خوه‌یان هیشتیان تا مناڵه‌یلى ئمایه‌ت بكردیاد.

له‌ سه‌رده‌م نه‌فامێتى پیاو له‌ هویچ هه‌قیگ خوه‌ى بیبه‌ش نه‌كریا، وه‌لى ژن له‌یوا نه‌وى، هه‌میشه‌ هه‌قى ژیرپا خریاو ماره‌یه‌گه‌ى خوریاو ناهه‌قى وه‌رانوه‌رى ئه‌نجام دریاو ته‌نیا له‌وه‌ر ئازارداین ماوه‌ى فریه‌یگ له‌ماڵ باوگ زه‌فت كریا جوور ئه‌وه‌گ بویشید"نه‌ ژن شویداره‌ و نه‌یش ته‌ڵاقدریاگ".

وه‌ل ئه‌وه‌یشا له‌ كومه‌ڵگاى نه‌فامى پیاو حه‌ز له‌وه‌ نه‌كردیان دویه‌ت ئه‌رایان په‌یا بوود و خوه‌یان وه‌ شه‌رمه‌زار زانستیان و ته‌نانه‌ت زینگ وه‌چاڵیشى كردیان و ئى كرده‌وه‌یشه‌ له‌ناو هووز و تیره‌یل عه‌ره‌ب نه‌ریت وه‌رفراوانیگ بوى، ئمجا تا ئسلام په‌یا نه‌وید ئى نه‌ریته‌ هه‌ر مه‌ندوید.

عه‌ره‌به‌یل له‌وه‌ر چه‌نه‌ها هووكار جوراوجوور دویه‌ته‌یلیان زینگ وه‌چاڵ كردیان، پیاو له‌یوا بوى شه‌رم كردیادو له‌وه‌ ترسیا رووژیگ ئاوڕوى بچوود! پیاویش بوى ئه‌گه‌ر دویه‌ته‌گه‌ى سیه‌ یا سه‌قه‌ت و گیل و گه‌وج بویاتاد خستیاده‌ى ژیر خوڵ، وه‌ل ئه‌وه‌یشا بڕیگ له‌ نه‌داره‌یل هووز عه‌ره‌ب له‌وه‌ر نه‌دارى و كه‌مدرامه‌تى مناڵه‌یلیان كوشتیان، فریه‌جاریش عه‌ره‌به‌یل سه‌رمایه‌دار و ده‌وڵه‌مه‌ن وه‌ پویل له‌لیان سه‌ندیانه‌ى.

وه‌ هه‌ر حاڵ ژنه‌یل جوور كه‌نیز ته‌ماشا كریان، پیاگیش بوى ژنه‌گه‌ى له‌بان قومار له‌ده‌س دیاد، وه‌ل ئه‌وه‌یشا به‌عزه‌ جاریگ ژن چه‌ن هاوسه‌ریگ داشت، ژن ئه‌گه‌ر شویه‌گه‌ى بمردیاد چمانى زینگ وه‌چاڵه‌، چوینكه‌ نه‌تویه‌نستیاد دوباره‌ شوى بكا، له‌وه‌ر ئه‌وه‌گ مه‌ردم تانه‌ له‌لى دیان و سووكایه‌تى وه‌پى كردیان، هه‌ر وه‌و خاتریشه‌ بایه‌سه‌ تا مردن له‌ ماڵ شویه‌گه‌ى بویاتادو خزمه‌ت كه‌س وكاره‌گه‌ى بكردیاد.

شه‌ره‌فخان ته‌ڵعه‌ت

ج . أ