مێژوو دیمۆكراسى

شفق نيوز

 

ئه‌و كه‌سیشه‌ ك له‌وڵاته‌گه‌ى ئه‌فلاتۆن ره‌سویده‌ پله‌ى شاى فه‌یله‌سووفه‌یل، بایه‌سه‌ وه‌بى وه‌رگرتن پویل چل ساڵ له‌شوون زانست و شاره‌زایى گه‌ردوید. شازاده‌یل فه‌یله‌سووف هه‌ق ئه‌وه‌ نه‌یاشتنه‌ ك ماڵ و سامان بنه‌نه‌ یه‌كه‌و، ته‌نانه‌ت جنگه‌یلیانیش بایه‌سه‌ له‌ جنگ مه‌ردم ساده‌تر بویاتاد. ئه‌نجوومه‌نیگ ك له‌ى شازایه‌یل فه‌یله‌سووفه‌ پیكهاتوید تواناى بڕیارداین داشتگه‌ له‌بان گشت كاروبار كوومه‌ڵگا.

له‌وڵاته‌ ئایدیالیه‌گه‌ى ئه‌فلاتۆن له‌یوا باس كریاگه‌ ك مناڵ له‌ناو دام و ده‌زگایه‌یل ئمایه‌ت بكریه‌ن و ژهاوردن و دروسكردن خیزان هویچ كیشه‌یگ نه‌یاشتگه‌، به‌ڵكوو گرینگ ئه‌وه‌ بویه‌ ئه‌وان له‌ خیزانیگ گه‌ورا بژیه‌ن و خوه‌یان وه‌ براو خوه‌یشگ یه‌كترى بزانن. بڕیگ له‌ توێژه‌ره‌یل ئه‌وه‌ ده‌رخه‌ن ك ئه‌فلاتۆن هه‌ق دیمۆكراسى وه‌گشت كه‌سیگ داگه‌و هویچ جیاوازییگ نه‌كردگه‌ له‌ناونى ژن و ئاده‌میزاد ژیرده‌سه‌و ئازاد.

له‌و سه‌رده‌م شاره‌یل یۆنان سه‌وه‌رخوه‌یان بوین و ده‌سڵات وه‌ڕیه‌وبردن و ئداره‌ له‌ده‌س ئه‌نجوومه‌ن هه‌ڵوژارده‌ى شاره‌گه‌ بویه‌، ئنجا بویچگترین شار سه‌روه‌خوه‌ییش شماره‌ى مه‌ردمه‌گه‌ى نزیكه‌ى په‌نجا هه‌زار كه‌س بویه‌.

ژن و مناڵ و كه‌سه‌یل ژیرده‌سه‌ هه‌ق ده‌نگداین نه‌یاشتنه‌، ته‌نیا ئه‌و پیاوه‌یله‌ ك ئازاد بوینه‌و عومریان له‌ 21ساڵ كه‌متر نه‌ویه‌ هه‌ق ده‌نگداین داشتنه‌و تویه‌نستنه‌ به‌شدارى هه‌ڵوژاردنه‌یل بكه‌ن. جووره‌یل هه‌ڵوژاردنیش وه‌شیوه‌یگ دیمۆكراسى و راسه‌وخۆ ئه‌نجام دریاگه‌و ئه‌وانه‌ك هه‌ق ده‌نگداین داشتنه‌ له‌شوونیگ گرده‌و بویان و ئه‌نجوومه‌ن شار هه‌ڵوژانیان یا بڕیار كاروبار وه‌ڕیه‌وبردن دانه‌و 10 جه‌نراڵ و میر و سه‌ركرده‌ راسه‌وخۆ له‌ناو مه‌ردمه‌گه‌ هه‌ڵوژانیان.

ئمجا ئه‌و كه‌سیشه‌ ك هه‌ڵوژریاگه‌ وه‌ ئه‌ندام ئه‌نجوومه‌ن شار، عومرى له‌ 30ساڵ كه‌متر نه‌ویه‌. سه‌رۆك ئه‌نجوومه‌نیش ته‌نیا یه‌ك رووژ هه‌ق ئه‌وه‌ داشتگه‌ سه‌رۆكایه‌تى ئه‌نجوومه‌نه‌گه‌ بكا، دى له‌شوون ئه‌و رووژه‌ ئه‌ندامیگ تر هاته‌سه‌ شوونى.

وه‌ل ئه‌وه‌یشا له‌و سه‌رده‌مه‌ كوومه‌ڵ و گرووپ سیاسى هه‌میشه‌ له‌ ده‌ور گرد ئه‌نجوومه‌ن گرده‌و بوینه‌و له‌ وه‌ختیگیش ك جڵه‌و ده‌سڵات له‌ده‌س دیموكراسیه‌یل بویه‌ بار ریكخستن و گه‌شه‌كردن وه‌ جووریگ تر بویه‌، چوینكه‌ وه‌لاى ئه‌وانه‌و ئازادى و یه‌كسانى فره‌ گرنگ بویه‌، ئمجا ئى جووره‌ ئه‌نجوومه‌نه‌یله‌ ك ئاماژه‌ وه‌پیان كردیم وه‌گشتى ئه‌را گشت مه‌ردم خاس بوینه‌.

حه‌مه‌ دۆستان

ج . أ