وه‌ختى مه‌هانه‌ له‌ تاوانه‌گه‌ خه‌راوتربوود(روفات فه‌یلیه‌یل وه‌ك نموونه‌یگ)

شفق نيوز

سه‌رنه‌كه‌فتنه‌ له‌ ئه‌دا و كار هه‌ردوگ ده‌سڵات ته‌شریعى و جیوه‌جیكردن جوور ئه‌وه‌گ له‌ مه‌یدانه‌یل كاره‌با و سووته‌مه‌نى ڕوى دایه‌ و بویه‌سه‌ نوكته‌ى ده‌م عیراقیه‌یل، ئى حاڵه‌ته‌ له‌ گشت داموده‌زگایه‌یل ده‌وڵه‌ت وه‌چه‌و دوینریه‌ید هه‌رچه‌نى ك پویل فره‌یگ له‌ بودجه‌ى ده‌وڵه‌ت ئه‌راى ته‌رخانكریایه‌.

ئه‌ڵاجه‌ویترین مه‌هانه‌ ئه‌وه‌سه‌ ك وه‌زاره‌ت ماف ئاده‌میزاد هاوردیه‌سه‌ى له‌ باوه‌ت قه‌ورسانه‌یل وه‌جه‌م، چوینكه‌ ئى وه‌زاره‌ته‌ وتیه‌ ك توانایه‌یل وه‌زاره‌ت دارایى ده‌سمیه‌ت نیه‌ید ئه‌را وه‌رده‌وامبوین له‌ ئاشكراكردن قه‌ورسانه‌یل وه‌جه‌م وه‌ختى باس له‌ قه‌ورسانه‌یل وه‌جه‌م ناوچه‌ى جه‌وه‌ڵ حمرین كرد ك زیاتر له‌ 200 قه‌ورسان وه‌جه‌م هاتى و هه‌ر قه‌ورسانیگى زیاتر له‌ 100 روفات هاتى.

ئه‌گه‌ر ئه‌یه‌ یه‌كیگه‌ له‌ ئه‌ركه‌یل و وه‌زیفه‌ته‌یل ئى وه‌زاره‌ته‌، ئه‌ى دى ئه‌را پویل وه‌گووره‌ى ئى ئه‌ركه‌ ئه‌راى ته‌رخان نه‌كریاس؟ ئایا ئى ئه‌ركه‌یله‌ ته‌نیا شه‌كلیین ؟ ئایا مه‌عقووله‌ ك بودجه‌گه‌ى ئى وه‌زاره‌ته‌ ئه‌وه‌نه‌ كه‌مه‌ ك به‌ش دوینستنه‌وه‌ و ئاشكراكردن قه‌وراسانه‌یل وه‌جه‌م نیه‌كه‌ید؟ له‌گشتى ئه‌ڵاجه‌وى تر ئه‌وه‌سه‌ ك ئى وه‌زاره‌ته‌ بویشى ك وه‌زاره‌ت كاروبار شه‌هیده‌یل و ئه‌نفالكریایه‌یل هه‌رێم كوردستان تویه‌نست فره‌ له‌ قه‌ورسانه‌یل وه‌جه‌م باشوور عیراق ئاشكرا بكه‌ید و روفات شماره‌ى گه‌ورایگ شه‌هیده‌یل برد ئه‌را كوردستان، ئایا بودجه‌ى وه‌زاره‌ت كاروبار شه‌هیده‌یل و ئه‌نفالكریایه‌یل كوردستان له‌ بودجه‌ى وه‌زاره‌ت ماف ئاده‌میزاد عیراق گه‌وراتره‌؟ و ئایا ئى كێشه‌ ئه‌را نه‌وه‌یا هاتى هیلنه‌و ، له‌ وه‌ختیگ ك هیمان كه‌سوكاره‌یلیان ك هیمان له‌ژیان مه‌ننه‌ چه‌و بڕینه‌سه‌ ڕووڵه‌یلیان به‌شكه‌م چه‌ن قه‌تره‌یگ عه‌سر بتكننه‌ بان قه‌وره‌یلیان.

ئه‌یه‌ گشتى له‌ى وه‌خته‌ ڕوى ده‌ید ك سه‌رۆك كۆمار داوا له‌ وڵاته‌یل ئۆروپى كه‌ید ده‌س كوومه‌ك دریژه‌و بكه‌ن ئه‌را چاره‌سه‌ركردن كێشه‌یل كورده‌یل فه‌یلى.

گشت لایگ زانن ك كێشه‌یل كورده‌یل فه‌یلى و ئه‌وه‌گ په‌یوه‌ندى وه‌ روفات ڕووڵه‌یلیانه‌و دیرى یه‌كیگه‌ له‌ كێشه‌یل سه‌ره‌كى له‌ عیراق بیجگه‌ كێشه‌یل قه‌ره‌بووكردن و ڕه‌گه‌زنامه‌ ، له‌ى وه‌خته‌ بایه‌ته‌ بخه‌یمنه‌ هویر كاروه‌ده‌سه‌یل ك چه‌نى گرنگه‌ بایه‌خ بیه‌نه‌ ئى چینه‌ چوینكه‌ قوربانى تاوانه‌یل نائنسانى ڕژیم دیكتاتۆرى وه‌رین بوین و ساڵه‌یل دویر و دریژ ده‌روه‌ده‌رى له‌ جه‌هان غه‌ریبى ك گشت ترویسكه‌ى ئومیدیگ له‌ ژیانیان كووره‌وكرد و ئه‌و چه‌ن سه‌عات و چه‌ن ڕووژه‌ ك ئه‌را باوگ و دایگ جایڵه‌یل بى شوون ونوین كریایه‌یل مه‌نیه‌سه‌وه‌ خه‌ریكه‌ وه‌ره‌و ته‌واوبوین چوود.

جاریگتر ئویشیمن ك فره‌ له‌ پارته‌یل و ڕه‌وته‌یل سیاسى خاوه‌ن ده‌سڵات له‌ ده‌وڵه‌ت تویه‌نستن روفات شه‌هیده‌یل خوه‌یان بویننه‌وه‌ ته‌نیا شه‌هیده‌یل كورده‌یل فه‌یلى نه‌ود ك قه‌ورسانه‌یل وه‌جه‌میان هیمان نادیاره‌ هه‌رچه‌نى ك كێشه‌یلیان كریاسه‌ بازرگانى خاسیگ له‌ ئه‌جنداى گشت ڕه‌وت و فراكسیۆنه‌یل سیاسى.

 

 

فه‌ره‌یدون كه‌ریم مه‌له‌ك