تاریخ خوه‌د نه‌زانید ئاینده‌ نه‌یرید!!

شفق نيوز

و رویداگ خوه‌ى دیریگ، وه‌لى جیاوازى فره‌یگ هه‌س له‌ڕوى مقه‌یه‌تیكردن له‌ناونى تاریخ ملله‌تیگ ئه‌را ملله‌تیگ تر.

له‌گشت نه‌ته‌وه‌و ملله‌تیگ یگ ئه‌و گرنگى یا ئه‌همیه‌ت ته‌واوه‌ ك دریه‌یگه‌ تاریخ جویر یه‌ك نیه‌كریه‌یگه‌ دى، چوینكه‌ فره‌یگ له‌ ملله‌ته‌یل له‌وه‌ر كار داگیركارى و تاویانه‌وه‌ له‌ناو ملله‌ته‌یل تر ئومید له‌ خوه‌یان بڕینه‌و نیه‌گه‌ردنه‌ شوون ره‌سه‌نایه‌تى و هه‌ڵدانه‌وه‌ى لاپه‌ڕه‌ى گوزه‌یشت، شایه‌ت ئى كاریشه‌ هووكار تایبه‌ت داشتوود، وه‌لى ئه‌و ملله‌ته‌یله‌ ك ژیرده‌سه‌و چه‌وسیاگ بوینه‌و هه‌میشه‌ چه‌وه‌ڕى خوه‌ر ئازادى كردنه‌، ئه‌وانه‌ بیگومان له‌تاریخ دانیه‌وڕیه‌ن و رویداگه‌یل ڕووژگار له‌وه‌رچه‌و گرن تا چاره‌نویس ره‌سنیگه‌یانه‌ مه‌نزڵ سه‌رفرازى و ئازادى جویر ملله‌ت سته‌مدیده‌ى كورد ك وه‌په‌رووشه‌وه‌ گه‌ردیگه‌ شوون تاریخ و كلتوور و فه‌رهه‌نگ ره‌سه‌نایه‌تى خوه‌ى.

گرنگى رووژگار و سه‌رده‌مه‌یل گوزه‌یشت له‌لاى گشت ملله‌ت و نه‌ته‌وه‌یگ  یه‌كیگ نیه‌، چوینكه‌ ملله‌ته‌یل فره‌یگ بیده‌نگ و ڕازیین وه‌ نه‌زانستن گوزه‌یشته‌ى خوه‌یان له‌وه‌ر هووكاره‌یلیگ ك سه‌ره‌تا ئشاره‌ت وه‌پى كردیم و شایه‌ت له‌ناچارى و ناڕووشنهویریه‌وه‌ سه‌رچه‌وه‌ گرتوید، وه‌لى ملله‌ته‌یلیگیش هه‌ن پابه‌ندن وه‌ریزگرتن له‌گوزه‌یشته‌ى خوه‌یان و هه‌میشه‌ په‌ى وه‌پى به‌ن و جویر شوناسنامه‌ى ره‌سه‌نایه‌تى خوه‌ننه‌وه‌ى.

نموونه‌ى ئى ملله‌ته‌یله‌ له‌ڕوى پله‌وپایه‌و له‌ڕوى وه‌رپرسیاریه‌تى و رووشنهویریه‌وه‌ جویر یه‌ك نین، یه‌یش له‌وه‌ختى له‌ناونیان چه‌ن نه‌ته‌وه‌یگ خاوه‌ن رووشنهویرى به‌رز هه‌ڵكه‌فتنه‌و گه‌ردنه‌ شوون تاریخ و شوناسنامه‌ى راسكانى خوه‌یان.

نه‌ته‌وه‌یلیگیش هه‌ن جفتن وه‌ل بنه‌ڕه‌ت فكره‌ى ده‌وڵه‌تاو له‌بان بنه‌ماى خود وه‌دیكردن یا چه‌سپانن تاریخ و گرده‌وكردن كلتوور ره‌سه‌نایه‌تى كار نه‌كردنه‌و ئه‌ڕاى چوینیان جیاوازه‌ وه‌ل ئه‌ڕاى چوین نه‌ته‌وه‌یل تر له‌ڕوى تاریخ گوزه‌یشته‌و ڕیخوه‌شكردن ئه‌را ده‌سكه‌فتن و مقه‌یه‌تیكردن تاریخه‌یلیان، یا دوینید نه‌ته‌وه‌ى له‌یوایشه‌ هه‌س له‌بان بنه‌ڕه‌ت هویروڕاى ده‌وڵه‌ت و ده‌سڵات نیه‌چنه‌ ڕییه‌وه‌، ئه‌را نموونه‌: ملله‌ت هندستان ك له‌بان ئه‌و بنه‌ما كار نه‌كردنه‌و له‌بان بنه‌ماى تاریخ و داب ونه‌ریت ره‌فتار كردنه‌و هه‌میشه‌ له‌ڕوى فكره‌وه‌ ده‌وڵه‌ت وه‌فه‌رمانڕه‌وایگ داگیركه‌ر زانستنه‌، چوینكه‌ له‌بنه‌ڕه‌ته‌وه‌ هویرو ڕایان له‌بان بنه‌ماى ژیان روحاحنیه‌ت ده‌س وه‌پیكردگه‌و نیه‌توان ئه‌و تاریخه‌ له‌ناو بچوود و بكه‌فیگه‌ وه‌ر شه‌پۆل یا مه‌وج ئاڵشتكارى سیاسه‌ت. نه‌ته‌وه‌ى له‌یوایش هه‌س تاریخ له‌لاى چیه‌سه‌ قاڵب داب ونه‌ریت و نیه‌توان ده‌سوه‌ردارى بوون، چوینكه‌ له‌یوا زانن وه‌ل نه‌مه‌ندن ئه‌و داب ونه‌ریته‌ گشت چشتیگ له‌ده‌س چوودو نیه‌مینیگ !! وه‌ل ئه‌وه‌یشا ئویشن: هه‌ر ملله‌تیگ تاریخ خوه‌ى نه‌زانیگ ئاینده‌یش نه‌یریگ.