كورده‌يل فه‌يلى له‌ رووژ"زه‌رده‌خه‌نه‌"يش بيبه‌شن‌!!

شفق نيوز

ئمجا وه‌خاتر جيگيركردن زه‌رده‌خه‌نه‌ له‌بان ليو مه‌ردم كومه‌ڵگايش، ئه‌وه‌سه‌ ساڵانه‌ ئى ياده‌ ئه‌نجام ئه‌دريه‌ێد وه‌ناو "رووژ زه‌رده‌خه‌نه‌"و ئه‌را ئى مه‌راميشه‌ ساڵانه‌ يه‌كه‌مين جومعه‌ له‌ مانگ ئوكتۆبه‌ر تايبه‌ت كرياگه‌ ئه‌را زه‌رده‌خه‌نه و بويه‌سه‌ رووژيگ زه‌رده‌خه‌نه‌ى جه‌هانى.

وه‌لى ئه‌گه‌ر باس له‌ مه‌ردم پيكهاته‌يل جياجياى عراق بكه‌يم وه‌گشتى دوينيم ئه‌و بار گونجياگه‌ له‌لايان په‌يا نادێ ئه‌را په‌يڕه‌وكردن و به‌شدارى له‌ رووژ زه‌رده‌خه‌نه‌، ئه‌ويش له‌وه‌ر بار ناسه‌قامگير و ئه‌و كوشت و كوشتار و ته‌قينه‌وه‌و رفانن و سه‌ربڕين و رويداگه‌يل دڵته‌زنه‌ ك بووتگ ‌مه‌ردم رووڵه‌يل ئى وڵاته‌ بڕيه‌سه‌وه‌و كووچكردن كرده‌سه‌ نسيو جايه‌ڵ جوانه‌يل و بان گرتنه‌سه‌ وه‌ر ئه‌را وڵاته‌يل ئۆرپى وه‌خاتر دويرگرتن له‌ كيشه‌و ئه‌نگه‌مه‌ى ته‌قه‌و تووقه‌ى وه‌رده‌وام و كيشمه‌كيش دانه‌وڕياگ ناونى حزب و لايه‌نه‌يل له‌لايگ و، مه‌ترسى ريكخرياگ ترۆريستى داعش ئه‌را بان رويوه‌ر فراوانيگ له‌ وڵاته‌گه‌ له‌لايگ تره‌و.

ئه‌گه‌ريش باس له‌ پيكهاته‌ى كورد فه‌يلى بكه‌يم وه‌تايبه‌ت، ئه‌وه‌ بيگومان جوور ئه‌وه‌گ ئاشكراس له‌گشت پيكهاته‌يل تر ئى وڵاته‌ تويش زه‌رد و نائومێدى و بى ئه‌زره‌تى هاتنه‌و هويچ دڵخوه‌شييگ وه‌ى رووژگار ناله‌باره‌ نه‌يرن تا بتويه‌نن نيمچه‌ زه‌رده‌خه‌نه‌يگيش له‌بان ليوه‌يليان ده‌ربخه‌ن و به‌شدار بوون له‌ ساڵياد رووژ زه‌رده‌خه‌نه‌ى جه‌هانى جوور باقى مه‌ردمان تر.

كورد فه‌يلى وه‌ بوونه‌ى ئه‌و مه‌ينه‌تى و ده‌رده‌سه‌رى و ناديارى چاره‌نويسه‌وه‌ ك هيمان وه‌رده‌وامه‌ له‌ ژيانيان له‌ رووژ زه‌رده‌خه‌نه‌يش بيبه‌شن و دڵه‌يليان سڵاى به‌شدارى له‌ى رووژه‌ وه‌پيان نه‌ياگه‌و گرفتار ده‌س حه‌سره‌ت كاڵ و نائوميدى بوينه‌.

هه‌ر وه‌و خاتريشه‌ ئوميده‌وارم كورد فه‌يلييش جوور باقى مه‌ردمان تر رووژيگ له‌ رووژان بتويه‌نن به‌شدارى بوونه‌يل خوه‌ش و زه‌رده‌خه‌نه‌ى جه‌هانى بكه‌ن و قورتار بوون له‌ ته‌وق به‌دبه‌ختى و بيچاره‌يى.

جه‌ماڵ ئه‌ركه‌وازى