ئيمه‌و ئه‌مريكا

شفق نيوز

ئيسه‌يش دی نووره‌ی ئه‌مريكاس ك سياسه‌ت خوه‌ی شيه‌و بكا ده‌رهه‌ق وه‌ كورد وه‌تايبه‌ت ئه‌و سياسه‌ته‌ ك به‌غدا ته‌ماشای راسيه‌يل جوور خوه‌ی بكا، چوينكه‌ تائيسه‌ هه‌ر له‌ ديد حكوومه‌ت ناوه‌ندی به‌غدا كورد به‌شيگه‌ له‌ عراق و ئه‌مريكايش وه‌ل ده‌وڵه‌ت عراق مامڵه‌ كردياد.

چوينكه‌ هه‌ميشه‌ له‌يوا هس ئه‌كريه‌يد ك ئه‌مريكيه‌يل ك مه‌رام له‌ليان سياسه‌تمه‌داره‌يل ئه‌مريكاس له‌ ديد تايبه‌ت خوه‌يانه‌و نوڕنه‌ ده‌وڵه‌ت وه‌تايبه‌ت وڵاته‌يل يه‌كگرتگ ئه‌مريكا.

ئه‌مريكيه‌يل له‌يوا زانن عراقيش ئه‌مريكاس، دياره‌ باوه‌ڕيان له‌بان وڵات تر ناوچه‌گه‌يش هه‌ر وه‌و جووره‌سه‌، ك هه‌ر وه‌و خاتريشه‌ سه‌ريان له‌ داواكاری كورد سوڕ مينيد وه‌تايبه‌ت له‌وه‌ختيگ ك باس له‌ خاك و ناوچه‌يل داوڕياگ ئه‌كا.

ئه‌مريكا خوه‌ی وه‌ جووريگ تايبه‌تمه‌ندی پيكهاتگه‌و تيكه‌ڵه‌ له‌ سه‌دان نه‌ته‌وه‌و زووان، وه‌لی گشتيان شانازی وه‌ ئه‌مريكيبوين خوه‌يانه‌و ئه‌كه‌ن و گشتيانيش وه‌ زووان ئنگليزی وه‌ خوه‌شاڵيه‌و قسه‌ ئه‌كه‌ن، چوينكه‌ ئه‌وانه‌ گشتيان خوه‌يان بريار دانه‌ بچنه‌ ئه‌مريكاو بوونه‌ ئه‌مريكی و سه‌ربه‌رزن وه‌ ئه‌مريكبوين خوه‌يان، يه‌يش وه‌ چه‌واشه‌ی ئيمه‌ كورد، ك ئيمه‌ وه‌ خوه‌شی خوه‌مان نه‌ويمنه‌ عراقی و ئيرانی و توركی و سووری، به‌ڵكوو وه‌ زوور كريايمه‌سه‌ عراقی و چه‌سپيايمنه‌ وڵاتيگ ده‌سكرد ك له‌بان قاقه‌ز له‌ناونی دو سياسه‌تمه‌دار نه‌خشه‌ ئه‌رای دانرياگه‌، دی له‌و رووژيشه‌و ك بويمنه‌ عراقی بيجگه‌ ماڵويرانی و ده‌رده‌سه‌ری قوربانی و كيمياواران و بوردمان هويچ تر له‌ی عراقه‌ نه‌يمنه‌سه‌ چه‌و.

هه‌ر وه‌و خاتريشه‌ دی بايه‌سه‌ ئه‌مريه‌كيه‌يل له‌وه‌ بڕه‌سنه‌و ك ئيمه‌ هويچ خوه‌شاڵ نييم وه‌ عراقيبوينمان و بايه‌سه‌ كورد خوه‌ی بڕيار بيه‌يد جوور ئه‌وه‌ك ئه‌مريه‌كيه‌يل خوه‌يان بڕيار دان، ك ئايا ئه‌خوازيد بدێده‌ عراقی يا ره‌سيه‌سه‌ ئه‌و باوه‌ڕه‌ ك بويشيد نه‌ و خوازيار سه‌روه‌خوه‌ييه‌.

سه‌لام عه‌بدوڵڵا

ج . أ