سه‌ركرده‌یل فه‌رامووشكردن

شفق نيوز

 

ئیمه‌ له‌ هویر دوباره‌كردن و یادخستن ئه‌و زانیاریه‌یله‌ نییم ك رووژانه‌ له‌باوه‌ت مه‌سه‌له‌یل چاره‌نویسساز ئه‌ژنه‌فیمه‌ى، به‌ڵكوو خواست ئه‌وه‌سه‌ بپرسیم چه‌نیگ هه‌وه‌جه‌ وه‌ وه‌خت و تواناو هه‌وڵ و ته‌قلاى جددى دیریم، ك نه‌ك له‌وه‌ر خاتر ئه‌وه‌گ وه‌ره‌و نوا گام بنه‌یم، به‌ڵكوو له‌وه‌ر مقه‌یه‌تیكردن له‌ باقى ئه‌و خوه‌شه‌ویسى و به‌زه‌ییه‌ ك مه‌ندگه‌ له‌ ناونیمان؟!.

وه‌ گووره‌ى ئه‌و ئاماژه‌یله‌ ك له‌ سه‌ره‌تاى ساڵ 2014 ئاشكرا بوى، ئومیدیگ له‌ى بار سه‌خت و كووتاییهاتن مه‌ینه‌تیه‌یله‌ نیه‌و ئیمه‌یش دڵنیایم له‌وه‌گ باره‌گه‌ وه‌ره‌و خراوتر ریڕه‌و ئه‌گریده‌ وه‌ر، چوینكه‌ ئه‌و ئامار و زانیاریه‌یله‌ ك له‌ دانیشتن سه‌ركرده‌یل سیاسى باس ئه‌كریه‌ید ته‌نیا كارتیگه‌ ئه‌را فشارخستن و ته‌واوكردن هساوه‌یل ناونیان و ده‌رد و مه‌ینه‌تیه‌یل ملله‌تیش ته‌نیا وه‌سیله‌ى دعایه‌كردنیگه‌ ئه‌را وه‌كاربردن هاووڵاتى و داین قه‌وڵه‌یل بى كرده‌وه‌.

ئمجا له‌وه‌ر ئه‌وه‌گ چوینكه‌ ئى تاوانه‌یل رخه‌وبه‌ر رووژانه‌ ك له‌ جاده‌یل روى ئه‌یاد و ملله‌ت ناڕه‌حه‌ت كردگه‌و گشت خاوه‌ن وژدانیگ به‌ختدار نیه‌ له‌ ساى ئه‌و خاوه‌ن بڕیاره‌یله‌ ك مه‌یل نه‌یرین ده‌خاڵه‌ت ئیچنه‌ باوه‌ته‌یلیگ بكه‌ن له‌ دانیشتنه‌یلیان، من له‌یوا دوینم له‌ جیاى ئه‌وه‌گ بویشیم ئى شماره‌ له‌ قوربانیه‌یل و شه‌هیده‌یل، خاستر ئه‌وه‌سه‌ گشتمان دقه‌ت بكه‌یمنه‌ بان مه‌سه‌له‌ى ده‌سنیشانكردن و شماره‌ى گه‌ناته‌كاره‌یل و تاوانباره‌یل سیاسى، نه‌ك ته‌نیا ترۆریسته‌یل، چوینكه‌ ئه‌وانه‌ جوور ئه‌وه‌ك ئاشكراس نه‌ ئایین دیرن نه‌ گفت، هه‌ر له‌وه‌ر ئه‌وه‌یش بایه‌سه‌ له‌ بانمان ئه‌و ئایدۆلۆجیاو ریڕه‌وه‌یله‌ بزانیم و ده‌سنیشان بكه‌یم ك سه‌ركرده‌یل فه‌رامووشكردن په‌وه‌یسن وه‌پیه‌و، تا بایمنه‌ بان ئه‌و باوه‌ڕه‌ ك له‌وه‌رچه‌ بیتاوانه‌یل تیر خواردنه‌ له‌ى كاره‌ساته‌یله‌.

رویداگه‌یل نیشانه‌ى ئه‌وه‌سه‌ ك ئه‌وه‌گ وجوود دیرید له‌ مه‌یدان سیاسى نوێنه‌رایه‌تى گوزه‌یشته‌ى رووشن حزب و قه‌وراره‌یل ناسریاگ ناكه‌ن، به‌ڵكوو ره‌فتاره‌یلیگ ناپه‌سه‌ن و رینمایه‌یل و كرده‌وه‌یلیگه‌ ك هه‌وڵ قانجاز ماددى و ده‌سڵاتدارى له‌تى وجوود دیریدو جیاوازى ته‌واویگ دیرید وه‌ل ئه‌وه‌گ زویتر له‌بانیان خوه‌نیمنه‌ى و دیمنه‌ى و ژنه‌فتیمنه‌ى.

دویاخریش ئى ملله‌ته‌ شایسته‌ى ژیانه‌ ئه‌گه‌ر بخوازید و له‌ هه‌مان وه‌خت شایسته‌ى سزایشه‌ له‌وه‌ختیگ بڕیار بیه‌ید ریڕه‌ویگ بگریده‌ وه‌ر بى قانجاز و دویر له‌ خوه‌شبه‌ختى و خوه‌شاڵى، ئمجا ئه‌ى هاووڵاتى ئه‌و ئاماره‌یله‌ له‌هویره‌و بووه‌و دى واز بارن له‌و شوونه‌واره‌یل ئاشكراو دویره‌و بكه‌ف له‌ دروشمه‌یل بى ئومید، چوینكه‌ ئاشتى له‌ناونى سه‌ركرده‌یل جه‌نگ نیه‌ مه‌گه‌ر ته‌نیا له‌وه‌خت به‌شكردن ده‌سكه‌فته‌یل. وه‌ل ئه‌وه‌یشا ئه‌وان له‌ هه‌ڵوژاردنه‌یل ئاینده‌یش گره‌و له‌بان ئه‌وه‌ كه‌ن ك مه‌ردم ئه‌و رویداگه‌یله‌ فه‌رامووش كردنه‌و ئیسه‌یش ئه‌وانه‌ وه‌و مه‌رامه‌و له‌یوا هویره‌و ئه‌كه‌ن ك هه‌ق خوه‌یانه‌ بوونه‌ى سه‌ركرده‌ى ئه‌و ملله‌ته‌ ك مه‌ینه‌تیه‌یلى له‌ هویره‌و بردنه‌!.

عه‌لى حسێن فه‌یلى

ج . أ