میر و میهره‌بان

شفق نيوز

له‌وه‌ختیگ ك گه‌ردیمه‌ ناو لاپه‌ڕه‌ى میژوو ئه‌ده‌بى كوردى، چه‌وم كه‌فته‌ وینه‌ى وه‌ده‌س دروسكریاگ دویه‌ته‌ شاعریگ جایه‌ڵ جوان وه‌ناو"میهره‌بان" ك له‌ساڵ 1858 زایینى له‌ ئاوایى مایى له‌ باكوور ئامێدى هاته‌سه‌ دونیاو له‌ عومر 47 ساڵان له‌ ساڵ 1905زایینى ماڵئاوایى یه‌كجارى له‌ دونیا كردگه‌.

میهره‌بان دویه‌ت مه‌لا حه‌سه‌ن مایى بویه‌ سه‌ر وه‌ هووز بروارى ژویه‌ر، ك دیاره‌ له‌ باوگیه‌و هووكاره‌ى خوه‌نین و نویسانن بویه‌. ئى دویه‌ته‌ شاعره‌ وه‌ل ئه‌وه‌یشا ك به‌هره‌ى شعرى داشتگه‌، له‌هه‌مان وه‌خت ده‌سڕه‌نگیش بویه‌ له‌ كاره‌یل ده‌سچن و نه‌خشه‌كارى و له‌و بواریشه‌و هونه‌ر خوه‌ى نیشانداگه‌.

ئى شاعره‌ له‌ناو كتاو "مێژوو ئه‌ده‌ب كوردى" ك له‌لایه‌ن رحمه‌تى "مارف خه‌زنه‌دار"ه‌و دانریاگه‌ له‌یوا باس كریاگه‌ ك مه‌ردم هووزه‌گه‌ى و مه‌ردم ده‌ورگرد ناوچه‌گه‌ى ریز و حورمه‌ت فریه‌یگ له‌لى نانه‌.

ئمجا وه‌و جووره‌ باس كریاگه‌ ك میر ئه‌وساى بروارى له‌وه‌ختیگ ك هه‌واڵ جوانى میهره‌بان ژنه‌فتگه‌ هه‌وڵ ئه‌وه‌ داگه‌ بخوازیده‌ى و ژیان هاوسه‌رى وه‌لیا دروس بكا، ك وه‌و خاتریشه‌ چیه‌سه‌ خوازمه‌نى له‌لاى باوگى و ئه‌ویش رازى بویه‌.

وه‌لى ئى رویداگه‌ بویه‌سه‌ هه‌واڵ ناخوه‌شیگ له‌لاى میهره‌بان و ناچاره‌ وه‌ شعره‌و قسه‌یگ بڕه‌سنیده‌ گووش میر ك میهره‌بان دووسداره‌و رازى نیه‌ شوى بكاده‌ میر بروارى، ك ئویشید:

من چه‌ بویشیم چه‌ به‌یانكه‌م كى وه‌حاڵ من زانید

مه‌خفیات با ئاشكرا كه‌م ئاخ له‌ده‌س ده‌رد گران

ئاخ له‌ده‌س ئشق و ئه‌وین كه‌فتمه‌سه‌ تازیه‌و شیوه‌ن

كى تیه‌ید زه‌خمم ساقه‌و كه‌ید چیه‌سه‌ دڵ سه‌د ئاخ وژان

دى له‌ى شعره‌ میر بروارى ئه‌راى ده‌ركه‌فید گ میهره‌بان دووسیگ تر دیرید و په‌یوه‌ندى دڵدارى وه‌ل كه‌سیگ تر دیرید، ك هه‌ر وه‌و خاتریشه‌ میر ده‌س له‌لى هه‌ڵگریدو ئى شعره‌ ئه‌ڕاى نویسید:

خوه‌شه‌ویسى نه‌یرید چاره‌

چشتیگ رووشن و دیاره‌

له‌ داستان ت دوباره‌

هه‌ر شوكر ئه‌ى میهره‌بان

میهره‌بان تویه‌نستگه‌ ئشق و راز دڵ خوه‌ى وه‌و شعره‌ بڕه‌سنید لاى ئه‌و میره‌و له‌ هه‌مان وه‌خت تاریفیگ جوانیش داسه‌ دڵدارى راسكانى ك وه‌ هویچ شیوه‌یگ نه‌بایه‌د خیانه‌ت له‌لى بكریه‌ید، له‌ هه‌مان وه‌خت میریش وه‌ ئه‌ده‌ب و رووشنهویرى به‌رزیگه‌و قه‌در و حورمه‌ت ناگه‌ له‌ هه‌ڵویست میهره‌بان.

جه‌ماڵ ئه‌ركه‌وازى