بەغدا و هەولێر

شفق نيوز

 

ئمڕوو به‌غدا شيوازيگ تر وه‌خوه‌يه‌و دوينيدو بويه‌سه‌ پايته‌خت ناكووكی و جه‌نگ تايفی و مه‌زه‌وی و دژايه‌تيكردن. له‌سه‌ره‌تای دامه‌زرانن ده‌وڵه‌ت عراقی دژايه‌تی كورد كار سه‌ره‌كی ده‌سڵاتداره‌يل بويه‌، ك له‌و شاريشه‌ برياره‌يل دريا.

ته‌نانه‌ت تا رووژ ئمڕوويش هه‌مان هويرو باوه‌ڕ وجوود ديريد، وه‌ چه‌واشه‌ی ئه‌وه‌ك بايه‌س بوی ك جوور شار ئاشتی ناسريا له‌بان هه‌مان شيواز مقه‌يه‌تيكردن و پشتگيری ئاشتی بكردياد، وه‌لی وه‌چه‌واشه‌وه‌ دويره‌ له‌گشت بنه‌مايه‌يل ئاشتی و ديموكراسی، تا كار ره‌سيه‌ ئه‌وه‌ك ئه‌و شاره‌ دابه‌ش بكريه‌يد وه‌ گووره‌ی ئايين و مه‌زه‌و.

سياسه‌تمه‌داره‌يل خاوه‌ن ده‌سڵات ئه‌و توانا نه‌ياشتن ك مقه‌يه‌تی له‌ گونجيان و يه‌كڕزی بكه‌ن، به‌ڵكوو بوينه‌ هووكار ئه‌و ره‌فتاره‌يله‌، ك هه‌رچه‌نی له‌ سه‌رده‌م رژيم گوڕ وه‌گووڕ وه‌ئاشكرا ئه‌و جياوازيه‌ دوينريا، چوينكه‌ ئه‌و رژيمه‌ دژايه‌تيكردن و زوڵم وه‌شيوازيگ تر ئه‌نجامدا تا ره‌سيه‌ ئه‌و راده‌ چه‌ك قه‌يه‌غه‌كرياگ و سياسه‌ت ره‌گه‌زپه‌رسی دژ وه‌ كورد هاورده‌ كار.

بيجگه‌ ئه‌و كاره‌يل نائنسانيه‌ ك دژ وه‌كورد ئه‌نجام دريا، تائيسه‌يش هه‌ر وه‌رده‌وامه‌، وه‌لی وه‌ شيوازيگ تر ئه‌و سياسه‌ته‌ په‌يڕه‌و ئه‌كريه‌يدو ئه‌و راسيه‌ ده‌ركه‌فت ك هه‌ولێر هيزه‌ ئه‌را به‌غدا، هه‌ولێر هووكار ئارامی و ته‌بايی به‌غداس، هه‌ولێر هووكار پيشكه‌فتن به‌غداس، ك يه‌يش له‌ی دوياخره‌ وه‌ئاشكرا ئه‌را گشتلايگ ده‌ركه‌فت ك سه‌رجه‌م وڵاته‌يل ئاشتی و ديموكراسيخواز له‌ڕی هه‌ولێره‌و هاوكاری به‌غدا ئه‌كه‌ن و ئه‌وه‌ ده‌ركه‌فت ك پێشمه‌رگه‌يل قاره‌مان كوردستان هيز وه‌رگريكارن له‌ ته‌بايی و ديموكراسی، هه‌ولێر ئارامگه‌ی وه‌يه‌كه‌وژيان و برايه‌تی و ريزگرتنه‌، هه‌ولێر پايته‌خت كوردستان و هيز وڵاته‌، يه‌يش له‌وه‌ختيگ ك بايه‌س بوی به‌غدا وه‌رگری له‌ هه‌ولێر و هاووڵاتيه‌يلی بكردياد، وه‌لی وه‌چه‌واشه‌وه‌ ئيمه‌ وه‌رگری له‌ به‌غداو هاووڵاتيه‌يل شاره‌يل تر كرديم، كوردستان پيشوازی له‌ ئاواره‌يل كردو مقه‌يه‌تی له‌ليان كرد وه‌ چه‌واشه‌ی سوپای عراقی ك وه‌چه‌ن چركه‌يگ شاريگ جوور موسڵ له‌ده‌سدان، ك يه‌يش گشت هاوكيشه‌يل ئاڵشت كرد نه‌ك هه‌ر له‌ عراق، به‌ڵكوو له‌ناوچه‌گه‌و جه‌هانيش.

گشت ئه‌يانه‌ ئاشكرای ئه‌وه‌ كرد ك كورد هووكار وه‌يه‌كه‌وژيان و ئاشتيه‌و يه‌يش ده‌رخست ك هه‌ولێر هه‌وه‌جه‌ وه‌ به‌غدا نه‌يريد، به‌ڵكوو وه‌ چه‌واشه‌وه‌ به‌غدا هه‌وه‌جه‌ وه‌ هه‌ولێر ديريدو به‌غدا وه‌بی هه‌ولێر ناتويه‌نيد حوكمڕانی عراق بكا، وه‌لی ده‌ركه‌فت ك هه‌ولێر وه‌بی به‌غدا توانای حوكمڕانی ديريد.

رويداگه‌يل ئی دوياخره‌ جاريگتر سياسه‌ت سه‌ركردايه‌تی سياسی كورد وه‌تايبه‌ت جه‌ناب سه‌رۆك بارزانی خسته‌ ڕوی ك تويه‌نستن وه‌ حه‌كيمانه‌و شاره‌زايی وه‌ل رويداگه‌يل نه‌خوازرياگ هه‌ڵسوكه‌فت بكه‌ن و هه‌ر سه‌رۆك بارزانی بوی ك ئويشيد پيكهاته‌ی كوردستان "يا وه‌يه‌كه‌و ژيه‌يم وه‌ ئازادی، يا وه‌يه‌كه‌و ئه‌مريم"، هه‌ر ئه‌ويش ئويشيد ريز له‌ ئاواره‌يل عه‌ره‌ب بگرن و هه‌ر ئه‌وه‌ ئويشيد مقه‌يه‌تی له‌ ته‌بايی و يه‌كڕزی بكه‌ن، وه‌چه‌واشه‌ی سه‌ركرده‌يل عراقی ك وه‌گشت شيوه‌يگ دژايه‌تی كورد ئه‌كه‌ن.

ئه‌يه‌ هه‌ولێر و ئه‌ويش به‌غدا.

شێركۆ حه‌بيب

ج . أ