نیشتمان و هاووڵاتى، كامیان ئه‌واكه‌ى تر دروس ئه‌كا؟

شفق نيوز

چه‌ وه‌نیشتمان و هاووڵاتى كرد. تائیسه‌یش له‌شوون نزیكه‌ى ده‌ ساڵ له‌ڕمیانى وه‌لى هیمان سه‌دام ته‌واو نه‌ویه‌و له‌ترۆر و زوڵم و ته‌قاننه‌وه‌ ده‌س ئه‌ڵنه‌گرتگه‌، ئیمه‌ جوور هووڵاتى ئومیده‌واریم ئه‌وه‌ له‌هویرمان نه‌چوود ك سه‌دام چه‌ وه‌ملله‌ت كردو داوا له‌لایه‌نه‌یل په‌یوه‌ندیدار كه‌یم ئه‌و كاره‌ساته‌یله‌ له‌تاریخ و له‌ناو كتاوه‌یل ده‌رسخوه‌ندن ئشاره‌ت وه‌پى بكریه‌ێد له‌گشت قوناغه‌یل خوه‌ندن تا نه‌وه‌یل ئاینده‌ بزانن چه‌ وه‌سه‌رمان هات له‌و سه‌رده‌مه‌.

بیگومان ئیسه‌یش له‌ئاكام ئه‌و شوونه‌واره‌سه‌ ك نیشتمان و هاووڵاتى تویش هاتنه‌و سیاسیه‌یل و خاوه‌ن بڕیاره‌یل له‌جیاى ئه‌وه‌ك كار خاس بكه‌ن، نوڕید خه‌ڕگه‌گه‌ زیاتر خه‌سه‌و كردنه‌ وه‌ناكوكى و كیشمه‌كیش و بڕیاره‌یل ناوه‌جى، ك بوینه‌ى بایس ئه‌وه‌ك هاوڵاتى رووح نیشتمانى له‌ده‌س به‌یدو باوه‌ڕى وه‌پى كزه‌و بوود. ئنجا هووكار سه‌ره‌كى ئى مه‌سه‌له‌ ئه‌وه‌سه‌ ك پاشمه‌نده‌یل رژیم وه‌رین هیمان هه‌ر مه‌ندنه‌و گه‌مه‌ كه‌ن وه‌ ئه‌قڵ سیاسیه‌یل و له‌ئاكامیشى گشت ئه‌و ناكوكى و كیشمه‌كیشه‌ دروس بویه‌ له‌ناونى لایه‌نه‌یل و هاووڵاتییش جوور دوینه‌ریگ وه‌پى هاتگه‌ له‌وه‌رانوه‌ر فیلم"ئه‌كشن"نیشتگه‌و نیه‌زانێد مه‌سه‌له‌ چه‌س! ئنجا ئایا كامیان ئه‌واكه‌ى تر دروس ئه‌كا، نیشتمان خاس دروسكه‌ر هاووڵاتى خاسه‌ یا هاووڵاتى خاس دروسكه‌ر نیشتمان خاسه‌؟ ئه‌گه‌ر بویشیم"نیشتمان" ئه‌ى نیشتمان له‌كوورا خاسسازى خوه‌ى دوینێده‌و؟ ئایا له‌خود هاووڵاتیه‌یل نیه‌ له‌دایگ و باوگ و مامۆستاو حكوومه‌ت و سیاسى و مه‌ڵوه‌نه‌یل هوشیاركردن و....هتد؟ نیشتمان په‌یوه‌سه‌ وه‌ده‌زگایه‌یل وه‌رپرس و ئه‌وانه‌ك به‌نه‌ى ڕیه‌و، ئنجا راسه‌ لاشه‌ى نیشتمانه‌یل حكوومه‌ت و ئداره‌و یاساس، وه‌لى ئى ده‌زگایه‌یل وه‌رپرسه‌ ك ئه‌رك وه‌ڕیه‌وبردنى هه‌ڵگرتنه‌ هاووڵاتیه‌یل ئه‌ركى كیشن و بایه‌سه‌ خاسكرده‌ بوون له‌وه‌ر خاتر نیشتمان خاس.

له‌یرا پرسیاریگ هه‌س ك ئایا ئیمه‌ى موسڵمان و په‌یڕه‌وكه‌ره‌یل خاسترین دین و خاسترین په‌یامبه‌ر"س.خ" له‌ سفه‌ته‌یل خاس و تایبه‌تمه‌ندى هاووڵاتى خاس دویره‌و گریم له‌وه‌ختیگ ك بایه‌سه‌ وه‌گووره‌ى په‌یڕه‌و دین و ده‌ستوور خاسترین هاووڵاتى بویمن له‌وه‌ر خاتر ژیانیگ خاستر و دروسكردن نیشتمانیگ خاس؟

هووكار ئى مه‌سه‌له‌ ئه‌وه‌سه‌ ئیمه‌ فره‌جار باس پابه‌ندى و دڵسووزى ئه‌را خاسسازى كه‌یم، وه‌لى جیوه‌جى مه‌سه‌له‌گه‌ ناكه‌یم. ئنجا وه‌رپرسیاریه‌تى پیكهاتگه‌ له‌هاوكارى و هه‌وڵ وه‌رده‌وام و رییككه‌فتن ك بایه‌سه‌ له‌بان زه‌وى واقع جیوه‌جى بكریه‌ێد نه‌ك ته‌نیا وه‌قسه‌و قه‌وڵ بى كرده‌وه‌.

گشت خاسسازییگ بووده‌ مایه‌ى په‌یابوین خاسسازى تر، هه‌ر له‌وه‌ر ئه‌وه‌یش دایگ خاس و باوگ و خیزان و خوه‌ندنگاو ره‌فیق و ژینگه‌ى خاس گشت ئه‌یانه‌ وه‌یه‌كه‌و توه‌یه‌نن هاووڵاتى خاس دروس بكه‌ن و له‌هه‌مان وه‌خت وڵات و نیشتمان خاسیش بارنه‌ وجوود.

 

 

سه‌باح مهدى

ج