عێراق بايه‌ته‌ سه‌رله‌نووئه‌ڵسيه‌ێده‌و سه‌رپا

شفق نيوز

وه‌ده‌س هاوردن ئازادی و زامن كردن ئايه‌نده‌ی خاستر ئاگادارن . گشت زانن عێراق له‌ كوتايی ده‌يه‌ی شه‌سه‌گان پڕ له‌ خه‌ير و به‌ره‌كه‌ت ئابووری و به‌رزی ئاست كادره‌يل ئنسانی بوی و ده‌زگايل هووكاره‌ كردنی جيگای تايبه‌تيگ له‌ جه‌هان داشتن و خاسيه‌يل تره‌كيگ ئه‌وه‌يش له‌ وه‌ختيگ زياتر وڵاته‌يل ناوچه‌گه‌ ئاره‌زوو داشتن ك وه‌ ئاست پيشكه‌فتن ئه‌و وه‌خت عێراقه‌ بڕه‌سن وه‌لی چه‌نی سه‌خته‌ وه‌ختی ئيمنه‌ عێراقيه‌يل له‌ناونی كۆمه‌ڵگه‌ی عه‌ره‌بی و ئسلامی ئه‌و پيشكه‌فتنه‌يل و بارودوخ گۆزه‌شته‌مانه‌ وه‌هوير ئه‌يه‌ريم وه‌ له‌ی وه‌خته‌و له‌وه‌ختيگ ده‌سڵات ديكتاتۆری به‌عس ده‌س وه‌كار بوی و له‌شوون رميان ئه‌ی ده‌سڵاته‌ ته‌نيا ويرانی بويه‌سه‌ به‌ش هاووڵاتيه‌يل عێراقی . ئايا ئيمنه‌ بايه‌د ئاكام سياسه‌ته‌يليگ بوينه‌ بايس ويرانی عێراق و شيويان بارودوخی و له‌ده‌سداين شوون خوه‌ی له‌ كۆمه‌ڵگه‌ی جه‌هانی قه‌بوول بكه‌يم . ئايا ئيمنه‌ له‌ ئه‌مريكا تواسيم ك جه‌نگيگ له‌ عێراق رێكبخا؟ نه‌..! وه‌لی ئه‌ی كاره‌ ئه‌نجام گرت و ده‌سڵات له‌ عێراق ئاڵشته‌و بوی و رژيم ديكتاتۆری سه‌دام له‌يه‌ك شيويا و ئيسه‌يش بايه‌د ته‌قالا بكريه‌ێ ئه‌را سه‌رله‌نوو گله‌وداين عێراق ئه‌را شوون به‌رز خوه‌ی له‌ كۆمه‌ڵگه‌ی ناوده‌وڵه‌تی و وه‌رگری كردن له‌ مافه‌يل ره‌وای خوه‌مان و زامن كردن هه‌ر به‌رژوه‌نديگ . به‌ڵێ له‌ی وه‌خته‌ ئيمنه‌ عێراقيه‌يل ده‌س ئه‌نه‌يمنه‌ ده‌س يه‌ك ئه‌را دامه‌زرانن عێراقيگ وه‌تواناتر و پيشكه‌فتگ تر و رووشنتر له‌ عێراق گوزه‌شته‌ تا يه‌ك جارتر بتويه‌نيم ئه‌من و ئاسايش و سه‌قامگيری ئه‌را خوه‌مان زامن بكه‌يم و يه‌ك جارتر سه‌ر عێراق له‌ ناو وڵاته‌يل جه‌هان به‌رزه‌و بكه‌يم .