سیستانى: هویچ چینیگ جوور كورده‌یل فه‌یلى زوڵم له‌لى نه‌كریاس له‌ عیراق

شفق نيوز

وكاراكردن بڕیاره‌یل دادگاى باڵاى تاوان عیراقى ك كه‌یس كورده‌یل فه‌یلى وه‌ جینۆساید ناسان، و دیاریترین به‌رهه‌مه‌یل ئه‌ى هه‌وڵه‌یله‌؛ وازكردن نویسینگه‌ى كاروبار كورده‌یل فه‌یلى له‌ نویسینگه‌ى سه‌رۆكایه‌تى كۆمار، و له‌ هه‌مان وه‌ختیش جه‌لال تاڵبانى سه‌ۆرك كۆمار عیراق فیدرالى دویاى دیدار مه‌رجه‌ع دینى گه‌ورا ئایه‌توڵڵا عه‌لى سیستانى جه‌خت له‌بان ئه‌وه‌ كرد ك :" عیراق جددیه‌ له‌ مقه‌یه‌تى كردن هاووڵاتیه‌یل مه‌سیحى و هاوردنه‌وه‌ى شانیه‌ت و ئعتبار ئه‌را هاووڵاتیه‌یلى له‌ كورده‌یل فه‌یلى".

عادل موراد به‌ڕێوه‌به‌ر نویسینگه‌ى كاروبار كورده‌یل فه‌یلى له‌ سه‌رۆكایه‌تى كۆمار له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشى:" سه‌رۆك كۆمار جه‌لال تاڵه‌بانى هه‌ست وه‌وه‌ كرد ك چین كورده‌یل فه‌یلى زوڵم فره‌یگ له‌لى كریایه‌ و ناهمى كریایه‌، له‌وه‌ر ئه‌وه‌ ڕاپه‌ڕى و بڕیاردا ئى نویسینگه‌ بكه‌یده‌وه‌ وه‌ مه‌شووره‌ت كردن مه‌سعود بارزانى سه‌رۆك هه‌رێم كوردستان و نورى مالكى سه‌رۆك وه‌زیره‌یل عیراق فیدرالى".

زیاتریش وت:" سه‌رۆك تاڵه‌بانى مكوڕه‌ له‌بان كاراكردن و وه‌گوڕخستن بڕیاره‌گان دادگاى باڵاى تاوان عیراقى ك تاوان كوشتن ده‌سه‌جه‌مى كورده‌یل فه‌یلى وه‌ جینۆساید ناسان، ئه‌ویش وه‌ وازكردن ئى نویسینگه‌".

له‌باوه‌ت كاره‌یل نویسینگه‌ى كاروبار كورده‌یل فه‌یلى عادل موراد ئه‌وه‌ ئاشكراكرد ك :"كاركردن ئى نویسینگه‌ وه‌ ته‌نسیقكردن وه‌ل سه‌رۆكایه‌تى كۆمار و ئه‌نجوومه‌ن وه‌زیره‌یل و سه‌رۆكایه‌تى هه‌رێم ئه‌نجام گرید، و وه‌ل هه‌ر خێرومه‌نیگ ك تواید ده‌س یارمه‌تى ئه‌را ئى چینه‌ دریژه‌و بكه‌ید ك تا ئیسه‌ ئنساف نه‌كریایه‌"

شایان وتنه‌ ك مه‌سعود بارزانى سه‌رۆك هه‌رێم كوردستان له‌ شوون ده‌رچوین بڕیار دادگاى باڵاى تاوان عیراقى وه‌جینۆساید ناسانن ئه‌و تاوانه‌یله‌ ك دژ وه‌ كورده‌یل فه‌یلى ئه‌نجام دریانه‌ ، داوا له‌ گشت لایه‌نه‌یل په‌یوه‌ندیدار كرد له‌ عیراق فیدرالى و هه‌رێم كوردستان بكه‌فنه‌ شوون ئه‌وه‌گ هاله‌ خزمه‌تكردن ئنسافكردن كورده‌یل فه‌یلى له‌ گشت لایه‌نیگ و دابینكردن كه‌ره‌سته‌یلیگ قه‌ره‌بووكردن و هاوردنه‌وه‌ى ئه‌و هه‌قه‌یلیانه‌ مسۆگه‌ر بكه‌ید ك ڕژیم وه‌رین چه‌پاوى كرد.

عادل موراد له‌ دریژه‌ى قسه‌گانى وت :" 95% له‌ كورده‌یل فه‌یلى ماڵ و موڵكه‌یلیان نه‌سه‌ندنه‌سه‌وه‌ و هیمان فایله‌گانیان خریاسه‌ كنار". و هووكاره‌گه‌یشى ئه‌را سه‌رۆك وه‌رین ده‌سته‌ى مرافه‌یل موڵكدارى ئه‌حمه‌د شیاع به‌ڕاك برده‌وه‌؛ ك ئه‌نجوومه‌ن وه‌زیره‌یل له‌بان كاره‌گه‌ى لاورده‌ى له‌شوون چه‌ن كێشه‌یگ گه‌ناته‌كارى و گه‌نى له‌ وه‌ڕیه‌وبردن ده‌سته‌گه‌.

له‌باوه‌ت سه‌ردانه‌گه‌ى سه‌رۆك تاڵه‌بانى ئه‌را سه‌ماحه‌ت سه‌ید عه‌لى سیستانى ، عادل موراد وت :"سه‌رۆك تاڵه‌بانى له‌و دیداره‌ ته‌ئكید له‌بان مه‌زڵوومیه‌ت كورده‌یل فه‌یلى كرد".

ئاماژه‌یش وه‌وه‌دا ك :" سه‌ید سیستانى هاوشعوور و هاوهه‌ڵوێست بوى وه‌ل سه‌رۆك تاڵه‌بانى و وتیش هویچ چینیگ له‌ عیراق جوور كورده‌یل فه‌یلى زوڵم له‌لى نه‌كریاس".

له‌لاى خوه‌یه‌و عه‌لى حوسێن فه‌یلى ئه‌ندام په‌رله‌مان كوردستان له‌ قسه‌گانى ئه‌را ماڵپه‌ڕ شه‌فه‌ق ئویشى:" هه‌ڵوێسته‌یل مه‌رجه‌عیه‌ت  هه‌ڵوێسته‌یل شه‌رافه‌تمه‌ندن و چشت تازه‌یگ نین ئه‌را عیراقیه‌یل وه‌شیوه‌یگ گشتى و چینه‌یل زوڵملیكریاى وه‌تایبه‌تى و له‌وانه‌یش كورده‌یل فه‌یلى".

زیاتریش وت :"ئه‌و په‌یامه‌ ك مه‌رجه‌عیه‌ت تواست بڕه‌سنیده‌ى دو خاڵ گرنگ له‌تى بوى، یه‌كمیان سه‌رپه‌رشتى كردن باوگانه‌یه‌ ئه‌را كورده‌یل فه‌یلى و ئه‌واكه‌ى تریش شعووركردن مه‌رجه‌عیه‌ته‌ وه‌و زوڵمه‌ ك له‌لیان كریه‌ید".

فه‌یلى هه‌ڵوێسته‌گان سه‌رۆك كۆمار ستایش كرد، ك هاوخه‌میى وه‌ل كێشه‌ى كورده‌یل فه‌یلى وه‌ شیوه‌یگه‌ ك وه‌ل پله‌و پایه‌ى گونجیه‌ید وه‌ك سه‌رۆك كۆمار ".

ئه‌وه‌یشه‌ ڕووشنه‌وكرد ك:" سه‌ركردایه‌تى عیراقى و كوردستانى هه‌ڵوێسته‌یلیان ئاشكرا و دیاره‌ له‌ هاوسووزییان وه‌ل كورده‌یل فه‌یلى و له‌ شوون و بوونه‌ ومه‌یدانه‌یل فره‌یگ ئاشكراى كردنه‌، و دویا وته‌گان سه‌رۆك كۆماریش ده‌لیلیگه‌ له‌بان ئه‌و هه‌ڵوێسته‌یله‌".

 

له‌ دریژه‌ى قسه‌گانى عه‌لى فه‌یلى وت :"كێشه‌ و گیروگرفته‌یل فره‌یگ له‌ مه‌یدان عیراقى هه‌س بایه‌ته‌ بكه‌فنه‌شوونیان و چاره‌سه‌ر كوتوپڕ ئه‌رایان په‌یا بكه‌ن، له‌وه‌ر ئه‌وه‌، بایه‌ته‌كێشه‌گه‌مان بووده‌ به‌شیگ له‌ كێشه‌یل ملله‌ت عیراق".

له‌باوه‌ت وازكردن نویسینگه‌ى كاروبار كورده‌یل فه‌یلى له‌ نویسینگه‌ى سه‌رۆك كۆمار، عه‌لى فه‌یلى ئویشى:" ده‌سپیشخه‌ریه‌گه‌ى سه‌رۆك كۆمار له‌ دامه‌زرانن ئى نویسینگه‌ ده‌رفه‌تیگه‌ ئه‌را ئیمه‌ تا وه‌ جددى بیه‌یمنه‌ یه‌كا، له‌خاتر تین و گوڕداین وه‌ بڕیاره‌گان دادگاى باڵاى تاوان عیراقى ئه‌را هاوردنه‌وى هه‌قه‌یل خوریاى ئى چینه‌".

ئه‌وه‌یشه‌ ڕووشنه‌وكرد ك:" بایه‌ته‌ گشت كورده‌یل فه‌یلى وه‌ گشت ڕیڕه‌وه‌یل سیاسییانه‌وه‌ پشتگیرى له‌ى نویسینگه‌ بكه‌ن، و دریخى نه‌كه‌ن له‌ پیشكه‌شكردن ئه‌و زانیاریه‌یله‌ ك خزمه‌ت وه‌ چین زوڵملیكریایمان ڕه‌سنێ ".

شایان باسه‌ ك نویسینگه‌ى كاروبار كورده‌یل فه‌یلى له‌ نویسینگه‌ى سه‌رۆكایه‌تى كۆمار ك عادل موراد به‌یده‌ى ڕیه‌وه‌ وه‌شوونكه‌فتن دۆسیه‌ى جینۆسایدكردن كورده‌یل فه‌یلى ك وه‌گووره‌ى بڕیاریگ دادگاى باڵاى تاوان عیراقى له‌ 29 / 11 / 2010، كردیه‌سه‌ ئه‌رك سه‌رشان خوه‌ى.