كه‌ى بڕیار عراقیه‌ت كورده‌یل فه‌یلى ئه‌دریه‌ێ؟

شفق نيوز

هیمان تائیسه‌ كار ڕاسه‌قینه‌یگ  نه‌كریاگه‌ ئه‌را لاوردن ئه‌و مه‌ینه‌تى و ده‌رده‌سه‌ریه‌ له‌بانیان ك سیاسه‌ت رژیم رمیاگ چه‌سپانه‌ى له‌بانیان و ئه‌وه‌ بوى ك شوناسنامه‌یان لاورد و سقووت كرد و گشت ماڵ و موڵكه‌یلیان زه‌فت كرد و ڕوڵه‌یلیان ده‌سگیر كرد و خسته‌یانه‌ زندانه‌یل وه‌بى هویچ گوناه و تاوانیگ  ، ك بیگومان ئیسه‌یش هه‌ر شوونه‌وار ئه‌و سیاسه‌ته‌یل شۆڤێنیه‌ هه‌ر مه‌ندگه‌و جاریگ  هه‌ر له‌ئه‌قڵ به‌عزه‌ وه‌رپرسیگ  ده‌رنه‌چیه‌و جى وه‌جیكارن له‌ ده‌سڵاتیش.

ئیسه‌یش هه‌ر خیزانه‌یل كورد فه‌یلى وه‌رده‌وام گه‌ردنه‌ ده‌زگایه‌یل حكوومه‌تا له‌وه‌ر خاتر هه‌وڵداین ئه‌را به‌رزه‌وكردن و لاوردن ئه‌و ده‌سگیریه‌ له‌بانیان و هاوردنه‌وه‌ى موڵكه‌یلیان ك ئه‌وسا زه‌فتكریا له‌لایه‌ن حكوومه‌ت به‌عسه‌وه‌ . بیگومان فره‌یگ  له‌خیزانه‌یل كورد بى ئومیدى گرته‌سه‌یان ئه‌وه‌نه‌ هاتوچوو دایره‌یل حكوومه‌ت كردنه‌و ئه‌وه‌نه‌ خه‌رج كردنه‌و ڕووژانه‌ خه‌ریك مراجعه‌كردنن وه‌لى بیهووده‌س . وه‌ل ئه‌وه‌یشا وه‌زعه‌گه‌ خاس نیه‌و عراق له‌ڕوى وه‌زع ئه‌منیه‌وه‌ سه‌قامگیر نیه‌و گشت ڕووژیگ  ته‌قینه‌وه‌ى فره‌یگ  رویده‌یگ  له‌ناوچه‌یل جوور وه‌جوور و بیجگه‌ ئه‌وه‌یش كورده‌یل فه‌یلى له‌ناوچه‌ى سه‌دریه‌ بوینه‌ قوربانى و ده‌سیان وه‌ شوناسنامه‌ى عراقى و كارت خوه‌راك (بتاقه‌ى ته‌موینى)خوه‌یان جویر باقى هاووڵاتیه‌یل نه‌ڕه‌سى.

یه‌یش كاره‌ساتیگ  تره‌ك چووگه‌ بان زه‌خمه‌یل تر كورده‌یل فه‌یلى ، له‌وه‌ختى كوشیه‌ن و خوینیان ڕشیه‌یگ  له‌ناو جاده‌و لاشه‌یان پارچه‌ پارچه‌ بووگ و بوونه‌ قوربانى ئه‌را ئى وڵاته‌ ك تائیسه‌ حكوومه‌ته‌گه‌ى شوناسنامه‌ى عراقیه‌ت خوه‌یان وه‌پیان نه‌یاگه‌و هه‌ر له‌مه‌ینه‌تى و خه‌میان زیاى ئه‌كا . یه‌یش له‌وه‌ختیگ  كورده‌یل فه‌یلى ڕوڵه‌ى ره‌سه‌ن ئى وڵاته‌نه‌و زیاتر له‌وانه‌ك ئیسه‌ دوینیمنه‌یان له‌پشت مێز نیشته‌نه‌و پۆسته‌یل گه‌ورا ها ده‌سیان و وازى وه‌چاره‌سه‌ر روڵه‌یل ئى وڵاته‌ كه‌ن.

وه‌ل ئه‌وه‌یشا قوربانیه‌یل تر له‌ كورده‌یل فه‌یلى بایه‌سه‌ له‌هویر نه‌چن ، له‌وانه‌ك گیان له‌ده‌سدان له‌ئه‌نجام كاره‌یل خراوه‌كارى جویر ته‌قینه‌وه‌ ك وڵات وه‌پیه‌وه‌ شه‌كه‌ت بوى ، ئه‌وانیش جویر باقى هاووڵاتیه‌یل له‌ى لایه‌نه‌وه‌ چاره‌نویسیان یه‌كیگ  بوى ، وه‌لى دوینید له‌لایه‌ن هه‌قه‌یله‌وه‌ جویر یه‌ك نین و هه‌قه‌یلیان پشتگووش خریه‌یگ  و جویر چینه‌یل تر كوومه‌ڵگا جواو داواكاریه‌یلیان نیه‌دریه‌یگه‌وه‌و هساو ئه‌ڕایان نیه‌كریه‌یگ  ، چوینكه‌ تائیسه‌یش به‌عزه‌ ده‌زگایگ  له‌ ده‌زگایه‌یل حكوومه‌ت هیمان هه‌ر له‌بان مه‌رجه‌یل رژیم وه‌رین چنه‌ ڕییه‌وه‌و كورده‌یل  فه‌یلى له‌فره‌چشت بیبه‌ش كردنه‌و دویریانه‌و خه‌ن و جویر هاووڵاتى ئى وڵاته‌ ته‌ماشا نیه‌كریه‌ن له‌لایه‌ن ئه‌وانه‌ك ئه‌قڵ شۆڤێنیه‌ت زاڵه‌ له‌بانیان و هیمان هه‌ر له‌خوه‌یانا به‌عس مه‌ندگه‌و حوكم له‌ده‌سى مه‌ندگه‌ ، هه‌ر له‌وه‌ر ئه‌وه‌یش حكوومه‌ت رمیاگ به‌عس دكتاتۆر و حكوومه‌ت تازه‌یش له‌عراق تازه‌ بڕیار عراقیه‌ت كورده‌یل فه‌یلى ده‌یگ  و نیه‌زانیم كه‌ى ئى زوڵمه‌ له‌بان چین كورده‌یل فه‌یلى لاوریه‌یگ  و وه‌وژدانه‌وه‌ نوڕنه‌ مه‌سه‌له‌ى كورد فه‌یلى؟