تاكه‌ى سه‌رمایه‌دارى سووكایه‌تى وه‌ ئاده‌میزاده‌یل ئه‌كا؟

شفق نيوز

 

ئاده‌میزادیش له‌سایه‌ى ئى مه‌سه‌له‌ هس وه‌ ئارامى و ئاسووده‌یى نه‌كردگه‌و هه‌قه‌یلى له‌ ئازادى و یه‌كسانى و دادگه‌رى وه‌ كرده‌وه‌ پشتگووش خریاگه‌و دروشمه‌یل هه‌ق ئاده‌میزاد بویه‌سه‌ ژیر سته‌م و سه‌ركوتكارى رژیمه‌یل سته‌مكار ، وه‌ جووریگ ك ئاده‌میزاد له‌یوا هس ئه‌كا گه‌ورایى خوه‌ى له‌ده‌س داگه‌و هه‌ق ئاده‌میزاد هویچ قه‌در و قیمه‌تیگ ئه‌راى نه‌مه‌ندگه‌، ك وه‌ ئاسانى له‌لایه‌ن ده‌سڵاته‌و خریه‌نه‌ ژیرپاو سوكایه‌تى وه‌پى كریه‌ید.

جى داخه‌ ئه‌وانه‌ك ئمڕوو بڕیار ها ده‌سیان، باس له‌ هه‌ق ئاده‌میزاد كه‌ن، وه‌لى له‌وه‌خت جیوه‌جیكردن درووه‌یلیان دیار و ئاشكراس وه‌ چه‌واشه‌ى ئه‌و گفت و قه‌وڵه‌یلیانه‌ ك دانه‌سه‌ى. ئنجا دوینید قانجا سه‌رمایه‌دارانه‌و كه‌ڵه‌كه‌بوین سامانه‌یلیان خستنه‌سه‌ بان گشت هه‌قه‌یل ئاده‌میزاد و ئابوورى و بازاڕ ئازادیش ئه‌را هه‌ڕین ئاده‌میزاده‌یل وه‌كار هاوردنه‌.

دى وه‌و جووره‌ نوڕید ناكووكى فره‌یگ خستنه‌سه‌ ره‌فتار دادگه‌رى و ده‌ستوور و یاساو جیاوازى فره‌یگیش دروس كرنه‌ له‌ناونى سه‌رمایه‌دارى و هه‌ق ئاده‌میزاد و ئى ناكوكیه‌یلیشه‌ ك سستم سه‌رمایه‌دارى ول پایه‌یل كوومه‌ڵگاى هاوچه‌رخ و ئازاد دیریده‌ى هووكار سه‌ره‌كى ناڕه‌زایى و خودنیشانداین شار و شاروچكه‌یل ئى جه‌هانه‌ بویه‌و كارگه‌ر و فه‌قیره‌یل وڵات ناڕه‌زایى خوه‌یان نیشاندانه‌ له‌ دژ سستم و ئابوورى بازاڕ ئازادو كارگه‌ره‌یل تویڕه‌یى نیشاندانه‌ له‌ فه‌لسه‌فه‌ى ئابوورى ئازاد سه‌رمایه‌دارى.

وه‌ل ئه‌وه‌یشا ئه‌گه‌ر ته‌ماشاى جه‌هان ژیر ده‌سڵات سه‌رمایه‌دارى ئمڕوو بكه‌یم، ئه‌و راسیه‌ ئه‌ڕامان ده‌ركه‌فید ك ئاده‌میزاد وه‌ك به‌نه‌یگ ده‌وڵه‌ت وه‌پى هاتگه‌ له‌سایه‌ى ئى سستمه‌ ك ده‌س گرته‌سه‌ بان ئابوورى جه‌هان.

ته‌نیا یه‌مانه‌سازییگ ك شایسته‌ى قه‌در و حورمه‌ت بوود وه‌ هه‌ق ئاده‌میزاد، ئه‌وه‌سه‌ ك ئاده‌میزاد ئاراسته‌ى حزمه‌ت و دووسایه‌تى وه‌ ئنسانیه‌ت بكا، چوینكه‌ له‌ناو ئه‌و هه‌مگه‌ مه‌ینه‌تى و ناكوكیه‌یل سستم سه‌رمایه‌داریه‌ بایه‌سه‌ كارگه‌ره‌یل و چین چه‌وسیاگ كوومه‌ڵگا گام وه‌ره‌و ئاڵشتكارى ئابوورى و سیاسى و فه‌رهه‌نگ ى بنه‌ن و له‌وه‌ بڕه‌سنه‌و ك سه‌رمایه‌دارى و سستمه‌گه‌ى جى ئومید و ئاره‌زوو ئه‌وان نییه‌.

ئازاد به‌كر

ج . أ