چه‌ویان ئاڵاگه‌ دوینیگ وه‌لى له‌هه‌ناى مه‌ردمه‌ فه‌قیره‌گه‌ى كوورن!

شفق نيوز

له‌خاك هه‌رێم كوردستان و له‌ڕوى ئداریه‌و سه‌ر وه‌ پاریزگاى دیاله‌س، ك هویچ وه‌ختى مه‌ردم ئى شار ئوخه‌ى له‌ساى خوه‌شى نه‌كردنه‌و له‌ژیر جه‌ور زوڵم و سته‌م وه‌ل تیه‌ڵى ژیانا رووژگار بردنه‌سه‌ سه‌ر.
دویاى ئازادبوین عراق له‌دكتاتۆریه‌ت، ئه‌وه‌ بوى مه‌ردم خانه‌قى ته‌ز خوه‌شییگ نیشته‌ گیانیان و چه‌وه‌ڕى ئه‌وه‌ بوین شاره‌گه‌یان دویاى ئه‌و هه‌مگه‌ كاولكاریه‌ ك هاته‌ تویشى بكریه‌یگه‌ نموونه‌ له‌جوانى و له‌وه‌رجه‌ گشت شاریگ ئاوه‌دانه‌و بوود، چوینكه‌ یه‌كه‌مجار شاریگ ته‌عریبكریاى و دویه‌میش سه‌ره‌ڕییگ ستراتیجیه‌و كاروانسه‌راو ده‌روازه‌یگ ناوده‌وڵه‌تیه‌ له‌ناونى هه‌ردوگ ده‌وڵه‌ت ئیران و عراق. وه‌لى له‌یوا دیاره‌ مالكى و هاوهویره‌یلى مه‌سه‌له‌ى گرنگیداین وه‌ى شاره‌ هویچ گرنگى یا ئه‌همیه‌تیگ له‌لایان نه‌یریگ و ته‌نیا هویر داگیركردن خاكه‌گه‌ى كریه‌یگ !
له‌یوا دیاره‌ ك هیمان پاى خراوه‌كاره‌یل و داخ له‌دڵه‌یل له‌و شاره‌ نه‌وڕیاگه‌و مه‌رام پیسیان ئه‌وه‌سه‌ ك هه‌میشه‌ ناكووكى و جیاوازى دروس بكه‌ن له‌ناونى كوردو عه‌ره‌ب، وه‌لى هویچ وه‌ختیگ خه‌وه‌یلیان نیایگه‌ دى و هه‌ر وه‌و داخه‌و مرن و خانه‌قینیش هه‌ر كوردستانى و شاریگ فه‌یلى نشینه‌و له‌گشت كوردستان قه‌درو حورمه‌ت تایبه‌تیگ دیریگ ، چوینكه‌ مه‌ردم خانه‌قى ئه‌و مه‌ردمانه‌ بوین ك له‌وه‌خت هه‌ڵوژاردنه‌یل به‌رزترین نسبه‌ى ده‌نگداین ئه‌را كورد داشتن له‌ كوردستان. هه‌ر له‌وه‌ر ئه‌وه‌یش حكوومه‌ت هه‌رێم ریز و حورمه‌ت له‌مه‌ردمه‌گه‌ى گرت و په‌یام سوپاسگوزارى ئه‌ڕایان كلكرد.
له‌یرا كه‌میگ باس ئه‌و بار گوزه‌ران و سه‌ختى ژیانه‌ كه‌م ك وه‌دیژى ساڵه‌یل فره‌یگ هاته‌ تویش ملله‌ت كورد وه‌تایبه‌ت ملله‌ت خانه‌قى، چوینكه‌ هه‌م جویر شیعه‌و هه‌م كوردو هه‌میش ناوچه‌یگ مه‌رزى، هه‌میشه‌ پیسترین زوڵم دینه‌سه‌ چه‌و، فره‌یگ  له‌ ڕوڵه‌یلى زینگ وه‌چاڵ كریان هه‌ر له‌ناو خاك خود خانه‌قى له‌وه‌خت رژیم به‌عس دكتاتۆر خریانه‌ قه‌ور وه‌جه‌م، بیجگه‌ ئه‌وه‌یش ته‌عریب و زه‌فتكردن ماڵ و موڵك و زه‌ویه‌یلیان مه‌سه‌له‌یگ تر بوى له‌ داگیركارى هه‌ق كورده‌یل خانه‌قى و تائیسه‌یش هویچ قه‌ره‌بوو یا ته‌عویزیگ وه‌پیان نه‌دریاگه‌. ك هه‌رچه‌نى له‌ى لایه‌نیشه‌و حكوومه‌ت هه‌رێم ئه‌و هه‌وڵ خاسه‌ نه‌یاگه‌ ئه‌را ئه‌و ملله‌ت سته‌مدیده‌، وه‌لى هه‌رچوینیگ بوود كورد هه‌ر باوان كورده‌و هه‌ر رووژیگ تیه‌یگ حكوومه‌ت كوردستانیش قه‌در ئه‌و به‌دبه‌ختى و ده‌روه‌ده‌رى كورد خانه‌قیه‌ بزانیگ و زه‌خمه‌یلیان ساڕیژ بكا. ئنجا حكوومه‌ت به‌غدا له‌جیاى ئه‌وه‌ك شوونه‌وار ئه‌و ته‌عریب و زوڵمه‌ نه‌یلیگ ، دوینید مه‌رامى ئه‌وه‌سه‌ هه‌مان كرده‌وه‌ په‌یڕه‌و بكاو دویر وه‌ دویر خوه‌ى حوكم ناوچه‌گه‌ بكا، هه‌ڵبه‌ته‌ یه‌یش نه‌ك له‌وه‌ر خاتر چه‌وه‌یل جوان مه‌ردمه‌گه‌ى، به‌ڵكوو له‌وه‌ر به‌رژه‌وه‌ندى خوسه‌و كینه‌ت خوه‌ى و هویر له‌ ئاینده‌ى خاكه‌گه‌ى كردگه‌و له‌یوا خه‌یاڵ ئه‌كا جاریگتر خاك خانه‌قى بووده‌ موڵك داگیركه‌ر و دكتاتۆر. هه‌ر له‌وه‌ر ئه‌وه‌یش نورى مالكى له‌شوون ئه‌وه‌ك چه‌ن كار وه‌ده‌سیگ هیزه‌یل ئاسایش و پۆلیس ك له‌ى دویاخره‌ سه‌ردان شار خانه‌قى كردنه‌و ئه‌وه‌ دینه‌ ك وه‌ته‌نیا ئاڵاى كوردستان له‌بان باڵه‌خانه‌یل حكوومى و ده‌زگایه‌یل ره‌سمى هه‌ڵدریاگه‌و ئه‌وانیش وه‌ختى چه‌ویان كه‌فته‌سه‌ ئاڵاگه‌ى كوردستان راپۆرتیگ ئه‌را نورى مالكى به‌رزه‌و كردنه‌و نورى مالكییش فه‌رمانیگ ئه‌را ده‌زگایه‌یل حكوومى شاره‌گه‌ ده‌ركردگه‌ ك ئاڵاى كوردستان له‌بان باڵه‌خانه‌یلیان ئه‌ڵگرن!
ئنجا له‌یرا خوسه‌و كینه‌ت دیار ده‌یگ ، چوینكه‌ وه‌رپرسه‌یل حكوومه‌ت مه‌ركه‌زى" چه‌ویان ئاڵاگه‌ دوینیگ وه‌لى له‌هه‌ناى مه‌ردمه‌ فه‌قیره‌گه‌ى كوورن". ئنجا ئایا ئه‌وان وه‌ چ ڕوییگه‌و فه‌رمان ده‌نه‌ ده‌زگایه‌یل ئه‌و شاره‌ ئاڵاى عراق به‌رزه‌و بكه‌ن و ئاڵاى كوردستان لاوریه‌یگ ؟ ملله‌ت ئه‌و شاره‌ وه‌ چ دڵخوه‌شییگ ته‌ماشاى ئه‌و ئاڵا بكه‌ن؟ چ خزمه‌تگوزارییگ ئه‌را شاره‌گه‌ پیشكه‌ش كردگه‌؟ دیاره‌ مالكى و حكوومه‌ته‌گه‌ى خه‌یاڵیان خاوه‌و هانه‌ ته‌ماى ئه‌وه‌ سیاسه‌تیگ تر جویر مه‌سه‌له‌ى بردن هیزه‌یل سه‌ربازى ئه‌را ناوچه‌گه‌ هویر له‌وه‌ كه‌ن زڵه‌و قه‌ڵبخوڕیگ تر دروس بكه‌ن، یا توان ئیراده‌ى خوه‌یان فه‌رز بكه‌نه‌ بان گشت ده‌سڵاتیگ و شه‌ن ئیمه‌ له‌ژیر هه‌واى ئه‌وان بكریه‌یگ و ئاڵاگه‌مانیش قه‌یه‌غه‌ بكه‌ن ك گوزارشه‌ له‌ خوه‌شه‌ویسى ملله‌تیگ ئه‌ڕاى و ئاڵاى كوردو كوردستانه‌و نیشانه‌ى زینگى نه‌ته‌وه‌گه‌مانه‌.