جادوگه‌ره‌يل له‌ ناوچه‌ێ سه‌وز

هادى  جله‌و مه‌رعى

شه‌فه‌ق نيوز/ ئه‌وسا و ئيسه‌يش وتيان خاس نيه‌ سه‌دام حسێن جادوگه‌ره‌يل له‌لاى خوه‌ى هاورده‌ كار له‌وه‌ر مقه‌يه‌تيكردن له‌ به‌رژه‌وه‌نديه‌يل ده‌سڵات، منيش ئيوشم ماقوڵ نيه‌ يه‌كيگ له‌ گه‌ورا وه‌رپرسه‌يل و له‌ زمه‌ت سه‌يد عه‌لى ك مادام خوڵكم كرد ئه‌را ميوانى بان خوان كه‌ڵه‌شيره‌ روومى جوور ئه‌وه‌گ عراقيه‌يل وه‌پى ئويشن "عه‌ليشيش". ئمجا يه‌كيگ له‌ گه‌ورا وه‌رپرسه‌يل سياسى له‌ ده‌وڵه‌ت له‌شوون ساڵ 2003 جادوگه‌ريگ سودانى وه‌كار هاوردياد. له‌ساڵ 1991 بڕيگ له‌ عه‌ره‌به‌يل گرده‌و بوين له‌ناو باڵه‌خانه‌ێ نه‌ته‌وه‌يل يه‌كگرتگ له‌ جاده‌ى ئه‌بى نوئاس له‌ كنار دجله‌و ناڕه‌زايه‌تى ده‌رخستن له‌بان بڕياره‌يل گه‌مارۆ ناوده‌وڵه‌تى ك له‌لايه‌ن ئه‌نجومه‌ن ئاسايشه‌و چه‌سپيا له‌ دژ به‌غدا له‌شوون هاوردنه‌وه‌ى كوه‌يت و هتاف كيشيان و وتيان:

 

له‌ سودانه‌و ده‌س ده‌يم وه‌پێد

ئه‌يه‌ ملله‌ت عه‌ره‌ب ره‌سه‌نه‌

گه‌مارۆ قه‌يرانه و نامينێد

ئه‌يه‌ ملله‌ت عه‌ره‌ب ره‌سه‌نه‌

 

له‌و وه‌خته‌يليشه‌ ته‌ها ياسين ره‌مه‌زان جيگر سه‌دام سه‌ردانيان كرد و سوپاسگوزارى له‌لىيان كرد و وته‌پيان گه‌مارۆ قه‌يران و نه‌مه‌ندن نيه‌، به‌ڵكوو به‌ڵايگه‌و مينێد و وه‌رده‌وام ئه‌دێ ئه‌را ماوه‌ى دريژيگ، ك بيگومان وه‌ڕاسى هه‌ر ئه‌وه‌يش روێدا و داوڕيان ناوده‌وڵه‌تى وه‌رده‌وام بوێ نا نه‌مه‌ندن رژيم و حوكم سه‌دام.

 

ناوچه‌ى سه‌وز مقه‌يه‌تيكرياێ جاريگتر خوه‌ى ده‌رخست و ئيجاريشه‌ له‌ڕێ جادوگه‌ره‌يليگ چالاكتر له‌وه‌ر ئاماده‌كارى ئه‌را هه‌ڵوژاردنه‌يل چه‌وه‌ڕيكرياێ ك بڕياره‌ له‌ مانگ مايۆ ئه‌نجام بگرێد.

 

جادوو جوور ئه‌وه‌گ باسى كرديم، له‌ عراق و له‌ ده‌وڵه‌ته‌يل عه‌ره‌بى بڵاوه‌و بويه‌و تاڕاده‌يگ بويه‌سه‌ هونه‌ريگ سه‌روه‌خوه‌ى و به‌شه‌يل داهێنان له‌تى وجوود ديرێد وه‌جووريگ ك نايه‌ده‌ خه‌ياڵ و قه‌ورسانه‌يليش جوور شوونه‌يليگ ئه‌را ده‌فنكردن سحره‌يليان وه‌كار ئه‌يه‌ريه‌ێد و ته‌نانه‌ت ئه‌ندامه‌يليگيش له‌ جه‌سه‌ێ مردگه‌يليش.

 

له‌ مسر كويه‌ن، جادوو كه‌شيگ ئايينى وه‌رگرتوێد و جادوگه‌ره‌يليش وه‌كارێ هاورديان له‌ په‌رسگايه‌يل و هه‌ناى ك فرعه‌ون كينه‌تدار مووسا بكا داوا له‌ جادوگه‌ره‌يلێ كرد له‌ڕوێى بووسيه‌ن، وه‌لێ جادوگه‌ره‌يل شكه‌ست هاوردن وه‌ ته‌مامى، چوينكه‌ گوچانه‌گه‌ێ مووسا جادوو نه‌وێ جوور حه‌بل كاهنه‌يل، به‌ڵكوو موجزه‌يگ بوى له‌ خوداوه‌ ئه‌را پشتگيرى هه‌ڵويست په‌يامبه‌ر.

 

له‌ بابليش دو فريشته‌ داوه‌زين، ك ئه‌وانيش هاروت و ماروت بوين، ك نازانم هووكار داوه‌زينيان چه‌ بوێ له‌ى باوه‌ته‌ له‌ خاك و جادوگه‌رى نيشان مه‌ردم ديان و جيايى وه‌پى خستيانه‌ ناونى ژن و هاوسه‌ره‌يليان. يه‌يش ره‌فتار بڕيگ له‌ سياسيه‌يلمان شيه‌و ئه‌كا، ئمجا جادوويش جوور هه‌ر چشتيگ تر ميراتيگ مه‌ردميه‌.

هادى جله‌و مه‌رعى