داعش و مالكى

شفق نيوز

سوپاى عراق وه‌بى ئه‌وه‌ك جه‌نگ خاسیگ بكا، شاره‌گه‌ هیشته‌جى ئه‌را داعش، ئمجا وه‌گووره‌ى قسه‌یل نوجێفى بیجگه‌ ئه‌وه‌ك سوپاو به‌غدا ئاگادار كردن له‌ شوون و هیز و مه‌رامه‌یل داعش، وه‌لى حكوومه‌ت به‌غدا نه‌ك هه‌ر كاردانه‌وه‌ى گونجیاگ نیشان نه‌یاگه‌، به‌ڵكوو وه‌بى هویچ وه‌رگریكردنیگیش شاره‌گه‌ چووڵ كردنه‌!

ئیمه‌ بایه‌سه‌ ئه‌وه‌ له‌ هویرمان بوود ك تونڕه‌وه‌یل ئسلامى سنى عه‌ره‌ب هیزن و له‌ناوچه‌یل عه‌ره‌ب سنى لایه‌نگرى دیرن. بیگومان ئه‌وه‌ك له‌یوا كردگه‌ ك رووژ وه‌ڕووژ ئى لایه‌نگریه‌ فیشتره‌و بوود ئه‌ویش سیاسه‌ته‌یل تایفه‌گه‌رى مالكیه‌.

هویچ چشتیگ له‌ نه‌وینه‌و دروس نادێ، وه‌لى ئه‌و گه‌مه‌ى مه‌ترسیداره‌ ك مالكى وه‌لیانا ئه‌كاده‌ى وه‌كارهاوردن داعشه‌ ئه‌را سه‌رچه‌مانن وه‌و هیز سنیه‌ ك له‌ناو پرووسه‌ى سیاسى عراق به‌شدارن و ئاماده‌ نین بانه‌ ژیر ده‌سڵاتى.

مالكى خوازیاره‌ وه‌پیان بویشید: بفه‌رمان ئه‌وه‌ هیز و تواناى ئیوه‌! ئه‌گه‌ر من نه‌وم داعش و تونڕه‌وه‌یل تووزدان به‌نه‌ ئاسمانا. هه‌ر وه‌و خاتریشه‌ به‌ون له‌لیم بلاڵكیه‌نه‌وه‌و بانه‌ ژیر ده‌سڵاتم ئه‌را ئه‌وه‌ك كلدانه‌و بكه‌م ئه‌را شاره‌یل خوه‌دان!.

ماناى ئه‌وه‌سه‌ مالكى ئه‌خوازید جه‌نگ سنى وه‌ سنى بكاو له‌ ئاكامیش خوه‌ى قانجاز بكا. گومانیش له‌تى نیه‌ ك ئه‌یه‌ په‌یوه‌ندى راسه‌وخۆ دیرید وه‌ ئاكام هه‌ڵوژاردنه‌یل و یه‌یش هه‌وڵیگ تر مالكیه‌ ئه‌را چه‌سپانن خول سێیه‌م ده‌سڵات خوه‌ى.

وه‌ دریژایى ساڵه‌یل گوزه‌یشت، ئه‌وه‌ك مالكى كرده‌سه‌ى، ئه‌ويش دروسكردن قه‌یرانه‌یل یه‌ك له‌شوون یه‌ك بویه‌ له‌وه‌ر خاتر دریژه‌داین وه‌ ده‌سڵات خوه‌ى، دى باوه‌ڕمان ئه‌وه‌سه‌ ئیجاریشه‌ چشتیگه‌ له‌و باوه‌ته‌، وه‌لى وه‌راسى ئه‌یه‌ گه‌مه‌كردنه‌ وه‌ ئاگریگ ك شایه‌ت گشت پرووسه‌ى سیاسى و بگر خود ده‌وڵه‌ت عراقیش بخاده‌ وه‌رده‌م شیویان و له‌یه‌كترازیان.

ئاسۆس هه‌ردى

ج . أ