گه‌وهه‌ره‌يل گرانقيمه‌ت له‌ساڵه‌يل خه‌بات وتێكۆشان

شفق نيوز

له‌دژ سياسه‌ته‌يل له‌ناوبردن وبێسه‌روشوون كردن له‌لايه‌ن حكوومه‌ته‌يل عێراقی وه‌گشتی و په‌لاماره‌يل له‌ناوبردن حزب به‌عس سته‌مكار له‌وه‌خت ده‌سڵاتداری وڵات.

 

له‌لايگيشه‌و به‌ش كوڵێگ له‌قسه‌یل هاوخه‌باته‌يلی وياره‌يلی له‌سه‌ركردايه‌تی كورد وه‌ل بارزانی له‌خوه‌ی گرتگه‌ ك باس له‌ ڕاسگويی و ڕه‌فتار ڕاشكاوانه‌ی وگه‌رمی ئه‌زموون ده‌وڵه‌مه‌نيان ئه‌كا وه‌دريژايی ئه‌و ساڵه‌يله، له‌ليان شايه‌تی سياسه‌تمه‌دار ناودار كورد مه‌حمود عوسمان ك له‌ پيشه‌كيه‌گه‌ی له‌ی كتاوه‌ وتگه‌: نزیكه‌ى 12 ساڵ یه‌كیگ له‌ سه‌ركرده‌یل پارت دیمۆكرات كوردستان و یه‌كیگ له‌وانه‌ بویه‌ ك له‌ نزیكه‌و ئه‌ڵس و بنیش وه‌ل بارزانى داشتگه‌و هه‌میش پزشكى بویه‌و جارجاریگیش كار هه‌ڵه‌وگه‌ردانن(وه‌رگیڕان) له‌ سه‌ردانه‌ىلی ئه‌را ده‌یشت وڵات و وه‌ل میوانه‌یلى له‌ ناوخوه‌ى وڵات ئه‌راى ئه‌نجام دیاد و له‌ لایه‌نه‌یل فه‌ره‌یگ له‌ ژیانى و هویر و هزر و باوه‌ڕه‌یلى ئاگا بویه. ‌

ناوبرياگ ديه‌ ك بارزانى نه‌مر له‌ ره‌فتارى وه‌ل كه‌سه‌یل تر و له‌ خواردنى و جنگ له‌وه‌ر كردنى و ژیانى وه‌شیوه‌ى گشتى فه‌ره‌ ساده‌ و خاكى بويه‌ و هه‌میشه‌ جوور هه‌ر تاكیگ كومه‌ڵگا وه‌ل سه‌رجه‌م چین و تویژه‌یل نه‌ته‌وه‌گه‌ى وه‌بى جیاوازى دیدار و گفتوگوو كردگه‌و هه‌رگز وه‌خاتر هویر سیاسى یا لایه‌نگرى حزبى و ئاست كومه‌ڵایه‌تى دوچه‌وه‌كى له‌ ناونییان نه‌كردگه‌و ئاماژه‌ وه‌ی وته‌يه‌ داس: "لایه‌نگرى حزبى چوارچیوه‌ى ته‌نگیگه‌ وه‌لى كوردایه‌تى چوارچیوه‌ى وه‌ربڵاویگه".‌‌

وه‌خاتر ملله‌ته‌گه‌ى خه‌بات كردیاد و جوور تاكه‌یل تر كومه‌ڵگاى كورده‌وارى، ساڵیان فره‌ێگ ره‌نج و مه‌ینه‌ت كیشا و دژایه‌تى ملله‌ته‌یل و نه‌ته‌وه‌یل و ئاینه‌یل تر نه‌كردیاد و هه‌میش خوازیار هاوكارى و برایه‌تى و ژیان هاوبه‌ش وه‌ل ملله‌ته‌یل تر بوى و باوه‌ڕ وه‌ماف ره‌واى گشت نه‌ته‌وه‌یل تر داشت و هه‌میشه‌ ئه‌را یه‌كسانى و دادپه‌روه‌رى و دو چه‌وه‌كى نه‌كردن ته‌قالا كردیاد و ئى تایبه‌تمه‌ندیه‌یله‌ له‌ ژیان رووژانه‌ى و له‌ وته‌یل و له‌ دیمانه‌یلى وه‌ل ده‌زگایه‌یل ره‌سانن ره‌نگ دیاده‌و و هه‌ر وه‌ى خاتره‌ بویه‌ جى متمانه‌ى ملله‌ت عراق وه‌گشتى و نه‌خش به‌رجه‌سته‌یگ له‌ سه‌رجه‌م رویداگه‌یل ئى وڵاته‌ داشت.

ئاماژه‌يش وه‌ ئه‌وه‌ كردگه‌: بارزانى ئنسانیگ واقعبین بوى و راسییه‌یل جوور خوه‌یان دوینیاد و له‌ هه‌ڵسه‌نگانن كاروبار و رویداگه‌یل، موزایه‌ده‌ نه‌كردیاد و هه‌رگز نه‌ خوه‌ى له‌ دوژمن وه‌هێزتر زانستیاد و نه‌یش دوژمن وه‌ده‌س كه‌م گردیاد، حه‌ساو ئه‌را دوژمن كردیاد وه‌لى هه‌رگز ترس و رخ له‌ دڵ نه‌یاشت. و له‌ سه‌ركه‌فتنه‌یل بوغرا نه‌وى و له‌ شكسته‌یلیش نائومید نه‌وى و هه‌رگز قه‌بول نه‌كرد كه‌سیگ له‌ وه‌راوه‌ر خوه‌ى مه‌دحى بكردیاد یا چه‌پڵه‌ ئه‌راى بكوتیاد. ئه‌زموونه‌یل فه‌ره‌یگ له‌ ژیان خوه‌ى داشت و له‌ وێسگه‌یل سه‌خت و پڕ له‌ مه‌ترسى گوزه‌یشت و یه‌یش ده‌سمه‌یه‌تى دا تا له‌ هه‌ر بارودوخیگ دژوار بتویه‌نێ ئه‌رك سه‌ركرده‌یى خوه‌ى وه‌جى بارێد و كاروبار ملله‌ته‌گه‌ى وه‌خاسترین شیوه‌ بوه‌ێده‌ ڕێ... و (محمود عوسمان) باسه‌گه‌ی كوڵه‌و كردگه‌و نويساگه‌: ئیمه‌ نیاز دیریم سه‌رله‌نوو چه‌وێگ گڕ بیه‌یم و بنووڕیمنه‌گوزه‌یشته‌ى خوه‌مان و سه‌ركه‌فتنه‌یل و نوشسته‌یلمان جوور خوه‌یان بوینیم و وه‌شیوه‌ى باوه‌تیانه‌و رخنه‌گرانه‌ له‌یه‌كیانه‌و بیه‌یم و ده‌رس عبره‌ت له‌لیان بگریم و ئه‌را ئمڕوو و ئاینده‌ى خوه‌مان سوود له‌لیان بوه‌یم و لایه‌نه‌یل ئه‌رێنییان ده‌سنیشان بكه‌یم و وه‌ره‌و نوایان بوه‌یم و خوه‌مانیش دویره‌و بخه‌یم له‌ دواره‌ كردن هه‌ڵه‌یل گوزه‌یشته‌مان. له‌هویرمانیش نه‌چوود ده‌سكه‌فته‌یل ئمڕووى ملله‌ته‌گه‌مان وه‌قوروانى داین و فداكارى و خوین پاك شه‌هیده‌یلمان هاتنه‌سه‌ ده‌س و بایه‌د وه‌هه‌ر قیمه‌تیگ بویه‌ ئه‌و ده‌سكه‌فته‌یله‌ بپارێزیم و ده‌سكه‌فته‌یل تر وه‌پییان زیاێ بكه‌یم.

 

له‌پێشه‌كيه‌گه‌ی د. گوڵموراد مورادييش ك نيشته‌جای ئه‌ڵمانيای فيدراڵيه‌ له‌ی كتاوه‌ هاتگه‌: یه‌كێگ له‌ وته‌یل فره‌ وه‌نرخ قاره‌مان ملله‌ت كورد(جنراڵ بارزانی) له‌ێره‌، ئه‌وه‌سه‌ ك وتگه‌: "دڵنیام ك سه‌ركه‌فیمن، وه‌لى له‌و ڕووژه‌ ترسم ك  ئه‌وانه‌گ زه‌حمه‌ت كیشانه‌و خه‌بات كردنه‌ له‌هویره‌و بچن".

وه‌ دريژه‌ ئه‌ياده‌ باسه‌گه‌ی و ئويشێ: من نیه‌ویشم خائینه‌یل، به‌ڵكم كه‌سه‌یل به‌رژه‌وه‌ندیخوازیگ له‌ ناو گشت ملله‌تیگ وجود داشتنه‌ و دێرن ك ته‌قالا كه‌ن كه‌سایه‌تییه‌یل ناودار بوه‌نه‌ ژێر پرسیار، یا وه‌خاتر مقه‌یه‌تی كردن له‌ به‌رژوه‌ندییه‌یل خوه‌یان، تومه‌ت وارانیان بكه‌ن و دروو ئه‌را ئی قاره‌مانه‌یله‌ هه‌ڵوه‌سن و...هتد. وه‌لی رووڵه‌یل راسكانی و وه‌فادار ملله‌ت كورد، فداكاری و قوروانی داین كه‌سێگ ك ئی رسته‌یله‌ وتێه‌: "من دۆشمن عه‌ره‌ب نیم و داواێ زه‌وی و زار له‌لیان نیه‌كه‌م، من داواێ هه‌قه‌یل ملله‌ته‌گه‌م كه‌م" یا " من سه‌رۆك كه‌س نیم و داوای سه‌رۆكایه‌تییش نیه‌كه‌م، توام برادان بووم و خزمه‌ت وه‌پیدان بكه‌م و له‌ ئیوه‌یش توام، براێ من بوین و وه‌لما هاوكاری بكه‌ین تا دویر له‌ خوه‌ێ په‌رستی و ته‌ما، خزمه‌ت وه‌ ملله‌ته‌گه‌مان بكه‌یم." یا وتێه‌:" له‌لاى ئنسان دو چشت گرنگ و سه‌ینه‌ ك ئه‌وه‌یش شه‌ره‌ف و ژیانه‌؛ ئمجا یا ئه‌وه‌سه‌  ك ژیان خوه‌ى كه‌ێده‌ قوربانى شه‌ره‌فى  یا شه‌ره‌ف خوه‌ى كه‌ێده‌ قوربانى ژیانى، من وه‌پیم خوه‌شه‌ ك  ژیان خوه‌م بكه‌مه‌ قوربانى شه‌ره‌فم، له‌وه‌ر ئه‌وه‌گ ژیانم كووتایى وه‌پى تیه‌ى وه‌لى شه‌ره‌ف هه‌رگیز نیه‌مرێ، شه‌ره‌ف منیش ملله‌ت كورده‌".

 

گه‌وهه‌ره‌يل گرانقيمه‌ت.. ئه‌را دڵه‌يل شكياگ

 

له‌ژێر ئی ناونيشانيشه وته‌ی نويسه‌ر چالاك كورد علی حسێن فه‌يلی هاتگه‌، ك باس مێژوو پرشنگدار هه‌ڵوێسته‌يل نه‌مر وبه‌رز باوگ ڕوحی كورد مه‌لا مسته‌فا بارزانی كردگه‌ ونويساس: ئه‌و وه‌خته‌ ك زووان ده‌م به‌سێ و هویر له‌ باڵه‌وگرتن شه‌كه‌ته‌ و چاو له‌ نووڕستن شه‌رم ئه‌كا، ئمجا تاریخ تویه‌نێ بووده‌ هانا ڕه‌سێَگ  خاس!

له‌ غوربه‌ت مناڵى و ئاواره‌ بوین ، نه‌ یه‌ك جار به‌ڵكم فره‌ جار، نه‌ وه‌ناو خوه‌مان، به‌ڵكه‌م وه‌ناو كه‌سێگ  رێ كوردایه‌تى نیشانمان دا، ناومان ئه‌هاوردن بى ئه‌وه‌ ك بزانم ئه‌را مه‌ردم بیگانه‌ چنه‌ بانگمان ئه‌كردن؟!

وله‌وتاره‌گه‌ی نيشان ئه‌ياد ك: سه‌خته‌ وه‌زووانيگ ساده‌و ئاسان بخوازيم باس كه‌سايه‌تييگ گه‌وراو ژيان و خه‌باتی بكه‌يمن. وه‌لی پرسيار ئه‌كا ك: نازانم ئى ئه‌ڵكه‌فته‌ چوینه‌ ك ئه‌راى هه‌ر ساڵیگ ژیان بارزانى ئنسان ناچار بكریه‌یگ له‌ى نویسریاگه‌ جمله‌(ڕسته‌)یگ له‌ گه‌وهه‌ره‌یل حكمه‌ت و په‌نده‌یل گران قیمه‌تى ئه‌ڵوژنێ؟ . ناوبرياگ له‌پيشه‌كيه‌گه‌ی نويساس: ئه‌گه‌ر ئمڕوو هه‌م ئاهـ نوو ئه‌و قسیه‌یله‌ شه‌ن و كه‌و بكه‌یمن، دیار ئه‌دا ك گشت ژیانى حكمه‌ت و په‌ند گران قه‌دره‌.

وه‌شانازييشه‌و ئويشێ: ئمجا نه‌ وه‌ ئه‌مر حزبى و  نه‌ له‌وه‌ر خاتر نه‌ف یا به‌رژه‌وه‌ندى، به‌ڵكه‌م ئه‌راى دڵ خوه‌مان و خوه‌شى ملله‌ت خوه‌مان، كه‌م له‌ فره‌ى ئى قسیه‌یله‌ ئه‌ڵه‌وگه‌ردانیمنه‌، تا هه‌م بویشیمن ك ئیمه‌ زینگیمن و هه‌م بویشیمن ئیمه‌ وه‌ شیوه‌زار خوه‌مان ڕابه‌ر خوه‌مان و گشت ملله‌ت كورد كه‌یمنه‌و سه‌ر. وئويشێديش: خوازن باوه‌ڕ بكه‌ن یا نه‌كه‌ن، جاێڵ و جوانێگ ئى فكر و هویره‌ ئیوه‌ت كردگه‌ و ئى ته‌رجومه‌ پیشكه‌ش وه‌ گشتمان كردگه‌،ك له‌ شووڕش بارزانى هیمان په‌یا نه‌بیه‌ و  شه‌ره‌ف ئه‌ڵگرتن تفه‌نگ كوردایه‌تى وه‌ نسیوى نه‌بیه‌، وه‌لى نوێنه‌رایه‌تى جیل و باوه‌ڕیگ ئه‌كا ك بارزانى  وه‌ڕابه‌ر خوه‌یان ئه‌زانن، وه‌ باوه‌ڕم ئه‌خوازێ بخاده‌ هویر گشتمان ك ڕابه‌ره‌یل هانه‌ ناو دڵ ملله‌ت خوه‌یان و هانه‌ ناو وژدانه‌یل زینگ. زياتريش نويساس: جیل ئمڕوو كورد، ئه‌گه‌ر له‌ فره‌ چشت یاخى بویه‌، هیمان باوگ ڕووحى خوه‌ى خاس ناسێ و هیمانیش شانازى وه‌ ڕابه‌ر خوه‌ى ئه‌كا، بیلا له‌ى ده‌رسه‌ په‌ند بوه‌یمن و ته‌نیا باس ئه‌وه‌ نه‌كه‌یمن ك ڕابه‌ره‌یلمان چه‌ ئه‌رامان كردن و بویشیمن ئیمه‌ چوین یاد ئه‌وان كردیمن؟.

 

داڵ

 

ئی كار وشه‌كه‌تيه‌ ده‌سپێشخه‌ری جوانيگ بوی ك لاپه‌ڕه‌ی مێژوو كورد دايه‌كاو شنه‌ی مانايل ڕه‌سه‌ن وته‌يل بارزانی نه‌مر له‌تی هه‌ڵوژان وباس مه‌مه‌ره‌يل ئه‌نجامداين ئی كاره‌ له‌كتاوه‌گه‌ی كردگه‌و نويساس: جوور جوانیگ له‌‌ سه‌‌ره‌‌تاى جوانیمه‌‌و، هویرم مینه‌‌ى ناسنامه‌‌ كردیاد و پرسیاره‌‌یل فره‌‌یگ له‌‌تى نه‌‌خش به‌‌سا، ئه‌‌را په‌‌یاكردن جوواو ئه‌‌و پرسیاره‌‌یله‌‌ هانا ئه‌‌را سه‌‌رچه‌وه‌‌یل فره‌‌یگ بردم، گشت سه‌‌رچه‌وه‌‌گان‌ ئاماژه‌‌ وه‌‌ ناو كه‌‌سیگ وه‌‌ ناو(بارزانى) كردیان، له‌‌شوون ئه‌‌وه‌‌ ك جوواو پرسیاره‌‌گانم په‌‌یا كردم ته‌‌نیا پرسیار بى جوواویگ ك له‌‌لام مه‌‌ن ئه‌‌وه‌‌ بوى ك(مسته‌‌فا بارزانى) كییه‌‌!؟.

له‌‌ شوون چه‌ن ساڵیگ و له‌‌ دویاى خوه‌‌نستن و هویره‌‌و كردن فره‌‌یگ له‌‌باره‌‌ى ئه‌‌و پرسیاره‌‌ ته‌‌نیا جوواویگ ك دیمه‌‌سه‌‌وه‌‌ی ئه‌‌وه‌‌سه‌‌: بارزانى نه‌‌مر ئه‌‌و داڵه‌سه‌‌ ك وه‌‌ چنگه‌یل تیژ خوه‌‌ى فكره‌‌یلیگ ئازاد كرد ك ساڵه‌‌یل فره‌‌یگ له‌‌ ناو زندان تیه‌‌ریكى دیل كریاوین، بارزانى ئه‌‌و خوه‌‌ره‌‌سه‌ ك وه‌‌ گه‌‌رماى خوه‌ى یه‌‌خه‌‌یلیگ‌ تاوانه‌‌و ك ئازادى ملله‌‌تیگ رچگانوین. بارزانى ئه‌‌و خوه‌‌ره‌‌سه‌ ك وه‌‌ پاكى لیسكه‌یلى ناپاكییه‌‌یل داگیركارى و زوڵم و زوور نیشتمانه‌‌گه‌‌م سڕیه‌‌و، بارزانى ئه‌‌و خوه‌‌ر نه‌‌مره‌‌سه‌‌ ك هویچ وه‌‌خت ئاوا نیه‌‌ود..!. ته‌‌نیا به‌‌ڵگه‌‌یش ئه‌‌را ئسبات قسه‌‌گانم، لاپه‌ڕه‌‌یل زه‌‌ڕین مێژوو نوو ملله‌‌ته‌‌گه‌‌مه‌‌.  ‌

ئاراس جواد دانه‌ر كتاوه‌گه‌، باس بيرۆكه‌و شيوه‌ێ نويسانن كتاوه‌گه كردگه‌و نويساس: جوور ئه‌ركیگ نه‌ته‌وه‌یى و وه‌‌فادارییگ ئه‌‌را خه‌‌بات و قوروانى داین بارزانى نه‌‌مر و خزمه‌‌تیگ ئه‌‌را ملله‌‌ته‌‌گه‌‌م، بڕیار دام ژماره‌‌یگ له‌‌ وته‌‌یل نرخدار و ئامووژگاریه‌‌یل باوگ روحى نه‌ته‌وه‌ى كورد جه‌‌مه‌‌و بكه‌‌م و هه‌‌ڵیانه‌‌و بگردنم ئه‌‌را شیوه‌‌زووان كوردى باشوور(فه‌‌یلى) و زووانه‌‌یل عه‌‌ره‌‌بى و فارسى و‌ له‌‌ مێژوو شیوه‌‌زووان كوردى باشوور(فه‌‌یلى)، ئى كاره‌‌ یه‌‌كه‌‌مین به‌‌رهه‌‌مه‌‌ ك له‌‌باره‌‌ی بارزانى نه‌‌مر نویسیاس.

 

ئيمه‌يش ئويشيم:


ئویشیم ئی ده‌سكه‌فته‌ نیشانه‌ یا یاره‌نگدانه‌وه‌ی نووڕستن و دیدیگ تیژه‌ ئه‌را راسی رووشنهویری كوردی و هه‌میش جوور رووشناییگه‌ له‌ رێ زاراوه‌ی كوردى باشوور(فه‌یلی) ك مه‌ردم ناوچه‌یل فه‌ره‌یگ له‌ ئیران و عراق وه‌پی قسه‌ كه‌ن. بیجگه‌ ئه‌وه‌یش هوكاریگه‌ ئه‌را هانداین ئه‌وانه‌گ وه‌ی زاراوه‌ قسه‌ كه‌ن ك ته‌قالا بكه‌ن وه‌زاراوه‌ی خوه‌یان ئه‌و زوور و سته‌مه‌ ك له‌ لیان كریاس بخه‌نه‌ روی و هه‌میش جووریگه‌ له‌ وه‌فاداری ئه‌را سه‌ركرده‌ی گه‌ورای كورد ك له‌رێ هه‌ڵه‌وگه‌ردانن قسه‌ و وته‌ وه‌نرخه‌گانی و ئه‌زموون و وشه‌گانی و پێشكه‌ش كردنى وه‌ی زاراوه‌ ك یه‌یش دو شانازی وه‌ل یه‌كا تێكه‌ڵ ئه‌كا ئه‌ویش (زاراوه‌یگ زینگ و مێژوویگ پڕ له‌ شانازی)ه‌ تا باوه‌ت ده‌وڵه‌مه‌نیگ له‌ داستان ملله‌تیگ به‌رجه‌سته‌ بكا ك وه‌گشت شێواز و له‌ گشت ئاستیگ ئه‌را مافه‌یلی ته‌قالا و زامه‌ت كیشاس.

بارزانی نه‌مر یادگاریه‌یل خوه‌ش و شيرینیگ ئه‌را ملله‌ته‌گه‌ی هیشتگه‌سه‌جی ك چه‌مكه‌یل ژیانی كاریگه‌ری فراوانیگ له‌ ناخ ملله‌ته‌گه‌ی داشتگه‌و ریشگ كوتاسه‌ ده‌روینی و هه‌ر وه‌یخاتره‌ نه‌بایه‌د سه‌رمان سڕ بمینێ له‌ هه‌ڵوێسته‌یل بێ وینه‌ی ئی كه‌ڵه‌پیاوه‌ ك له‌ 14ی ئادار 1903 له‌ ئاوای بارزانی له‌ داڵگبویه‌ و له‌ ساڵ 1919 ژیان و دار و نه‌دار خوه‌ی ئه‌را كێشه‌ی ره‌وای ملله‌ته‌گه‌ی ته‌رخان كردیه‌ وه‌ختیگ ده‌س كردیه‌سه‌ خه‌باتیگ بێ وچان ئه‌را ئازادى ملله‌ته‌گه‌ی و له‌ زورم شۆڕش و ڕاپه‌ڕینه‌یل ملله‌ت كورد به‌شداری كردیه‌ تا له‌ ساڵ 1979 كووچ دویایین كردیه‌ و هه‌میشه‌ پیشه‌نگ و سه‌رمه‌شق و نموونه‌ و رێ رووشنكه‌ره‌وه‌ ئه‌را جوانه‌یل كورد بویه‌.

 

 

وه‌سيه‌تنامه‌

 

عه‌بدولڕه‌حمان شه‌ره‌فكه‌ندى ناسریاگ وه‌ هه‌ژار شاعر وه‌سیه‌تنامه‌گه‌ى له‌ساڵ 1984 له‌ئاوایی سلیڤان نویساس ك له‌تی هاتگه‌: وه‌سیه‌ت كه‌م ئه‌را ئه‌و كه‌سه‌یله‌گ دووس و نزیكمن: ئه‌گه‌ر وه‌پیان بكریه‌ێ، وه‌ختایگ مردم لاشه‌گه‌م له‌ ژویه‌ر مه‌زار مه‌لا مسته‌فاى بارزانى خاك بكه‌ن یا لان كه‌م له‌و قه‌ورسانه‌خاكم بكه‌ن ك ئه‌و له‌تى وه‌خاك سپاریاگه‌. له‌وانه‌یش ك دووس و نزیك بارزانین و له‌ شوونى مه‌ننه‌سه‌جى ڕجا كه‌م: ئیجازه‌ بیه‌ن ك قه‌ورم له‌ قه‌ور مسته‌فاى بارزانى تا ئه‌وره‌گ ئه‌كریه‌ێ دویر نه‌ود. تا وه‌و جووره‌گ له‌ دنیا دڵخوه‌شى و شانازیم ته‌ماشا كردن و نزیك بوین له‌ ئه‌و بوى، لاشه‌گه‌میش نزیك وه‌ته‌رم پیرۆز ئه‌و بوود و ئه‌گه‌ر خودا كرد و له‌ساێ ئازاد بوین كورد ته‌رمه‌گه‌ى ئه‌را بارزان بردنه‌و، چشتیگ له‌ سقان منیش بووه‌ن و له‌ خوار پاى ئه‌و خاكى بكه‌ن.

 

بێ گومان ئی ئارزووه‌ نيشانده‌ر خوه‌شه‌ويستی گه‌ورای ڕووڵه‌يل ملله‌ت كورده‌ ئه‌را سه‌ركرده‌ی گه‌ورا و باوگ ڕوحييان ك سه‌ركردايه‌تی كه‌شتيه‌گه‌يان كرد ئه‌را كه‌ناره‌يل ئازادی وكه‌رامه‌ت و وه‌ده‌سهاوردن هه‌قه‌يليان. و ئه‌وه‌گ هه‌ميشه‌ دواره‌يه‌و كردياد له‌وه‌ختيگ ك له‌ شانيه‌ت وكرامه‌ت ملله‌ته‌گه‌ی به‌رزه‌و بوياد، وتياد: "ئنسانیه‌ت ڕاسكانی ئه‌وه‌سه‌ ك خوه‌شى خوه‌د بكه‌یده‌ قوربانى ناخوه‌شى هه‌ژاره‌یل"، "ئامانجم ئاشتیه‌ وه‌ل حكوومه‌ت عێراق وه‌ مه‌رجیگ كورد وه‌ژیر ده‌سه‌یى نه‌مینیده‌ى"، "شانازى وه‌ كه‌سیگ ئه‌كریه‌ێد ك ئه‌را ملله‌ته‌گه‌ێ خه‌بات بكا"، كوردستان نیشتمان گشت نه‌ته‌وه‌و ئاینه‌یل جیاوازه‌" . سه‌ڵاميگ له‌ سيمبول وه‌فاداری و هه‌ڵوێست.. ((باسه‌گه‌ دريژه‌ ديرێ))..

 

 

عه‌بدولحاج حمود ئه‌لكنانی

 

ا. ج