مه‌رامه‌يل شارياگ

شفق نيوز

جوور ئه‌وه‌ك پيشبينى ئه‌كريه‌يد حزبه‌يل بيجگه‌ پارتى وه‌شيوه‌يگ له‌ شيوه‌يل خه‌ريكن هه‌ڵويستيان يه‌ك بخه‌ن سه‌باره‌ت وه‌و مه‌سه‌له‌و تاڕاده‌يگيش ره‌سينه‌سه‌ قه‌ناعه‌ت ك بايه‌سه‌ ئى سيستم ئيسه‌ وه‌ى شيوه‌ نه‌ود، ئمجا هه‌رچه‌نى بايه‌سه‌ ئه‌و راسييشه‌ بويشيم ك وه‌گووره‌ى ره‌شنويس ئه‌و ده‌ستووره‌ ك چه‌ن ساڵيگه‌ ئمزا كرياگه‌و وه‌گووره‌ى مادده‌ى(1) وه‌ ئاشكرا ئويشيد ك (سيستمه‌ سياسيه‌گه‌ى په‌رله‌مانى، كۆمارى و ديموكراسيه‌و پشت وه‌ فريه‌لايه‌نى سياسى و بنه‌ماى له‌يه‌كجياكردنه‌وه‌ى ده‌سڵاته‌يل و ده‌سوه‌ده‌سكردن ئاشتيخوازانه‌ى ده‌سڵات له‌ڕى هه‌ڵوژاردن گشتى راسه‌وخۆ نهێنى و ده‌وريه‌و به‌سيد).

مه‌هانه‌ى فريه‌ گرينگ ئى حزبه‌يله‌ له‌لايه‌ن خوه‌يانه‌و ئه‌وه‌سه‌ ك ده‌سڵاته‌يل سه‌رۆك فريه‌ن و بايه‌سه‌ كه‌مه‌و بكريه‌يد، چوينكه‌ وه‌گووره‌ى باوه‌ڕ ئه‌وان ئه‌و جووره‌ ده‌سڵاته‌يله‌ وه‌هساو ئه‌وان وڵات وه‌ره‌و ديكتاتۆريه‌ت به‌يد، ك ئه‌ويش هه‌ر وه‌گووره‌ى ئه‌و مادده‌و بڕگه‌يل خود پرووژه‌ى ده‌ستوور له‌يوا نيه‌، چوينكه‌ ده‌سڵات فريه‌يگ وه‌ په‌رله‌مان درياگه‌، ته‌نانه‌ت قه‌رله‌مان ئه‌تويه‌نيد وه‌ 2 له‌بان 3ى ده‌نگ ئه‌ندامه‌يلى متمانه‌ له‌ سه‌رۆك وه‌ربگريد.

ماناى ئه‌وه‌سه‌ مه‌رام ئى حزبه‌يله‌و ميدياى ئازاد چه‌س ك وه‌و شيوه‌ ئه‌را ماوه‌يگه‌ گڕ گرتگه‌و ئوقره‌ له‌لى برياگه‌. دى كوردستان و هه‌رێمه‌گه‌يشى يه‌كه‌مين وڵات نيه‌ له‌ جه‌هان ك سيستم سه‌رۆكايه‌تى په‌يڕه‌و بكا. ئه‌وه‌سه‌ وڵاته‌يل گه‌وراهيز جوور ئه‌مريكاو فره‌نساو..هتد ئه‌و سيستمه‌ ئه‌يه‌رنه‌ كار و تائيسه‌يش له‌و وڵاته‌يله‌ نه‌ك هه‌ر ديكتاتۆريه‌ت دروس نه‌ويه‌، به‌ڵكوو فريه‌يش وه‌ره‌و پيشكه‌فتن و ديموكراسى گام ناگه‌.

ئه‌گه‌ر مه‌هانه‌ى ئه‌وه‌ بدێ ك سيستم سياسى وڵات عراق په‌رله‌مانيه‌و نادێ له‌ هه‌رێم سه‌رۆكايه‌تى بدێ، ئويشيم راسه‌ سيستمه‌گه‌ له‌ عراق په‌رله‌مانيه‌، وه‌لى وه‌ كردار مه‌رجه‌عيه‌. مه‌گه‌ر ئه‌وه‌ نيه‌ بڕياره‌يل ريزدار سه‌يد عه‌لى سيستانى نه‌ك هه‌ر ها له‌بان په‌رله‌مان، به‌ڵكوو ها بان برياره‌يل حكومه‌تيشه‌و.

ئه‌وه‌سه‌ وه‌بريار ريزداريان حه‌شد شه‌عبى دامه‌زرياو نه‌ په‌رله‌مان ئاگاى له‌لى بوى و نه‌يش ده‌سڵات داشت قسه‌يگ بكا. له‌ناوڕاس ساڵه‌يل نه‌وه‌ديش نه‌ياره‌يل كورد ك ئه‌ويش هه‌ر له‌بان داواى لايه‌نيگ ده‌ره‌كى بوى فريه‌ هه‌وڵدان ك نه‌يلن په‌رله‌مان كوردستان وه‌رده‌وام بدێ، ئه‌ويش وه‌و مه‌هانه‌ ك په‌رله‌مان ئيكسپايه‌ر بويه‌!! وه‌لى خوه‌شبه‌ختانه‌ ئه‌و پيلانه‌ سه‌ر نه‌گرت و ئه‌و هه‌وڵه‌ وه‌ هيمه‌ت نيشتمانپه‌روه‌ره‌يل هه‌ر زوى نريا قه‌ور.

ئيمه‌ له‌يوا ته‌ماشاى ئه‌كه‌يم ك مه‌سه‌له‌گه‌ سيستم سياسى نه‌دێ، به‌ڵكوو بريگ لايه‌ن هه‌ر وه‌ مه‌سه‌له‌ى وجوود سه‌رۆك له‌وڵات ناڕه‌حت بوون، ك هه‌ر وه‌و خاتريشه‌ ئه‌خوازن له‌ژير چه‌تر هه‌ر مه‌هانه‌يگ بوود سه‌رۆك و سه‌رۆكايه‌تى له‌ وڵاتمان نه‌يلن و وڵات وه‌بى سه‌رۆك بيلنه‌جى، ئمجا هه‌رچه‌نى گشت ئه‌و هه‌مگه‌ راسييشه‌ زانن ك ئه‌و وڵاته‌يليشه‌ كه‌م نين ك وه‌ وجوود سه‌رۆك له‌ كوردستان و هه‌رێمه‌گه‌ى نه‌ك ته‌نيا خوه‌شاڵ نين، به‌ڵكوو وه‌گشت توانايان ئه‌خوازن كورد بى سه‌رۆك و بى سه‌رپه‌رش بدێ، هه‌ر له‌وه‌ر ئه‌وه‌يش بايه‌سه‌ مه‌ردم قوربانيده‌ر هه‌رێم كوردستان له‌و پيلانه‌ ئاگادار بوون و نه‌يلن له‌بانيان گوزه‌ر بكا.

سه‌لام عه‌بدوڵڵا

ج . أ