له‌ناونى عراق و مالاوى!!

شفق نيوز

 

كه‌فتنه‌وه‌ى سه‌دان هه‌زار كه‌س له‌ناونى شه‌هید و زه‌خمدار و بیسه‌روشوون و كووچبه‌ر له‌وه‌رانوه‌ر سه‌دان هه‌زار تر له‌ یه‌تیم و بیوه‌ژن و بیكه‌س و نه‌وین ئاسایش و به‌رزه‌وبوین شماره‌ى میلیشیایه‌یل بویه‌سه‌ مایه‌ى دامه‌زانن فیشتر له‌ ده‌وڵه‌تیگ له‌ناو ده‌زگایه‌یل عراقى ك هه‌ڵوژاردن له‌ساى ئه‌نجام دریاو ته‌نانه‌ت هاوبه‌شه‌یلیش رازی نه‌وین وه‌ ئاكامه‌یلى و هه‌ر وه‌و خاتریشه‌ وه‌لاى كه‌مه‌و ئه‌را ئاینده‌یش وه‌ ئاژاوه‌ى فیشتر تاریف ئه‌كریه‌یدو گشت لایه‌نه‌یل به‌رژه‌وه‌ندى خودى و حزبى له‌تى دویننه‌و دویر له‌ دابینكردن ژیانیگ كه‌رامه‌تدار ئه‌را ملله‌ت.

وه‌ل ئه‌وه‌یشا حكوومه‌ت عراقى شماره‌یگ په‌یمانه‌یى له‌ بڕیاره‌یل دژایه‌تى تومار كرد ك ته‌نیا ئامانج له‌لی رازیكردن هه‌رێمى و ناوده‌وڵه‌تیه‌، ك ملیۆنه‌ها به‌رمیل له‌ نه‌فت خام ئه‌وه‌خشید و ملیۆنه‌ها به‌رمیل تر ئه‌یاد له‌وه‌رخاتر قورتاركردن سربیا له‌ لافاو، وه‌لى له‌ولاوه‌ دوینید لافاو هه‌ڕه‌شه‌ له‌ به‌غدا كردو سه‌رنه‌كه‌فت له‌ دروسكردن وه‌ربه‌سیگ خه‌ڕگین له‌چوارچیوه‌ى خیانه‌تكارى و كرده‌وه‌ى قه‌یرانه‌یل پڕ له‌ شه‌رمه‌زارى، ك هه‌ر وه‌و خاتریشه‌ خوینڕشیان بیتاوانه‌یل وه‌رده‌وامه‌ جوور ئه‌وه‌ك له‌ فه‌لوجه‌و رومادى و جاده‌یل به‌غدا و كنار ئاوه‌یل روى ئه‌یاد وه‌ دریژایى روى وه‌ر عراق و چشته‌یل فریه‌یگیش له‌لى سڕپوو ئه‌كرید، وه‌نا چوین زه‌ویه‌یل پڕ گه‌نم و جویه‌و باخه‌یل میوه‌جات ئه‌سزیه‌ید و حكوومه‌تیش هویچ هه‌ڵویستیگ ئاشكراو فه‌رمى له‌بانى نه‌یرید!!

له‌یرا وه‌رده‌وامى شكه‌ست عراق مه‌سه‌له‌ى پشبه‌سانن ده‌وڵه‌ته‌یل فه‌قیر ئه‌خاده‌ هویرم له‌بان ئه‌قڵانیه‌ت له‌ چاره‌سه‌ر كیشه‌یلى دویر له‌ ده‌خاڵه‌ت ده‌ره‌كى یا به‌رپابوین ئاژاوه‌، ئمجا له‌ كومار مالاوى ئه‌فریقى "جویس باندا" سه‌رۆك حكوومه‌ت بڕیاردا مووچه‌ى مانگانه‌ى خوه‌ى كه‌مه‌و بكا وه‌ ریژه‌ی ٣٠% و قه‌وڵدا ٣٥ سه‌یاره‌ى مارسیدس بفرووشید ك حكوومه‌ته‌گه‌ى هاوردیاده‌ى كار، یه‌یش بیجگه‌ فرووشتن ته‌یاره‌یگ سه‌رۆكایه‌تى وه‌ بڕ ١٥ ملیۆن دۆلار ئه‌را تیركردن فیشتر له‌ یه‌ك ملیۆن كه‌س ك ناڵانیان وه‌ده‌س فه‌فیرى فریه‌یگه‌و، وه‌ل ئه‌وه‌یشا خوسى موخیكا سه‌رۆك ئۆره‌گواى تا ئیسه‌یش فه‌قیرترین سه‌رۆكه‌یل جه‌هانه‌و له‌ گشتیانیش فریه‌تر خاوه‌ن كه‌ره‌م و ده‌سوازتره‌و خوه‌شه‌ویسترینه‌ له‌لای ملله‌ته‌گه‌ى، ك مووچه‌ی مانگانه‌ى ١٢هه‌زار و ٥٠٠ دۆلاره‌، وه‌لی ته‌نیا ١٠% له‌لى ئه‌را خوه‌ى گله‌و ئه‌یادو باقیه‌گه‌ى ئه‌وه‌خشیده‌ى ریكخریاگه‌یل خه‌یرخواز له‌ وڵاته‌گه‌ى.

وه‌و خاتریشه‌ "سه‌رۆك فه‌قیر" ئویشید: ئه‌و بڕه‌ پویله‌ ك ئه‌را خوه‌ى گلیه‌و ئه‌یاد به‌ش ژیان خوه‌شیگى ئه‌كاو بڕیگیش له‌ مه‌ردم ملله‌ته‌گه‌یشى وه‌ كه‌متر له‌و بڕه‌ پویله‌ ژیه‌ن، یه‌یش له‌وه‌ختیگ ك موخیكا هه‌ر له‌ سه‌ره‌تاى وه‌رگرتن پۆست سه‌رۆكایه‌تى له‌ مارس ٢٠١٠ له‌ناو ماڵیگ له‌ ئاواییگ ژیه‌ید له‌ناو باخه‌گه‌ى و ناخوازید له‌ كوشك سه‌رۆكایه‌تى بژیه‌یدو جوور باقى سه‌رۆكه‌یل تریش پاسه‌وان نه‌یریدو گرانترین چشتیگیش ك دیریده‌ى سه‌یاره‌یگ"فۆڵس واگن" فریه‌ كویه‌نیگه‌ ك نرخه‌گه‌ى له‌ ٢هه‌زار دۆلار فیشتر نیه‌.

ئمڕوویش عراق وه‌ فه‌رمى له‌تى زوڵم له‌ ملله‌ت ئه‌كریه‌ید بیجگه‌ ترس و رخه‌وبردن، ك وه‌رپرسیش له‌ناو كوشكه‌یلى خوه‌یان جیگیر كردنه‌و پاسه‌وانى خوه‌یان و داراییان ئه‌كریه‌یدو قسه‌یان جووریگه‌و كرده‌وه‌یان جووریگ تر، ك هه‌ر له‌وه‌ر ئه‌وه‌یش نه‌ هه‌ڵوژاردن نه‌ف دیرید و نه‌یش كوده‌تا چاره‌سه‌ر كیشه‌یل ئه‌كا، ئمڕوو عراق هه‌وه‌جه‌ وه‌ شووڕش ملله‌ت دیرید ئه‌را راسه‌وكردن ئه‌و ره‌فتاره‌یله‌و ئه‌را ده‌رچگن له‌و مه‌سه‌له‌ى تایفه‌گه‌رى و ره‌گه‌زى و زوڵم و سته‌م و ته‌كڕه‌ویه‌ ك كه‌فته‌سه‌ تی وه‌خاتر رویكردن له‌ ده‌وڵه‌ت ده‌زگایى مه‌ده‌نى ك ئایین له‌ سیاسه‌ت جیا ئه‌كادو مقه‌یه‌تى له‌ شانیه‌ت عراق ئه‌كاو كاریگه‌رى راسكانى دیرید نه‌ك ده‌سكرد.

شاكر جبورى

ج . أ