گونجیان و تایفه‌گه‌رى له‌ عراق

شفق نيوز

له‌ دیكتاتۆریه‌ت وه‌ره‌و تایفه‌گه‌رى، چوینكه‌ به‌شبه‌شه‌وبوین سیاسى له‌عراق پشت وه‌ ده‌ستوور یاسا نه‌وه‌ساگه‌، به‌ڵكوو په‌یوه‌سه‌ وه‌ چه‌سپانن هویر تایفه‌گه‌رى ك ئیسه‌ ده‌نگه‌و داگه‌ له‌ى عراقه‌ ك عراقیه‌یل ئاره‌زوو ئه‌وه‌ داشتن له‌ شوون رمیان سه‌دام حسێن عراقیگ تازه‌ بایده‌ وجوود و دیموكراسى و هاوشان بوود وه‌ل ئه‌و قوربانیه‌یله‌ ك ملله‌ت و پیكهاته‌یل وڵاته‌گه‌ دانه‌سه‌ى له‌ وه‌رانوه‌ر دیكتاتۆریه‌ت.

 

گونجیان سیاسى پیكهاتگه‌ له‌ پشتگیریكردن ده‌سڵاتیگ له‌لایه‌ن هیز دیموكراسى له‌ وڵاتیگ ك گشت پیكهاته‌یل ناو كوومه‌ڵگا جوور یه‌ك له‌تى به‌شدار بوون له‌ وه‌ڕیه‌وبردن حوكم، یه‌یش چاره‌سه‌ریگه‌ ئه‌را نه‌هیشتن ره‌خنه‌و گرفته‌یل وه‌ڕیه‌وبردن ده‌وڵه‌ت ك زیاتر له‌ وڵاته‌یل تازه‌ دامه‌زریاگ وجوود بایه‌سه‌ له‌وه‌رچه‌و بگریه‌ید، چوینكه‌ ئه‌گه‌ر ئه‌و گونجیان سیاسیه‌ نه‌كریه‌ید، ئه‌وه‌ له‌ى حاڵه‌ته‌ هه‌وه‌جه‌ هه‌ڵوژاردن كریه‌یدو بیگومان هه‌ڵوژاردنیش سه‌ركه‌فتگ بوود و ده‌نگیش وه‌ نهێنى بوود و ده‌نگده‌ر له‌بان ئاره‌زوو خوه‌ى نوێنه‌ر خوه‌ى هه‌ڵوژنید.

 

له‌یرا وڵاتیش پیكهاتگه‌ له‌ ده‌سڵات و داهات، ئه‌رك ده‌وڵه‌ته‌یش وه‌ڕیه‌وبردن و ئداره‌كردن ئى دو چشته‌سه‌، ئنجا وه‌ گووره‌ى بنه‌مایه‌یل یاساو دادپه‌روه‌رى ئه‌را وه‌ده‌سهاوردن به‌رژه‌وه‌ندیه‌یل تاك و كوومه‌ڵگا بایه‌سه‌ له‌ لایه‌ن هاووڵاتیه‌یله‌و هه‌ڵوژاردن بكریه‌یدو كه‌سه‌یلیگ دیاریكریاگ و متمانه‌دار بكریه‌نه‌ وه‌ڕیه‌وبه‌ر و ئه‌میندار وڵات و له‌لایه‌ن ده‌زگایگ جوور په‌رله‌مانه‌و مووڵه‌ت وه‌پیان بدریه‌ید. هه‌ر له‌وه‌ر ئه‌وه‌یش بایه‌سه‌ وڵات له‌بان ئه‌و یاساو ده‌ستووره‌یله‌ بنیات بنریه‌یدو ئه‌گه‌ر لیستیگ دیاریكردیاگ ده‌نگ فره‌یگ هاورده‌ ده‌س ئه‌وه‌ تویه‌نید جڵه‌و ده‌سڵات بگریده‌ ده‌س.

 

هه‌رچه‌نى له‌ عراق دویاى رمیان دیكتاتۆریه‌ت، قوناغ جوور ئه‌نجوومه‌ن حوكم و حكوومه‌ت ته‌وافقى و دووسى نیشتمانى و پرووسه‌یل تر  وه‌ زوور گوزه‌ر كرد تا ره‌سیه‌ ریككه‌فتننامه‌ى هه‌ولێر ك وه‌سه‌رپه‌رشتى و چه‌ودیرى مه‌سعود بارزانى سه‌رۆك هه‌رێم كوردستان كووتایى وه‌ گه‌وراترین كیشمه‌كیش هاورد، وه‌لى لایه‌ن وه‌رانوه‌ر ئه‌و هه‌ڵویسته‌ نه‌یاشت و كوردیش گشت هه‌رَه‌شه‌و گامه‌یل ئى دویاخره‌ وه‌ مه‌ترسى زانست، چوینكه‌ دویاى قورتاربوین عراق له‌ دیكتاتۆریه‌ت نیه‌ود وڵات بچووده‌ دویاوه‌ ئه‌را بار جاران، دویاى ئه‌وه‌یش ك ئه‌و هه‌ڕه‌شه‌یله‌ ئاراسته‌ى كورد كریان و هیزیش كلكریا ئه‌را ناوچه‌یل كوردستانى ده‌یشت هه‌رێم كوردستان و پێشمه‌رگه‌یش جوور وه‌رگریكار گه‌ورا له‌و شوونه‌یله‌ ئاماده‌ن ئه‌را هه‌ر ئه‌گه‌ر و پلانیگ ، نیه‌ود مه‌سه‌له‌ى تایفه‌گه‌رى له‌بان هساو سیاسى وڵات ئه‌نجام بدریه‌ید.

 

له‌ى باوه‌ته‌و سه‌كردایه‌تى كورد وه‌ هوشیاریه‌و روى وه‌ڕوى ئه‌و هه‌ڕه‌شه‌یله‌ وسیاو به‌غدا ئه‌را ئه‌وان چووڵ نه‌كردن و سه‌ركردایه‌تى سیاسییش وه‌رده‌وام له‌ هه‌وڵ ئه‌وه‌ بوى ك عراق باریده‌و ئه‌را بان سكه‌ى خوه‌ى له‌ساى ده‌ستوور و یاساو دویر بوود له‌ تایفه‌گه‌رى و نزیك بوود له‌ یاساو سه‌ندووقه‌یل هه‌ڵوژاردن.

 

ئنجا وه‌ڕیه‌وبردن ده‌وڵه‌تیش بایه‌سه‌ له‌بان ئاست گونجیان ریز له‌لى بگیریه‌ید، ئه‌گه‌ریش ئى كاره‌ نه‌كریا، ئه‌وه‌ بایه‌سه‌ سه‌ندووقه‌یل ده‌نگداین بكریه‌یده‌ خاسترین هووكار ئه‌را لاوردن دیكتاتۆریه‌ت و خودچه‌سپانن و دویره‌و كه‌فتن له‌ تایفه‌گه‌رى.

 

كه‌نعان به‌هادین

ا. ج