كورده‌یل فه‌یلى له‌ عه‌یدیش هانه‌ رووژگ

شفق نيوز

جگه‌رسزیاى ئاسمان گرته‌وه‌ر، خوڕه‌ى ئه‌سر چه‌وه‌یل ده‌ریایگ وه‌ناو(ده‌ریاى فه‌یلى)دروسكردو په‌له‌یل ئه‌و ده‌ریایشه‌ له‌گشت ماڵه‌ فه‌یلییگ سه‌رچه‌وه‌ گرتگه‌، مه‌ردم له‌عه‌ید خوه‌شڵه‌خوه‌شى و كه‌یف و شادى كه‌ن، كورده‌یل فه‌یلییش خه‌ریك پاوه‌موورى و كزكز به‌دبه‌ختیین ئه‌را روڵه‌یل بى سه‌روشوونیان ك نه‌مام عومریان وه‌ بیتاوان له‌ده‌سدان و له‌ناو ته‌لبه‌ن زندانه‌یل هاواریان ره‌سیه‌ كه‌شكه‌شى ئاسمان. مه‌ردم هه‌ر له‌ئیسه‌و خوه‌یان ئه‌را عه‌ید ئاماده‌ كردنه‌و جنگ جوان و ڕه‌نگامه‌ له‌وه‌ر كه‌ن و چنه‌ڕا سه‌یرانگاو هه‌وارگه‌یل خوه‌ش و دڵڕفن كوردستان، وه‌لى كورد فه‌یلى خوه‌یان ئاماده‌ كردنه‌ ئه‌را سه‌ردان قه‌ور ئه‌زیزه‌یلیان تا له‌ورا بتوینن كه‌میگ ساكنى بیه‌نه‌ دڵ و داخ روڵه‌یل بى سه‌روشوونیان له‌ورا هه‌ڵڕشنن.

مه‌ردمان بى وژدان و ناڕه‌سه‌نیگ ك پاشمه‌نده‌ى رژیم سته‌مكارن، له‌ناو ماڵ و موڵكه‌یلیان ئه‌یان خوه‌شگوزرانى كه‌ن و ئه‌یانیش كرانشین و جه‌وركیش و نك ناهمى له‌كه‌لاوه‌ كویه‌نه‌یل ده‌ور باب شێخ و سه‌دریه‌و شوونه‌یل تر ژیان كوڵه‌مه‌رگیگ دیرن و ڕووژى هه‌زار جار خوه‌زگ وه‌مه‌رگ خوازن. مه‌ردم تام عه‌ید وه‌ خوه‌شى كه‌ن، وه‌لى كورده‌یل فه‌یلى رووژه‌یل عه‌یدیش هانه‌ رووژگ.

ئه‌و تیه‌ریكى و ئه‌و به‌دبه‌ختیه‌ ك كورده‌یل فه‌یلى له‌تى ژیه‌ن، هویچ چین و تایفه‌یگ تر له‌تى نیه‌ژیه‌یگ ، مه‌ویسى ئه‌یان له‌ورا ده‌س وه‌پیكرد ك دڵسووزى خوه‌یان ئه‌را خاك ئى نیشتمانه‌ نیشاندان، هه‌میشه‌ وه‌فادار بوینه‌و خوه‌شه‌ویسى داشتنه‌ ئه‌را چینه‌یل تر جیاجیاو پیكهاته‌یل ئى وڵاته‌، وه‌لى حه‌یف و هه‌زار حه‌یف ئى مه‌زڵومیه‌ته‌ له‌بانیان هه‌ر مه‌ندگه‌و لانه‌وریا ك هه‌رچه‌نى بڕیار دادگاى باڵاى تاوانه‌یل عراقى كیشه‌ى كورد فه‌یلى وه‌ له‌ناوبردن وه‌جه‌م(جینۆساید)له‌قه‌ڵه‌مداو هه‌رچه‌نى حكوومه‌ت و ئه‌نجوومه‌ن نوێنه‌ره‌یلیش له‌ى دویاخره‌ دگان وه‌و هه‌ق ره‌وا نانه‌و بڕیار تایبه‌ت له‌ى باوه‌ته‌و ده‌رچیه‌، وه‌لى هیمان دڵ ماڵه‌ كوردیگ له‌ كورده‌یل فه‌یلى خوه‌شه‌و نه‌كریاگه‌ وه‌ ئه‌وه‌ك هه‌قه‌یلیان باریه‌یگه‌و .

كورده‌یل فه‌یلى له‌ كوشتن و بڕین و زندانى و ماڵویرانى و قوربانیداین، به‌ش شیر كه‌فته‌ پیان، رژیم سه‌دام هه‌ر وه‌ختى ده‌سى وه‌ كورد ناوچه‌یل تر نه‌ڕه‌سیاگ، كورده‌یل فه‌یلى كردیاگه‌ قوربانى و ئه‌نفالیان كردیاگوه‌گشت جووره‌ سفه‌تیگ وه‌حشیانه‌و نائنسانى و له‌قین دڵ په‌لامار ئه‌یان دیاگ.

وه‌ هه‌ر حاڵ كورد فه‌یلى له‌بان ئه‌و هه‌مگه‌ دارایى و سه‌روه‌ت و بازرگانى و ماڵ و موڵكه‌یله‌ ك داشتنه‌ى، هویچیان نه‌مه‌ند و نزیكه‌ى 95% یان شوون نیشته‌جیبوین تایبه‌ت وه‌خوه‌یان نه‌یرن.دى دڵ وه‌كام عه‌ید خوه‌ش بكه‌ن؟ وه‌ل كییه‌و بنیشن و بخه‌نن و دڵخوه‌شى نیشان بیه‌ن ئه‌گه‌ر هه‌ر خیزانیگیان نیمه‌یان قوربانى و نادیاره‌؟ له‌ كووتایى هه‌ر ئه‌وه‌نه‌ ئویشم: خودایا سه‌بوورى دڵ ئه‌و داڵگه‌یله‌ بیه‌ ك شه‌راره‌ى ئاگر دڵه‌یلیان بى نز كردگه‌و داخ فره‌یگ له‌لایان جه‌مه‌.

 

جه‌ماڵ ئه‌ركه‌وازى