تاریخ په‌یوه‌ندیه‌یل كورد و ئه‌مریكا

شفق نيوز



|په‌ره‌سه‌ندن ئاشكرایگ له‌گشت بوار و ئاسته‌یله‌و گه‌شه‌ كردگه‌، وه‌تایبه‌ت له‌ بوار چاپه‌مه‌نى و بڵاوكردن، هه‌ر له‌وه‌ر ئه‌وه‌یش تویه‌نیم بویشیم خوه‌شبه‌ختانه‌ كتاوخانه‌ى كوردى گام خاسیگ ناگه‌ له‌وه‌ر وجوود ئه‌و دام و ده‌زگایه‌یل چاپه‌مه‌نیه‌ ك ئیسه‌ ریژه‌ى فره‌یگ له‌ كتاو جوراوجوو هه‌س له‌ بواره‌یل جیاجیاى سیاسى و هه‌واڵگیرى و فه‌رهه‌نگ و ئابوورى و میدیایى و زانستى و ئه‌ده‌بى له‌ كتاوخانه‌یل كوردى و زیاتر وه‌ره‌و ده‌وڵه‌مه‌نبوین چوود، ئنجا چ كتاو نویسه‌ر خوه‌مان چ كتاوه‌یل هه‌ڵه‌وگه‌ردیاگ گشت ئه‌یانه‌ تویه‌نریه‌ید نه‌ف له‌لیان وه‌ربگیریه‌ید ئه‌را دید ئاینده‌و خوه‌ندنه‌وه‌ى ئاینده‌ى سیاسى و فه‌رهه‌نگى و ئابووریمان.

 

 

له‌گشت ئه‌و كتاوه‌یل جوراوجووریشه‌ شایه‌ت جیاوازى له‌بانیان وجوود داشتوود له‌ دید به‌رژه‌وه‌ندیه‌و، وه‌لى وه‌ هه‌رحاڵ له‌وه‌ر خاتر فامستن و ره‌سینه‌وه‌ تویه‌نیم له‌ڕاى دووس و دوشمن بڕه‌سیمنه‌و ئه‌گه‌ر وه‌گووره‌ى وژدان مه‌زه‌نه‌ى بكه‌یم.

 

ئنجا یه‌كیگ له‌و كتاوه‌یل گرینگ ئمڕوو ئیمه‌ى كورده‌ وه‌تایبه‌ت ك سیاسى و ره‌ساننكار و رووژنامه‌نویس و رووشنهویر و تاریخنویسه‌یل بایه‌سه‌ بخوه‌ننه‌ى، ئه‌ویش ئه‌وه‌سه‌ له‌و كتاوه‌ نه‌خش سه‌ركردایه‌تى شووڕش ئه‌یلوول نیشان ده‌ید له‌ رویداگه‌یل وه‌رانوه‌ر گه‌ورا هیزه‌یل و شیواز دیلۆماسیه‌تیان ، ك وه‌ راسى بایه‌سه‌ نه‌وه‌ى تازه‌ بزانید چ هه‌ڵویستیگ مه‌ردانه‌ بویه‌ له‌و قوناغه‌ ك كورد بیكه‌سترین ملله‌ت بیدادڕه‌س بویه‌.

 

له‌و كتاوه‌ باس له‌ نه‌خش دو جایه‌ڵ جوان كورد ئه‌كاو له‌هه‌مان وه‌خت باس له‌ نه‌خش یا ده‌ور"كۆنگریمه‌ن كۆچ"نوێنه‌ر ئه‌یاڵه‌ت نیویۆرك ئه‌كا له‌ ئه‌نجوومه‌ن نوێنه‌ره‌یل ئه‌مریكا ك چوین هه‌ڵویستیگ ئازایانه‌ نیشان داگه‌ وه‌رانوه‌ر كوردو كاره‌ساته‌ شوومه‌گه‌ى جه‌زایر. ئنجا ئیمه‌ ناخوازیم له‌یرا باس كه‌سایه‌تى و رویداگه‌یل بكه‌یم و ئه‌و ئشاره‌تیشه‌ ته‌نیا له‌وه‌ر خاتر مه‌یلكیشان خوه‌نه‌واره‌یل بوى له‌وه‌ر ئه‌وه‌ك تامازروو خوه‌ندنه‌وه‌ى ئى كتاوه‌ بكه‌ن ك ناوى"تاریخ په‌یوه‌ندیه‌یل كورد و ئه‌مریكا"س، له‌ ئاماده‌كردن وریا ره‌حمانى ك وه‌ڕاسى خزمه‌ت خاسیگ وه‌ كتاوخانه‌ى كوردى كردگه‌، ئنجا ئى كتاوه‌ بڕیگ پرسیار گرینگ نیشان ده‌ید ك بایه‌سه‌ خوه‌نه‌وار كورد ئاگاداریان بوود ك پیكهاتنه‌ له‌:

 

وڵاته‌یل یه‌كگرتگ ئه‌مریكا ئه‌را یه‌كه‌مجار كه‌ى وه‌ كیشه‌ى كورد ئاشنا بوى و په‌یوه‌ندى ره‌سمى و ناڕه‌سمى كورد و ئه‌مریكا چوین ده‌س وه‌پیكرد؟ ئامانج ئه‌مریكا له‌و په‌یوه‌ندیه‌یله‌ چه‌ بوى؟ په‌یوه‌ندى ئه‌مریكا وه‌ل پارچه‌یل تر جوراوجوور كوردستان چوینه‌؟ په‌یوه‌ندیه‌یل ئه‌مریكاو كورد له‌ باشوور كوردستان چ قوناغه‌یلیگ بڕیه‌؟ په‌یوه‌ندیه‌یل هه‌رێم كوردستان و ده‌وڵه‌ت ئه‌مریكا له‌شوون رمانن سه‌دام و رژیم به‌عس چ ئاڵشتكارییگ هاته‌سه‌ بانى؟ كیشه‌ى كورد چ پایه‌یگ له‌ سیاسه‌ت ئه‌مریكا دیرید؟ ئایا ئه‌مریكا هویچ سیاسه‌تیگ یا ستراتیجیه‌تیگ ئه‌را كورد دیرید جوور نه‌ته‌وه‌؟ سیاسه‌ت ئه‌مریكا له‌باوه‌ت سه‌روه‌خوه‌یى كوردستان و مه‌سه‌له‌یل په‌یوه‌ندیدار وه‌ ئاینده‌ى هه‌رێم كوردستان چه‌س؟ ئه‌یانه‌و پرسیاره‌یل تر گرینگ تاریخى و ئیسه‌یى ك له‌ى كتاوه‌ جواویان جه‌مه‌و كریانه‌و ئومیده‌واریم خوه‌نه‌وار كورد بتویه‌نید بخوه‌نیده‌ى و نه‌ف له‌لیان وه‌ربگرید.

 

فارس نه‌ورۆڵى