ڕێنماییه‌یل نوو ڕه‌گه‌زنامه‌ى هه‌رێم له‌ به‌رژه‌وه‌ندى كورده‌یل فه‌یلیه‌

شفق نيوز

ڕه‌سه‌نن و فه‌رمانگه‌گه‌ له‌ هه‌روه‌ختیگ ئاسانكارى ئیدارى پیشكه‌شیان كه‌ید، وه‌گووره‌ى قسه‌گان لیوا نزار رحمه‌ الله ئه‌را ماڵپه‌ڕ شه‌فه‌ق؛ ك زیاتریش وت :"ئیمه‌ هیمان شناسنامه‌ى بار كه‌سایه‌تى (هویه‌ الاحوال المدنیه‌) و شه‌هاده‌ى جنسیه‌ ده‌یمنه‌ پیان، و ئه‌و هه‌واڵه‌یله‌ ك بڕیگ كه‌ناڵه‌یل ڕه‌سانن په‌خشه‌وكردن له‌باوه‌ت وه‌ڕى نه‌خستن داواكاریه‌یل كورده‌یل فه‌یلى، دویرن له‌ ڕاسى".

موئه‌یه‌د نورى موسته‌فا به‌ڕێوه‌به‌ر فه‌رمانگه‌ى بار كه‌سایه‌تى له‌ هه‌ولێر، قسه‌گان لیوا نزار رحمه‌ الله پشتڕاسه‌و كرد و له‌ په‌یوه‌ندییگى وه‌ل ماڵپه‌ڕ شه‌فه‌ق، وت:"دیاره‌ جووریگ له‌ گه‌ن حالى بوین هه‌س له‌ لایه‌ن ئه‌و كورده‌یل فه‌یلیه‌ ك سه‌ردان فه‌رمانگه‌گه‌مان كردنه‌، چوینكه‌ ڕینماییه‌یل نوو داوا له‌و كه‌سه‌یله‌ كه‌ید ك توان ڕه‌گه‌زنامه‌ ده‌ربكه‌ن بچنه‌سه‌ر فه‌رمانگه‌یل په‌یوه‌ندیدار له‌و شوون جوگرافیه‌ ك قه‌ید نفووسیان هاله‌تى، و وه‌گووره‌ى قانوونه‌یل عیراقى ژن ها وه‌بان شویه‌گه‌ى له‌ هه‌ر شوونیگ و له‌ هه‌ر پارێزگایگ بوود، ئیمه‌یش له‌و ماوه‌ى وه‌رج له‌ ڕمیان ڕژیم وه‌رین و ئه‌را ئاسنكاریكردن ئه‌را كورده‌یل فه‌یلى و وه‌ڕى خستن فایله‌گانیان، ڕه‌گه‌زنامه‌ و شه‌هاده‌ جنسیه‌ى وه‌ختى دیایمنه‌ پیان، وه‌لى ئمڕوو وه‌گووره‌ى ڕینماییه‌یل نوو كار كه‌یمن ك هاله‌ به‌رژه‌وه‌ندى گشت هاووڵاتیه‌یل".

هاووڵاتى كریمه‌ عبدالرزاق له‌ قسه‌گانى ئه‌را ماڵپه‌ڕ شه‌فه‌ق ئویشى:" دیاره‌ ئیمه‌ وه‌ وردى له‌ ڕینماییه‌گان فه‌رمانگه‌یل ڕه‌گه‌زنامه‌ باخه‌وه‌ر نه‌ویمنه‌، و وه‌ختى ئه‌را عیراق هاتمه‌وه‌، چویم ئه‌را فه‌رمانگه‌ى بار كه‌سایه‌تى له‌ هه‌ولێر ك له‌تى تۆمارگه‌ یا سجل داشتم، تا شه‌هاده‌ جنسیه‌ ده‌ربكه‌م، وه‌لى ئه‌وان داوا له‌لیم كردن بچم ئه‌را فه‌رمانگه‌ى بار كه‌سایه‌تى له‌ به‌غدا چوینكه‌ قه‌ید نفووسم ها له‌ ناوه‌ند یا مركز".

له‌ لاى خوه‌یه‌و عه‌لى حوسێن فه‌یلى ئه‌ندام په‌رله‌مان كوردستان له‌ى باوه‌ته‌وه‌ ئویشى:" ئه‌و ڕینماییه‌یل نووه‌ له‌ لایه‌ن فه‌رمانگه‌یل ڕه‌گه‌زنامه‌ له‌ هه‌رێم و گشت پارێزگاگان عیراق هاله‌ به‌رژه‌وه‌ندى كورده‌یل فه‌یلى، و جووریگ له‌گه‌ن حالى بوین هه‌س ئه‌را ئى ڕینماییه‌یله‌ له‌ لایه‌ن كورده‌یل فه‌یلى، ك ڕژیم وه‌رین هه‌رچى ڕه‌گه‌زنامه‌ و دۆكیومه‌نتیانه‌ زه‌فت كرد، وه‌لى فه‌رمانگه‌یل ڕه‌گه‌زنامه‌ له‌ هه‌رێم له‌ سه‌رده‌م حوكم ڕژیم وه‌رین كوومه‌كیان كرد و ڕه‌گه‌زنامه‌ و كارت وه‌ختى ئه‌رایان ده‌ركرد ئه‌را وه‌ڕى خستن كاروباره‌یل زندگانى و ئیدارییان".

له‌ باوه‌ت مه‌ترسیه‌گان قوناغ نوو ك كورده‌یل فه‌یلى له‌تى ژیه‌ن عه‌لى حوسێن فه‌یلى له‌ دریژه‌ى قسه‌گانى ئویشى:" ئمڕوو بایه‌ته‌ هوشیار قه‌واره‌ یا حه‌جم ڕاسكانى خوه‌مان بویمن ك هاله‌ به‌غدا و پارێزگایه‌یل ناوڕاس و باشوور، و بایه‌ته‌ ته‌ئكید له‌ بان ئى مه‌سه‌له‌ بكه‌یمن وه‌ ڕیگه‌ى هاتنه‌وه‌ ئه‌را قه‌یده‌یل نفووس باوگه‌یلمان ك له‌ى نیشتمانه‌ ڕیشه‌ كوتانه‌".

عه‌لى فه‌یلى زیاتریش وت :" هاتنه‌وه‌ى هه‌ریه‌ك له‌ لیمان ئه‌را زێد وماواى خوه‌ى وه‌ك ئعترافیگ قانوونى وڕه‌سمیه‌ وه‌ ئنتماى ڕاسكانى ئه‌را عیراق و جه‌ختكردنه‌ له‌بان نیشتمانپه‌روه‌رى كورده‌یل فه‌یلى وقویلایى ئنتمایان ئه‌را نیشتمان".

عه‌لى فه‌یلى جه‌خت كرد له‌بان باپه‌ندبوین وه‌ قانوون و له‌وه‌رچه‌وگرتن ڕینماییه‌یل له‌ داواكاریه‌یل هاووڵاتیه‌یل فه‌یلى ئه‌را وه‌ڕى خستن فایله‌یل ڕه‌سمییان و وت:" ئه‌وسا و ئیسایش داواى ده‌سباڵایى قانوون كردیمن چوینكه‌ ئیمه‌ هایمنه‌ بان ئه‌و باوه‌ڕه‌ ك هه‌ق خوریاى ته‌نیا وه‌ڕیگه‌یل قانوونیه‌وه‌ سینیه‌یده‌وه‌ و بایه‌ته‌ پابه‌ند قانوون بویمن و هه‌میشه‌ له‌وه‌رچه‌ومان بوود".

عه‌لى فه‌یلى داوا له‌ كاروه‌ده‌سه‌یل عیراق كرد هه‌وڵ ئه‌را ئه‌وه‌ بیه‌ن ك هه‌رچى هه‌قه‌یل خوریاى كورده‌یل فه‌یلیه‌ بدریه‌نه‌وه‌ ك ڕژیم وه‌رین له‌لیان زه‌فتى كردیه‌، هه‌ر له‌ هه‌ق ڕه‌گه‌زنامه‌ تا ڕه‌سیده‌ هه‌ق موڵكدارى و ئه‌و هه‌قه‌یله‌ ك گشت هاووڵاتیه‌یل دیرنه‌ى".