ع. هونه‌ر .. ته‌كانده‌ر شعر نیشتمانى له‌سه‌رده‌م كوومار

شفق نيوز

ئاوایى مه‌رجان سه‌ر وه‌ناوچه‌ى مه‌هاباد له‌خوه‌رهه‌ڵات كوردستان هاته‌سه‌ دونیا. هه‌ر وه‌ مناڵى ئه‌را یه‌كه‌مجار له‌ ئاوایى مه‌رخوزى له‌شار سه‌قز چیه‌سه‌ وه‌ر خوه‌ندن و له‌ ماڵیش له‌لاى باوگى كتاوه‌یل (گوڵستان و بوستان) سه‌عدى و (كیمیاى سعاده‌ت)و بڕیگ له‌ كتاوه‌یل تر خوه‌ندگه‌. وه‌لى مناڵ بویه‌ وه‌ختى باوگى مردگه‌، دى خوه‌ى وه‌ته‌نیا مینیگ و دایگه‌ دڵسووزه‌گه‌ى ئمایه‌تى ئه‌كاو كتاوخانه‌یگ ئه‌ڕاى ڕازنیگه‌وه‌. ئنجا له‌وه‌ر ئه‌وه‌ك كتاوه‌یل فره‌یگ خوه‌نیگ، هس شعر له‌لاى په‌یا بووگ و له‌ عومر چوارده‌ ساڵیه‌وه‌ شعر نویسیگ.

دایگیشى ئه‌را دریژه‌داین وه‌ خوه‌ندن پشتگیرى فره‌یگ له‌لى كردگه‌و خوه‌ندن (سه‌رف و نه‌حو) ته‌واو ئه‌كا. دویاخر له‌ساڵ 1934 وه‌ك كارمه‌ندیگ له‌ ده‌زگاى دارایى له‌شاره‌یل بۆكان و مه‌هاباد دامه‌زریه‌یگ، له‌ كوومار كوردستان مامۆستا هه‌قیقى وه‌ نازناو( ع. هونه‌ر) تیه‌یگه‌ ناو مه‌یدان خه‌باته‌وه‌، ئنجا وه‌ شعر به‌رز (خه‌و غه‌فڵه‌ت) له‌ گووڤار نیشتمان ته‌كانیگ ده‌یگه‌ شعر نیشتمانى ئه‌و سه‌رده‌مه‌.

له‌ ساڵ 1963 له‌ بۆكان خانه‌نشین بووگ و باقى عومرى تا ساڵ 1997 له‌و شاره‌ به‌یگه‌ سه‌ر تا رووژ مردنى له‌ نه‌خوه‌شخانه‌ى شار بۆكان له‌ عومر 94 ساڵى، ك دڵه‌ پڕ له‌ ئشقه‌گه‌ى ئه‌را ملله‌ت و نیشتمان له‌ كوتان كه‌فیگ، وه‌لى تا وه‌رجه‌ چه‌ن سه‌عاتیگیش له‌ مردنى قه‌ڵه‌مى له‌ خزمه‌ت ملله‌ت و نه‌ته‌وه‌گه‌ى بوى.

مامۆستا هه‌قیقى سێ به‌رهه‌م و بڕى له‌ شعره‌یلى چاپ نه‌كریا، ك یه‌كیگ له‌وانه‌ سه‌فه‌رنامه‌ى ناته‌واو ئه‌و گه‌شته‌ بوى ك ئه‌را ئۆرپا كرده‌ى و پیشكه‌شى كرده‌ كتاوخانه‌ى ئه‌ده‌ب كوردى، دیوان هه‌قیقى به‌رهه‌م ئه‌و گه‌ورا شاعره‌سه‌ ك هویچ وه‌ختى فه‌رامووش نیه‌كریه‌یگ له‌لاى خوه‌نه‌واره‌یل كوردو هه‌قیقى هه‌میشه‌ زنگه‌ له‌دڵ گشت كوردیگ، یه‌یش پارچه‌ شعریگه‌ له‌ شعره‌یل مامۆستا عه‌باس هه‌قیقى ك له‌تى باس له‌ ده‌رد دویرى ئه‌كاو ئویشیگ:

ده‌رد دویرى فره‌ سه‌خته‌ دوڵبه‌ره‌یل هجران به‌سه‌

دڵ وه‌ك په‌روانه‌ سزیا چه‌وه‌گه‌م سزیان به‌سه‌

ئاقڵه‌یل شه‌یدا بوون ڕویپوش روخسارت لا مه‌یه‌

ئاشقه‌یل كوشته‌ى جه‌وردن قه‌تڵ مه‌زڵومه‌یل به‌سه‌

ئمجا ئویشیگ:

شایه‌تم ئه‌سر خوینینه‌ ك تن جه‌رگم بڕید

ئاشق روخساردم ئه‌ر ته‌قسیر ئه‌ر تاوانه‌ به‌سه‌

ئیسه‌یش مه‌جنوون و له‌یل هه‌ن له‌ى عه‌سر تازه‌

شیت وسه‌رگه‌ردان تنم حه‌یراندم حیرمان به‌سه‌

ئاگر وه‌ردایده‌ دڵ و گیان هه‌قیقى ئه‌ى چه‌وه‌گه‌م

ده‌رد بى ده‌رمانه‌ ئشقد ده‌رد بى ده‌رمان به‌سه‌

 

عه‌بدولموته‌لب