ئه‌بولفه‌ره‌ج چوین ره‌سیه‌ ده‌سڵات؟

شفق نيوز

 جارجاریگ دوینیم پۆست و پله‌و پایه‌ى له‌یوا سه‌ر له‌ ئاده‌میزاد شیونى براو باوگ و كه‌س وكار خوه‌ى بكوشید وه‌خاتر گرتنه‌ده‌س ئه‌و ده‌سڵاته‌ ك هه‌میشه‌ چه‌وى له‌بانى بویه‌و مینه‌ى هه‌لیگ ئه‌ڕاى كردگه‌.

حه‌سه‌ن كوڕ عومران له‌شوون باوگى بویه‌ فه‌رمانڕه‌واى ده‌وڵه‌ت شاهینى، وه‌لى عه‌زودولده‌وله‌ بوه‌یهى چه‌و خسته‌ بان وڵات زه‌لگاوه‌یل و له‌مانگ سه‌فه‌ر هه‌مان ساڵ "369ك " موته‌هه‌ر كوڕ عه‌بدوڵڵاى وه‌زیر خوه‌ى وه‌له‌شكر گه‌ورایگه‌و كلكرد ئه‌را داگیركردن زه‌لگاوه‌یل، ئنجا موته‌هه‌ر وه‌ختیگ روى كرده‌ شوونه‌گه‌ ئه‌را ماوه‌ى فریه‌یگ وه‌و كاره‌و خه‌ریك بوى و وه‌ربه‌سه‌یل فریه‌یگیش دروسكرد.

حه‌سه‌ن كوڕ عومرانیش مه‌ردمان فریه‌یگ كلكردو هه‌رچى وه‌ربه‌سه‌ شكان، موته‌هه‌ر ناچار بوى و په‌لامار زه‌لگاوه‌یل داو تواس ناوچه‌گه‌ داگیر بكا، وه‌لى حه‌سه‌ن له‌لى هه‌ڵسیاو كه‌فته‌ روى وه‌ڕوى بوینه‌وه‌ى له‌شكره‌گه‌ى و زاڵ بویه‌ بانى.

موته‌هه‌ر تاوان ئى شكه‌ست خوه‌یه‌ خسته‌ بان یه‌كیگ له‌ فه‌رمانده‌یل، ك گوایا ئه‌و ئى رییه‌ خوه‌شكردگه‌ ك وه‌دزیه‌و وه‌ل حه‌سه‌ن ریككه‌فتگه‌و له‌داخ ئه‌و شكه‌سته‌ خوه‌ى كوشت. دى ئه‌وه‌ بوى" عه‌زودولده‌وله‌ " ناچار بوى وه‌ل حه‌سه‌ن كوڕ عومران ریك بكه‌فید له‌بان باج ساڵانه‌. ئه‌وه‌ بوى حه‌سه‌ن كوڕ عومران نه‌مه‌ندو حسێن براى شوونى گرت"372 ك – 982 ز"، ك ماوه‌ى 3 ساڵ فه‌رمانڕه‌وایى كرد.

له‌یرا ماڵویرانیه‌گه‌ ده‌س وه‌پیكردو ته‌ماح پۆست و پایه‌ى كاره‌سات دروس كرد، ئه‌وه‌ بوى ئه‌بولفه‌ره‌ج كوڕ عومران له‌ حسێن براى كه‌فته‌ فه‌ن وفیڵ و داوا له‌لى كرد وه‌ یه‌كه‌و بچنه‌ سه‌ردان خوه‌یشگه‌گه‌یان ك نه‌خوه‌ش بوى.

وه‌ختیگ حسێن ره‌سیه‌ نزیك ماڵ خوه‌یشكه‌گه‌ى ، ئه‌بوولفه‌ره‌ج محه‌مه‌د براى ك فره‌ حه‌سویدى وه‌پى برد، چوینكه‌ له‌ناو ملله‌ته‌گه‌ى فره‌ خوه‌شه‌ویس و قه‌دردار بوى و هه‌ر وه‌و فه‌ن و فیڵه‌و له‌پشته‌و داویده‌ى وه‌ر شمشیر و كوشته‌ى، دویاى ئه‌وه‌یش وه‌ده‌نگ به‌رز جاڕ كوشیان حسێن براى دا ، ك وه‌ى جووره‌ بویه‌ فه‌رمانڕه‌واى وڵات.

دیاره‌ ئى كوشتنه‌و یه‌كترى لاوردنیشه‌ له‌بان ته‌خت ده‌سڵات هار له‌ زه‌مانه‌ى زویه‌و له‌ وجوود بویه‌و تا ئیسه‌یش شوونه‌وارى هه‌ر مه‌ندگه‌، چوینكه‌ كه‌سه‌یلیگ هه‌ن خوین فریه‌یگیش بڕشنن هویچ گرینگ نیه‌ له‌لایان ته‌نیا ئه‌وه‌ گرینگه‌ ده‌سیان بڕه‌سیده‌ ته‌خت ده‌سڵات.

به‌هزاد حه‌مه‌ نیاز

ج . أ