ڕی گله‌وخواردن ئه‌را بنه‌و باوانم

شفق نيوز

شرين دويه‌تم ئه‌وه‌ بزان ك سه‌ختيه‌يل فريه‌و گه‌ورايگ له‌بان ئاست حكوومی و ئداری ئه‌ياده‌ تويش پيكهاته‌يگ ك قه‌ده‌ر له‌یوا كرد ڕی دڕگين بگريده‌ وه‌ر و خوازياره‌ په‌يام خوه‌ی بڕه‌سنيده‌ رای گشتی عراقی ك ئه‌وانه‌ك ئداره‌ی ده‌سڵات ئی وڵاته‌ ها ده‌سيان ئاماده‌ نيين ئه‌را جيوه‌جيكردن ئه‌ركه‌يل و هاوردنه‌وه‌ی مافه‌يل زه‌فتكرياگمان. هه‌ردوگدان خاس بزانن ك مه‌ردمانيگ هه‌ن نوا له‌ پيشكه‌فتن و په‌ره‌داين ئه‌گرن تا ئاده‌ميزاد فه‌يلی دويره‌و بخريه‌يد و شكه‌ست باريد له‌ گشت بواره‌يل ژيان.

خاس بزانن ك مه‌ردمان فريه‌يگ هه‌ن هس وه‌ كه‌می ئه‌كه‌ن و مه‌يل ئه‌وه‌ نه‌يرن كه‌سيگ وه‌ناو ميرزا، شاواز، فانووس، نورخاس، شاپه‌ری ئداره‌ی دوسيه‌ی خزمه‌تگوزارييگ يا په‌روه‌رده‌ييگ بكا يا بدێده‌ پاريزگار يا وه‌زيريگ و ته‌نانه‌ت له‌ ئاينده‌يش بدێده‌ سه‌رۆك كومار يا سه‌رۆك وه‌زيره‌يل.

خاس بزانن ك زنجيره‌ قه‌يرانه‌يليگ هه‌ن گشت رووژ و گشت مانگ و گشت ساڵيگ له‌ پشت په‌رده‌وه‌ باس ئه‌كريه‌يدو ناخوازيد ئاڵشتكارييگ ئه‌نجام بدريه‌يد و ئوميد رووشنيگ بايده‌ وجوود ك پياوه‌يليگ له‌ليه‌و سه‌رهه‌ڵده‌ن ئه‌را بنياتناين په‌يوه‌نديه‌يليگ ك كرامه‌ت ئاده‌ميزاد فه‌يلی له‌تی بيبه‌ش كردنه‌و له‌ ده‌روازه‌ی خوسه‌و كينه‌ت و فه‌رامووشكردنه‌و چشتيگ ئه‌رای نيشتنه‌سه‌و.

خاس بزانن ك جيوه‌جيكردن نه‌ريت و ريڕه‌وه‌يل په‌يوه‌س وه‌ راسگوويی و ئه‌مانه‌ت و دڵسووزی ك ئه‌چێده‌ خانه‌ی چه‌مه‌يل ئاو عراقه‌و هه‌وه‌جه‌ وه‌و سه‌ڵامه‌تی وژدانه‌ ديريد ك چه‌وديری جمشت فكر و مه‌رام ئه‌كا وه‌رجه‌ جيوه‌جيكردن ئه‌و ياسا ك حوكم له‌بان ئه‌و كاره‌يله‌ ئه‌كا ك نيشانه‌ی ماددی وه‌پيانه‌و دياره‌. خاس بزانن ك رووژانه‌ له‌ ژير ناونيشان جوراوجوور دزی له‌ ماڵ و حاڵمان ئه‌كريه‌يد، له‌وانوه‌ر ئه‌وه‌يش بنياتناين پرووژه‌يل خوه‌شه‌ويستی و دووسی په‌ك خرياگه‌ وه‌ مه‌هانه‌ی مقه‌يه‌تيكردن مه‌رز عرووبه‌ت. خاس بزانن ك ئاشووه‌يل سياسی فيشتر مه‌ترسيدار و خراوه‌كارن له‌ شۆفينيه‌يل، چوينكه‌ له‌ پشته‌و ده‌نه‌ ليمان له‌وه‌ر به‌رژه‌وه‌نديه‌يل خوه‌يان.

خاس بزانن ئه‌و چين سته‌مكاره‌ ك ناڕه‌وايی ده‌رهه‌قمان ئه‌نجامدا، چشتگی نه‌مه‌ند له‌ مێژوو باس بكريه‌يد، خاس بزانن ئه‌ی دويه‌ت و كوڕم ئيوه‌ خوازيارين كار له‌ چوارچيوه‌ی په‌يڕه‌و و وانه‌يل خوه‌ندنگای خوه‌شه‌ويسی ئه‌را نيشتمان بكه‌ين و خاس بزانن ئيوه‌ بيبه‌شكرياگه‌يل و بيده‌سڵاته‌يل سه‌ر بخه‌ين و خوازيارين ئاڵشتكاری ئه‌نجام بيه‌ين و پرس وپرسكاری ده‌رهه‌ق گه‌ناته‌كاره‌يل ئه‌نجام بيه‌ين و دادگه‌ری و ئنساف بارينه‌ وجوود، ئيمه‌يش هايم وه‌لدان.

خاس بزانن ك مێژوو له‌توو لاپه‌ڕه‌يلی چه‌و به‌زه‌يی وه‌و كه‌سه‌يله‌ نايه‌يد ك چه‌وی ته‌ماشای مه‌ينه‌تيه‌يل مه‌ردم ئه‌كا وه‌بی نيشانداين هه‌ڵويستيگ. خاس بزانن ك وه‌خت زوی گوزه‌ريدو له‌وه‌يش گورجتر ده‌سميه‌تداين چه‌وسياگه‌يل و دڵخوه‌شكردن خه‌مداره‌يله‌و ئه‌وانه‌ك ئه‌را ماوه‌ی فيشتر له‌ سی ساڵه‌ نيشتمانيان له‌ليان دزياگه‌، خاس بزانن ئه‌يه‌ وه‌رپرسيارێتی گه‌ورايگه‌و يه‌يش ئه‌خه‌مه‌ هويردان م داڵگه‌يلمان گشت رووژيگ باس مه‌ينه‌تی و خه‌مه‌يليان ئه‌كه‌ن و ئويشن خودا وه‌ گه‌ورايی خوه‌دو وه‌و كه‌سه‌گ ك مقه‌يتيكه‌ر فه‌قيره‌يل و دژ سته‌مكاره‌يله‌ ئه‌و كه‌سه‌يله‌ له‌ شه‌ڕ دويره‌و بخه‌ ك هه‌وڵ ئه‌را كيشه‌ ره‌واگه‌مان ئه‌يه‌ن و ڕی گله‌وخواردن ئه‌را بنه‌و باوانم و سه‌ڵامه‌تی و ئه‌مان مناڵه‌يلم دابين ئه‌كه‌ن.

جه‌ماڵ مه‌ڵگشايی

ج . أ