عراق دويای داعش

شفق نيوز

ئه‌مريكاو هاوپه‌يمانه‌يل له‌شوون رمانن رژيم به‌عس له‌ عراق وه‌رجه‌ دامه‌زرانن هيزيگ بته‌و نيشتمانی و ده‌سوه‌كاربوين دامه‌زرياگه‌يل ياسايی و ده‌ستووری وه‌ شيوه‌ی خاسيگ و بته‌وكردن سيستم ئابووری و دروسكردن متمانه‌ له‌ناونی پيكهاته‌يل و هيزه‌يل سياسی، هه‌ڵه‌ی گه‌ورايگ ئه‌نجام دان له‌ هه‌ڵه‌په‌ڵه‌كردن ئه‌را وه‌جيهيشتن و كيشاننه‌وه‌ی هيزه‌يليان له‌ی وڵاته‌، ك عراق ئمڕوو باج ئه‌و هه‌ڵه‌ی ئه‌وانه‌ ئه‌ياد.

كتاو يادوه‌ريه‌يل يه‌ك ساڵ كاركردن(پۆل برێمه‌ر)حاكم ئداری ئه‌مريكا له‌ عراق، ك وه‌رجه‌ ١٢ ساڵ نويسرياگه‌، پيشبينی رويداگه‌يل ئمڕوو فريه‌ وه‌ ئاشكرا له‌تی دوينريه‌ێد.

مانای ئه‌وه‌سه‌ ئه‌مريكاو هاوپه‌يمانه‌يلی، ئه‌گه‌ر له‌ خه‌م چه‌سپانن بنه‌مايه‌يل ديموكراسيه‌ت و ئنسانيه‌ت و به‌رقه‌رابوين ئارامی و جيگيركردن بوون له‌ عراق و ناوچه‌گه‌ وه‌گشتی، نادێ هه‌ڵه‌ی وه‌رينيان دوباره‌وه‌ بكه‌ن.

يه‌يش وه‌و مانا ك بايه‌سه‌ ده‌وڵه‌ته‌يل گه‌وراهيز و هاوپه‌يمانه‌يل جه‌هان هاووه‌خت وه‌ل جه‌نگ داعش، پلانيگ واقعی و باوتيانه‌ ناويشم ئه‌را عراق، به‌ڵكوو ئه‌را خوه‌رهه‌ڵات ناوين دويای جه‌نگ داعش ئاماده‌ بكه‌ن.

ئمجا هه‌رچه‌نی دڵنيام ك له‌ناونی خوه‌يان دولايه‌نی و چه‌ن لايه‌نی قسه‌وباس له‌بان ئه‌و باوه‌ته‌ ئه‌كه‌ن، وه‌لێ بايه‌سه‌ له‌ ئاماده‌كردن هه‌ر پلان يا برياريگ چاره‌نويسساز له‌و باره‌وه‌ نوێنه‌ر ملله‌ته‌يل ناوچه‌گه‌ ك به‌شيگن له‌ بارودوخه‌گه‌ به‌شداری وه‌پيان بكريه‌ێد، وه‌نا ئه‌گه‌ر نا، ئه‌وه‌ جه‌نگ و كيشمه‌كيش و خوينڕشيان له‌ی ناوچه‌ هه‌ر وه‌رده‌وام ئه‌دێ و ئه‌و داعشه‌ ئه‌چێد و داعشيگ تر يه‌قه‌ی جه‌هان ئه‌گرێد.

چنار سعه‌د عه‌بدوڵڵا