هه‌رێم كوردستان له‌دویاى وازكردن ده‌س عراق

شفق نيوز

 

ده‌وڵه‌ت كوه‌یت نه‌خش سه‌ره‌كى داشت له‌ هیشتنه‌وه‌ى عراق له‌ژیر به‌ند هه‌فته‌م، ئه‌ویش له‌وه‌ر چاره‌سه‌رنه‌كردن و یه‌كلانه‌كردنه‌وه‌ى بڕیگ كیشه‌ى ناونیان، وه‌لى له‌چه‌ن مانگیگ گوزه‌یشت هه‌ردوگ وڵات له‌ ده‌سوه‌پیكردن دانیشتنه‌یلیگ دبلۆماسى چاره‌سه‌ر كیشه‌یل مه‌رز و مه‌سه‌له‌ى بى سه‌روشوونه‌یل و چشته‌یل دزریاگ و خه‌ت ئاسمانى كردن و یاداشتیگ هاوبه‌ش پیشكه‌ش كردنه‌ كوومه‌ڵه‌ى گشتى نه‌ته‌وه‌یل یه‌كگرتگ ئه‌را به‌سانن ئه‌و دوسیه‌یله‌ له‌ڕوى یاساى ناوده‌وڵه‌تیه‌و، ك ئه‌وه‌ بوى ئه‌نجوومه‌ن ئاسایش ناوده‌وڵه‌تى وه‌ جه‌م ده‌نگ هه‌ر 15 ئه‌ندامه‌گه‌ى عراق له‌ژیر به‌ند هه‌فته‌م دراورد.

ئى بڕیار ناوده‌وڵه‌تیه‌ گرینگى گه‌ورایگ دیرید ئه‌را ده‌وڵه‌ت عراق، چوینكه‌ له‌ژیر گرفت و راسپارده‌ى نه‌ته‌وه‌یل یه‌كگرتگ دراریده‌ى و تیه‌ریده‌وه‌ى ئه‌را ناو كوومه‌ڵه‌ى ناوده‌وڵه‌تى وه‌ سه‌روه‌خوه‌یى و سه‌روه‌رى ته‌وایگه‌و، ك یه‌یش ره‌نگدانه‌وه‌ى خاسیگ دیرید له‌ڕوى سیاسى و ئابوورى و بازراگانى و دبلۆماسى و په‌یوه‌ندیه‌یل ناوده‌وڵه‌تى و دى عراق وه‌ ئازادى مامڵه‌ وه‌ سه‌رچه‌وه‌یل دارایى و پویله‌یل ده‌س وه‌سه‌رگیریاگ ئه‌كاو له‌و بواره‌ ده‌سى واز كریه‌ید.

وه‌ل ئه‌وه‌یشا به‌غدا دى ناچار نیه‌ود داهات فرووشتن نه‌فته‌گه‌ى له‌ سندووق گه‌شه‌وه‌پیداین عراق و له‌ژیر چه‌ودیرى نه‌ته‌وه‌یل یه‌كگرتگ دابنه‌یدو تویه‌نید خوه‌ى راسه‌وخۆ وه‌رى بگرید و مامڵه‌ وه‌پیه‌و بكا.

گشت ئه‌یانه‌ پایه‌ى عراق له‌بان ئاست ناوده‌وڵه‌تى و هه‌رێمایه‌تى بته‌و ئه‌كا، وه‌لى وه‌ل ئه‌و خاڵه‌یل خاس و بته‌وه‌یلیشه‌ له‌بان ئاست ناوده‌وڵه‌تى، عراق خاڵ كز دیرید له‌بان ئاست ناوخوه‌یى، چوینكه‌ حكوومه‌ت فیدراڵ ك له‌لایه‌ن نورى مالكى سه‌رۆك وه‌زیره‌یله‌و بریه‌یده‌ رییه‌و، روى وه‌ڕوى چه‌نه‌ها كیشه‌ى سیاسى و ئابوورى و كوومه‌ڵایه‌تى و خزمه‌تگوزراى بویه‌سه‌و.

حكوومه‌ت مالكى چه‌نه‌ها كیشه‌ وه‌ل كوردو سنى و ته‌نانه‌ت بڕیگ لایه‌ن شیعه‌یش دیرید ك تائیسه‌ چاره‌سه‌ر نه‌كریانه‌، ئنجا له‌ى هه‌ل ومه‌رجیشه‌ ده‌رچگن عراق له‌ژیر به‌ند هه‌فته‌م ریككه‌فتننامه‌ى نه‌ته‌وه‌یل یه‌كگرتگ چ كاریگه‌رییگ دیرید له‌بان هه‌رێم كوردستان؟

بیگومان بته‌وبوین پایه‌ى عراق له‌ڕوى وه‌به‌رهاوردن و ئابوورى و بازرگانیه‌و كاریگه‌رى خاسیگیش له‌لى كه‌فیده‌و له‌بان هه‌رێم كوردستانیش، وه‌لى بته‌وبوین عراق له‌ڕوى سیاسى و سه‌ربازى و كردنه‌وه‌ى ده‌سى ئه‌را خود پڕ چه‌ككردن وه‌بى هویچ گره‌نتییگ ناوده‌وڵه‌تى ئه‌را مقه‌یه‌تیكردن ملله‌ت كوردستان ره‌نگدانه‌وه‌ى خراو له‌لى كه‌فیده‌و له‌بان هه‌رێم كوردستان و دابینكردن هه‌قه‌یل مادده‌ى 140ده‌ستوور.

هه‌ر له‌وه‌ر ئه‌وه‌یش بایه‌سه‌ ئه‌و راسیه‌ بزانیم ك عراق هیمان له‌ژیر ره‌حمه‌ت به‌ند بوى و ده‌سى شه‌نه‌ك دریاوید، چه‌ن جاریگ هیز سه‌ربازى له‌ناوچه‌یل كوردستانى ده‌یشت هه‌رێم له‌دژ كورد گرده‌و كرد و هه‌ڕه‌شه‌ له‌لى كرد، ئنجا ئیسه‌یش دویاى ئه‌وه‌ك گشت قاپییگ هه‌رێمى و ناوده‌وڵه‌تى ئه‌راى واز بوود، ك وه‌ ته‌واوى ده‌سه‌یلى واز بوود ئایا چوین مامڵه‌ وه‌ل هه‌رێم كوردستان بكاو چه‌وه‌ڕى چه‌ له‌لى بكریه‌ید؟

خه‌لیل عه‌بدوڵڵا

ج . أ