شه‌پازله‌س تا شریقه‌ى بڕنه‌و؟!

شفق نيوز

تیه‌یگ وه‌تایبه‌ت له‌قوناغ كورپه‌یى تا قوناغ باڵغى و ژویه‌رتر، وه‌لى په‌روه‌رده‌ گشت مه‌یدانه‌یل ئه‌خلاقى و ڕه‌فتار و هه‌ڵسووكه‌فتیگ گرێده‌و‌.

ئیمه‌ ئه‌گه‌ر بایمن و مه‌سه‌له‌ى ئمایه‌تكردن و په‌روه‌رده‌ى ئه‌وساى كورده‌وارى له‌یه‌كه‌و به‌یم، ئه‌وه‌ بیگومان جیاوازى هه‌س له‌ناونى چوینیه‌تى په‌روه‌رده‌كردن مناڵ وه‌ به‌راورد یا مقارنه‌ وه‌ل دونیاى ئمڕووا، ئه‌و جیاوازییشه‌ له‌لى هه‌س خاسه‌و له‌لیشى هه‌س خوه‌ى له‌خراوى دوینیگه‌وه‌، فره‌كه‌س هه‌ن هیمان وه‌ ئه‌قڵیه‌ت ئه‌وساى دویاكه‌فتگه‌وه‌ چنه‌ ڕییه‌وه‌و له‌وه‌زع ئمڕوو ناشاره‌زان و گونجیانیگ وه‌ل زه‌مانه‌یا نه‌یرن و نیه‌زانن چ ڕه‌فتاریگ  هه‌ڵوژنن؟

ئیمه‌ هویچ وه‌ختى حاشا له‌ گوزه‌یشته‌ نه‌كردیمه‌و نیه‌توایم گوزه‌یشته‌ى ره‌سه‌نایه‌تى خوه‌مان له‌هویره‌و بووه‌یم و له‌وه‌رانوه‌ر ژیان ئه‌وساى كورده‌وارى شه‌رمه‌زار خوه‌مان بكه‌یم و پشت له‌و داب ونه‌ریته‌یل جوانه‌ بكه‌یم و خوه‌مان وه‌ په‌سه‌نكار چه‌رخ تازه‌ بزانیم و یادگارى و په‌ند وعبره‌ت و هه‌گبه‌ى پڕ ئامووژگارى پیشینه‌یل و شوون پاى باوگ و باپیره‌یلیمان گوم بكه‌یم.

هه‌ر ده‌ورانیگ تام تایبه‌ت خوه‌ى داشتگه‌، له‌ زه‌مانه‌ى وه‌رجه‌ ئیسه‌ په‌روه‌رده‌كردن مناڵ شایه‌ت سه‌ختى فره‌یگ وه‌ خوه‌یه‌وه‌ دیه‌و دایگ و باوگ له‌وه‌ر ئه‌وه‌ك مناڵه‌گه‌یان ئاقڵ و ئه‌ده‌بدار ده‌ربچووگ جووریگ له‌ زوڵم و زووردارى وه‌لیا هاوردنه‌سه‌ كار و هه‌میشه‌ ڕاى خوه‌یان له‌بان ممناڵه‌گه‌یان چه‌سپاننه‌. یه‌یش تاڕاده‌یگ تویه‌نیم بویشیم له‌ناو مه‌ردمانیگ بویه‌ ك ئه‌یاكه‌ ئه‌واكه‌ ناسیه‌و په‌یوه‌ندى قه‌ومایه‌تى وه‌یه‌كه‌وه‌ داشتنه‌و تاڕاده‌یگ ئه‌و مناڵه‌ جویر ئیسه‌ هس وه‌ شه‌رمه‌زارى نه‌كردگه‌، چوینكه‌ زوورم مه‌ردم چوارده‌ورى قه‌وم و كه‌سوكار خوه‌ى بوینه‌، وه‌لى ئیسه‌ هه‌ر شوون وشاریگ بگر مه‌ردمه‌گه‌ى تیكه‌ڵه‌و هه‌ر یه‌كیگ له‌ شوونیگه‌وه‌ هاتگه‌و كومه‌ڵگایگ پیشكه‌فتگ دروس بویه‌ له‌گشت مه‌یدانیگه‌وه‌، ته‌نانه‌ت هاوسا ماڵه‌گه‌دیش شایه‌ت هویچ په‌یوه‌ندییگ له‌ڕوى قه‌ومایه‌تیه‌وه‌ نه‌یاشتووگ وه‌لدا، ئه‌یه‌ بیجگه‌ ئه‌وه‌ك گشت ره‌فتار و هه‌ڵسووكه‌فتیگ له‌ كومه‌ڵگا ئاڵشتكارى فره‌یگ هاته‌سه‌ بانى و له‌ى سه‌رده‌م ئیسه‌یشه‌ مناڵ و هه‌رزه‌كار و جایه‌ڵ جوانه‌یلیمان شایه‌ت ئه‌و جووره‌ ره‌فتاریگ ك ئه‌وسا وه‌ل مناڵه‌یلا كریاگه‌ ئیسه‌ وه‌ دڵیان نه‌وگ و خوه‌یان له‌چه‌رخ پیشكه‌فتن و مه‌نتق بویننه‌وه‌و مه‌سه‌له‌ى شه‌رم و عه‌یب كاریگه‌رى داشتووگ له‌ ده‌روینیان. ئنجا مناڵ هه‌رچوینیگ بووگ حه‌ز ناكا له‌وه‌رچه‌و ره‌فیقه‌یلى یا له‌وه‌رچه‌و هاوساماڵ و ده‌یشت وده‌ر له‌لایه‌ن باوگ ودایگه‌وه‌ په‌شیمانه‌و بكریه‌یگ و زه‌ره‌د له‌ كه‌سایه‌تى و هه‌یبه‌تى بدریه‌یگ ، چوینكه‌ هه‌ر كرده‌وه‌ى ناشرین و ناپه‌سنیگ ده‌رهه‌ق وه‌و مناڵ و هه‌رزه‌كاره‌ له‌وه‌رچه‌و مه‌ردم شایه‌ت خوسه‌و كینه‌تیگ له‌ ده‌روینى دروس بكا.

شاره‌زایه‌یل مه‌یدان په‌روه‌رده‌ هاوده‌نگن له‌بان ئه‌وه‌ك زووان گفتوگوو شرینتره‌ له‌زووان هه‌ڕه‌شه‌و كوشتن، ئه‌وسا به‌عزه‌ خیزانیگ هه‌میشه‌ دار و شه‌لاق قسه‌ وه‌ل مناڵه‌یلیان كردیان و جووره‌ كوشتنیگ له‌لیان كردیان ره‌سانیانه‌ى مردن و له‌ئاخریشه‌وه‌ نوڕستید ئه‌و مناڵه‌ له‌ڕخا كه‌سایه‌تى خوه‌ى له‌ده‌س دیاگ یا ئه‌و جورئه‌ته‌ نه‌یاشت وه‌ل ره‌فیقه‌یلیا دانیشتیاگ و په‌یوه‌ندى خاسیگ په‌یا بكرداگ، چوینكه‌ له‌ئه‌نجام ئه‌و زوڵم و زووره‌ ك له‌لایه‌ن دایگ و باوگه‌وه‌ له‌لى كریا شه‌رمیان هاتیان تیكه‌ڵ ره‌فیقه‌یلیان بوون نه‌وه‌ك بكه‌فنه‌ وه‌ر تیر وتانه‌و قه‌شمه‌ریكردن. وه‌لى ئیسه‌ مناڵ ئه‌و قوناغ و سه‌رده‌مه‌ بڕیه‌و له‌ ده‌ورانیگ تر ژیه‌یگ و ئاماده‌ نیه‌ سوكایه‌تى وه‌ كه‌سایه‌تیه‌گه‌ى بكریه‌یگ  و كورد وه‌ته‌نى(زه‌مانه‌ى دراو شه‌پازله‌ دى نه‌مه‌ند)، وه‌لى وه‌داخه‌وه‌ هیمان كه‌سه‌یلیگ هه‌ن نیه‌زانن چوین ره‌فتار وه‌ل مناڵ و هه‌رزه‌كاره‌یلیانا بكه‌ن و ئیسه‌یش وه‌ دار و شه‌ق و شه‌پازله‌ له‌وه‌رچه‌و هوكوڕ و هاوسه‌یلیان ره‌فتار كه‌ن و هیمان له‌ئه‌قڵیه‌ت كویه‌ن ژیه‌ن و له‌وه‌خت ناكووكى وه‌ل مناڵه‌یلیانا له‌یوا كیشنه‌ ڕه‌ت ملیانا نیه‌زانید شه‌پازله‌س تا شریقه‌ى بڕه‌نه‌و؟

 

نه‌سرین میرزا