ئه‌و ئازادیه‌یل مه‌ده‌نیه‌ هاكوو ك ده‌ستوور مسۆگه‌ریان كردیه‌؟

شفق نيوز

هجوومه‌ ك وه‌ى دویاییه‌ چه‌ن لایه‌نیگ سیاسى كه‌نه‌ى بان ڕیكخریایه‌یل ڕووشنهویرى و میدیایى وه‌مه‌هانه‌ى دابونه‌ریت كوومه‌ڵایه‌تى، بویه‌سه‌ مایه‌ى نیگه‌رانى و پرسیاركردن له‌باوه‌ت ئاینده‌ى ئازادیه‌یل مه‌ده‌نى.

حامد متڵه‌گ نوێنه‌ر لیست عیراقیه‌ له‌ قسه‌گانى ئه‌را ماڵپه‌ڕ شه‌فه‌ق له‌بان ئه‌وه‌ جه‌خت كرد ك لیسته‌گه‌ى دژ وه‌هه‌ر ئجرائیگ زاڵمانه‌ وسیگ ك ئازادى ئاده‌میزاد عیراقى شكنێ و مافه‌یل مه‌ده‌نیى زه‌فت كه‌ید و ئه‌وه‌یشه‌ ڕووشنه‌وكرد ك:" ئیمه‌ بیده‌نگ نیه‌ویمن له‌ شكانن ئه‌و ئازادیه‌یله‌ ك وه‌ل قانوون و به‌رژه‌وه‌ندیه‌یل وڵاته‌و گونجیه‌ن و هه‌میشه‌ وه‌ل ئازادى ملله‌ته‌گه‌مان وئنسانیه‌ت ئنسان وپه‌رش وبڵاوكردن گیان دیموكراسى  وسیه‌یمن ك باوه‌ڕ وه‌پى هاوردیمن وله‌خاترى هاتیمن".

زیاتریش وت :" مادده‌ى 142 ده‌ستوور ئه‌را ئه‌وه‌ هات ك ده‌ستووره‌گه‌ وه‌پى هامار یا ته‌عدیل بكریه‌ید، وئیمه‌یش كار ئه‌را ئه‌وه‌ كه‌یمن ئى هاماركردنه‌یله‌ ده‌سه‌وه‌ر بكه‌یمن ك كه‌رامه‌ت و ئازادى ئاده‌میزاد عیراقى مسۆگه‌ر كه‌ید".

غاده‌ العاملى به‌ڕێوه‌به‌ر جیوه‌جیكردن ده‌زگاى ڕووشنهویرى (المدى) ئاماژه‌دا وه‌ فره‌ له‌ ئجرائاته‌ زاڵمانه‌گان ئه‌نجوومه‌نه‌یل پارێزگایه‌یل و له‌وانه‌یش به‌غدا و وت:"یانه‌ گشتى ئجرائات ناده‌ستوورین، چوینكه‌ مافه‌یل مه‌ردم له‌ ئازادیه‌یل مه‌ده‌نى له‌ ده‌ستوور و جاڕنامه‌ى جه‌هانى ماف ئاده‌میزادیش ئاشكران، ئمڕوو ئیمه‌ داواى ئازادى كه‌یمن و له‌یرا باس له‌ شیه‌وكردن ماناگانى نیه‌كه‌یمن، چوینكه‌ له‌ ده‌ستوور چه‌سپیانه‌ و زوورمى عیراقیه‌یلیش ده‌نگ دانه‌سه‌ پى".

غاده‌ العاملى داوا له‌ كاروه‌ده‌سه‌یل ده‌وڵه‌ت عیراقى كرد وه‌ل ئه‌و كه‌سه‌یله‌و بووسیه‌ن ك جه‌خت له‌بان ئازادیه‌یل مه‌ده‌نى كه‌ن وهه‌میش داواكرد مقه‌یه‌تى بڕگه‌یل ده‌ستوورى بكه‌ن و وتیش:" گشت لایگ، هه‌ر له‌ سه‌رۆك كۆمار و سه‌رۆك په‌رله‌مان و سه‌رۆك وه‌زیره‌یل بایه‌ته‌ وه‌ل ئازادیه‌یل مه‌ده‌نیه‌و بووسیه‌ن ومقه‌یه‌تى گشت بڕگه‌یل ده‌ستوور بكه‌ن، چوینكه‌ دیاره‌ ك بڕیگ لایه‌ن خه‌ریكن وه‌شیوه‌یگ ئاشكرا ده‌ن له‌ ده‌ستوور، وهه‌میش داوا له‌لیان كه‌یمن كوتوپڕ بجمیه‌ن ئه‌را ئه‌وه‌گ وڵاته‌گه‌ تویش ئاژاوه‌یگ ناید و كاره‌گه‌ له‌یه‌ خه‌راوتره‌و نه‌ود، وه‌تایبه‌تى له‌شوون ئه‌وه‌گ فره‌ له‌وانه‌گ ده‌سڵات گرتنه‌سه‌ده‌س خه‌ریكن گاڵ ڕاى گشتى ده‌ن دژ وه‌ یه‌كێتى ئه‌دیبه‌یل و ده‌زگاى (المدى) و دژ وه‌ هه‌ر كه‌سیگ هاوخه‌مى كرد وه‌ل هه‌ڵمه‌ت وه‌رگرى كردن یا دیفاع له‌ ئازادیه‌یل".

غاده‌ العاملى زیاتریش وت :" په‌نا به‌یمنه‌ گشت ڕیگه‌یل قانوونى و ژیارى تا ڕیگه‌ له‌یانه‌ بووه‌سیمن، چوینكه‌ له‌ عیراق نوو، كه‌س ئه‌و هه‌قه‌ نه‌یرى ئه‌و ئازادیه‌یل مه‌ده‌نیه‌ زه‌فت بكه‌ید ك ده‌ستوور مسۆگه‌ریان كردیه‌".

له‌لاى خوه‌یه‌و عبدالهادى مشتاق سه‌رۆك ڕیكخریاى عیراقى ئه‌را ماف ئاده‌میزاد له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:" وه‌داخ گرانیگه‌و ئى كاره‌یل ناڕه‌وا خریانه‌ ژیر چه‌تریگ دینى، و ئیمه‌یش له‌ ڕیكخریایه‌یل شارسانى جه‌خت كه‌یمن له‌ بان مسۆگه‌ركردن ئازادى ئاده‌میزاد ومافه‌گانى و ئى كاره‌یله‌ مه‌حكووم كه‌یمن ك ئازادى مه‌ردم سنوورداره‌و كه‌ن، ئه‌و ئازادیه‌یله‌ ك ته‌عدا له‌ چشته‌یل پیرووز كه‌س نیه‌كه‌ن و ڕیز له‌ دابونه‌ریته‌یلیان گرن، وهه‌میش جه‌خت كه‌یمن له‌بان قانوونیه‌ت ئازادى گوزارش كردن یا ته‌عبیر له‌ ڕا چوینكه‌ له‌ ده‌ستوور گه‌ره‌نتى كریاس و وه‌وه‌یشه‌ قه‌بوول نیه‌كه‌یمن ك عیراق بكریه‌یده‌ ئه‌فغانستانیگ تره‌ك، ئیمه‌ ملله‌تیگیمن باوه‌ڕ وه‌ دیموكراسى هاوردیمن و دڵمان ئه‌را ئه‌وه‌ ژان كه‌ید ك بڕیگ لایه‌ن هه‌وڵ ئه‌وه‌ ده‌ن ئازادیه‌یل وه‌رته‌نگه‌و بكه‌ن و ته‌عدا له‌ بان بنه‌ڕه‌ته‌گان كوومه‌ڵگاى شارسانى بكه‌ن".