وه‌رج له‌ ده‌وڵه‌ت

سوبحى ساڵه‌يى

شه‌فه‌ق نيوز/ دووان له‌بان ئه‌وه‌ ناكووك نين ك حزبه‌يل سياسى له‌ كوردستان هه‌وه‌جه‌ وه‌ وسيانيگ مراجعه‌تكردن پرووسه‌ى راسكانى و ئازايگ ديرن وه‌ل شيه‌وكردنيگ قويل روێداگه‌يل ئه‌را گوزه‌ركردن وه‌ره‌و ئاينده‌، يه‌يش له‌وه‌ر ئه‌وه‌گ په‌يوه‌سه‌ مه‌سه‌له‌يليگ و ده‌ركردن برياره‌يليگ گونجياگ، ئمجا چ خوازيار قه‌ره‌بووكردن زه‌ره‌ده‌يل وه‌رين بدێ يا مه‌يل ئه‌وه‌ داشتوود ملله‌ت كوردستان نه‌خاده‌ ناو زه‌ره‌ده‌يل فيشتر، ئه‌ويش وه‌ چه‌وخشاننيگ له‌ به‌رنامه‌يلى له‌ڕى دقه‌ت له‌بان ته‌نازولات و ده‌سوه‌ركردن و دڵنيايى ئاڵشتكرياگ ناونيان، چوينكه‌ كوردستان كه‌شتييگه‌و گشت مه‌ردمه‌گه‌ى هه‌ڵگرتگه‌، ك ئه‌گه‌ر كه‌فته‌ ژير ئاو گشتى ئه‌خنكيه‌ن و ئه‌گه‌ريش گوزه‌ر كرد ئه‌را ده‌يشت ئه‌مان گشتى قورتار ئه‌دێ.

 

سياسه‌ت له‌ى قوناغه‌ ك جوور قوناغيگ وه‌رجه‌ ئاشكراكردن ده‌وڵه‌ته‌، هه‌وه‌جه‌ وه‌ مناورات زيره‌ك و هاوپه‌يمانێتى ديرێد وه‌گووره‌ى ئاڵشتكاريه‌يل و به‌رژوه‌نديه‌يل، ئاڵشتكارييش له‌ سياسه‌ت جوور ئه‌وه‌گ ئاشكراس مه‌سه‌له‌ى مه‌حاڵێگ نيه‌، به‌ڵكوو مومكنه‌، ئمجا ئه‌گه‌ر بڕێگ ئاڵشتكارى و راسه‌وكردن له‌ په‌يوه‌نديه‌يل ناونى حزبه‌يل سياسى دژه‌ يه‌كتر كريا، ئه‌وه‌ له‌ى حاڵه‌ته‌ ئه‌تويه‌نێد بڕه‌سێده‌ ئاسوو مقه‌يه‌تيكردن له‌بان جيوه‌جيكردن په‌يوه‌نديه‌يليگ ئه‌را باسكردن و تاوتويكردن باوه‌ته‌يليگ زينگ و ئامانجدار ك ئه‌را گشتلايگ گرينگه‌.

 

ئى قوناغه‌ قوناغيگ نموونه‌ييه‌ ئه‌را تاقيكردن هه‌وڵويسته‌يل و نيازه‌يل له‌لاى حزبه‌يل نه‌ته‌وه‌يى و ئسلامى و كه‌سايه‌تيه‌يل نيشتمانى، ك يا ئه‌وه‌سه‌ شيواز ديد مه‌بده‌ئى خه‌باتكارانه‌ى تازه‌ى نيشتمانى له‌لى ئه‌كه‌فێده‌و وه‌ پشتبه‌سان وه‌ زه‌مينه‌ى سه‌روه‌خوه‌يى و سه‌قامگيرى، يا ديديگ تر له‌لى ئه‌كه‌فێده‌و پشت وه‌ شيوه‌ى و ناوه‌ڕووكى ئه‌وه‌سێد له‌بان ئاشووگه‌رى و هه‌رزه‌كارێتى سياسى و ناشاره‌زايى و ناماريفه‌تى و خيانه‌ت و خوه‌د وه‌ده‌سوداين ئه‌را كه‌سه‌يل تر، ك ئى مه‌سه‌له‌يشه‌ وه‌ر كه‌رامه‌ت گوزه‌ر ناكاو كاره‌سات له‌لى ئه‌كه‌فێده‌ وه‌بوونه‌ى ده‌خاڵه‌ت دژايه‌تى و مه‌هانه‌يل و ناونيشانه‌يل تر ئاشكرايگ.

 

مه‌سه‌له‌ى سه‌ره‌كى ك بايه‌سه‌ له‌ى وه‌خته‌يله‌ ئاماده‌ بدێ، مه‌سه‌له‌ى ده‌سڵاته‌يل كوردستانى و ئه‌و هيزه‌يل سياسيه‌ نيه‌ ك حاڵ حازر حوكم ئه‌كه‌ن يا له‌ وه‌خته‌يل نزيكيگ، به‌ڵكوو وساننه‌وه‌ى بڕيگ په‌يوه‌نديه‌يل خراوه‌ له‌ناونى حزبه‌يل كوردستانى وه‌ل هاوردنه‌وه‌ى ئعتبار ئه‌را ئاماده‌بوين كورد، وه‌تايبه‌ت له‌ وه‌ختيگ ك گفتگوو ناونى لايه‌نه‌يل كوردى روى له‌ نيازه‌يل خاس ئه‌كاو مزگانى لاوردن ئه‌و جه‌وه‌ڵ يه‌خينه ئه‌ياد ك كه‌فته‌سه‌ ناونى بڕيگ له‌ لايه‌نه‌يل وه‌ل نزيكه‌وبوين جيوه‌جيكردن له‌يه‌كڕه‌سينه‌وه‌يل و چاره‌سه‌ر ناكووكيه‌يل ناونى لايه‌نه‌يل دژه‌ يه‌كترى له‌بان بنه‌ماى گله‌وخواردن ئه‌را شيرازه‌و تيكه‌ڵبوين و چاره‌سه‌ر كيشه‌يل و دقه‌تكردن له‌بان پاكه‌وكردن كيشه‌يل له‌ڕى گورجكردن ديداره‌يل پاك و ئاشكرا و مراجعه‌ت قويل ئه‌را سروشت روێداگه‌يل گورج له‌ ناوچه‌گه‌و دويره‌وخستتن وه‌يادهاوردن هووكار كيشه‌يل و لايه‌نه‌يل ده‌سپيشخه‌ر كاراكردنى، يا وازيكردن وه‌ وه‌ره‌قه‌ى دانيشتن سه‌ركه‌فتگ ك مه‌رجه‌يلى فه‌رز ئه‌كا له‌بان مێز دانيشتن، يا ئه‌و زه‌ره‌دمه‌نه‌ ك قه‌بول وه‌ مه‌رجه‌يل ئه‌كا جوور ئه‌وه‌گ قوناغه‌گه‌ ئه‌خوازێده‌ى و دويره‌وكه‌فتن وه‌ گووره‌ى توانا له‌ كيشمه‌كيش راى شه‌خسى و كيشمه‌كيش حزبى و گشت هووكاره‌يل گرژى و ئزدواجيه‌ى باوه‌ڕه‌يل و شيوازه‌يل وه‌خاتر دعايه‌كردن رووح له‌يه‌كوه‌خشين و داناين ستراتيجيه‌ت يه‌كگرتگ ك په‌يوه‌نديه‌يل ناونى ريكه‌و بخا له‌لايگ و كار ده‌سه‌جه‌مييش وه‌خاتر بته‌وكردن و په‌ره‌داين په‌يوه‌نديه‌يل وه‌ل ده‌وڵه‌ته‌يل و ملله‌ته‌يل هاوسا ئه‌نجام بيه‌ێد له‌ڕى كوڵه‌وكردن ڕى و وه‌خت له‌ جموجويلمان وه‌رانوه‌ريان و له‌ بنياتناين كاره‌يليگ بنه‌مايى ئه‌را قه‌واره‌گه‌مان له‌لايگ تره‌و.

 

بيگومان ئى رينمايه‌يليشه‌ هه‌وه‌جه‌ وه‌ لياقه‌و ئازايه‌تى و دانايى و ماريفه‌ت دبلۆماسى ديرێد و ناوه‌ى دڵنياييه‌و هه‌واڵه‌ بكريه‌ێد ئه‌را ئه‌و حكومه‌ته‌يله‌و ئه‌را ئه‌و كورده‌يله‌ له‌ورا وجوود ديرن، چوينكه‌ ئه‌و به‌رژه‌وه‌نديه‌يل گرينگه‌ ك په‌يوه‌سمان ئه‌كا وه‌ل ملله‌ته‌يل هاوسا وه‌ ئاسانكارى گه‌شت و بازرگانى و پيشه‌سازى و كشتوكاڵ و پزيشكى و گه‌شتيارى ده‌س وه‌پى ئه‌كا و وه‌ به‌شدارييان له‌ ئاوه‌دانى و بنياتناين و نوڕستن مه‌سه‌له‌يل وه‌ واقعيه‌ت كووتايى وه‌پى ئه‌ياد وه‌خاتر ديدو نوڕستن ره‌وامان له‌ ئاشكراكردن سه‌روه‌خوه‌يى.

سوبحى ساڵه‌يى