ژان كامیان فیشتر بوى، جه‌مڕه‌ویه‌ ملیۆنیه‌گه‌ى 1991 یا كووچ وه‌پیكردنه‌گه‌ى 1980؟

شفق نيوز

ته‌نانه‌ت له‌بان كلتوور و ناسنامه‌و ژیان ئى ملله‌ته‌ ك هه‌ق سروشتى خوه‌یانیش له‌ هویچ بواریگه‌و وه‌پیان نه‌دریاو هه‌ر رژیمیگ له‌و وڵاته‌یله‌ ك خاك كورد داگیر كردگه‌ هه‌میشه‌ هه‌وڵ ئه‌وه‌ داگه‌ نه‌ته‌وه‌ى كورد له‌ناو نه‌ته‌وه‌ى خوه‌ى بتاونیده‌و، ك ئه‌را ئى مه‌به‌سیشه‌ چه‌نه‌ها ڕى جیاجیا گرته‌سه‌ وه‌ر.

 

ملله‌ت كورد ژیر ده‌سه‌ى نه‌ته‌وه‌یل تر جوور ئه‌وه‌ك ئاشكراو دیاره‌ دویاى داگیركارى خاك و نیشتمانیان دى كه‌فتنه‌سه‌ جموجویل و هه‌وڵداین و خه‌بات ژیر وه‌ژیر ئه‌را وه‌ده‌سهاوردن ئازادى و هه‌قه‌یلیان، ك هه‌رچه‌نى تائیسه‌یش بیجگه‌ كوردستان عراق به‌شه‌یل تر خاك كوردستان هیمان له‌ژیر ساى ئه‌و رژیمه‌یل بیگانه‌ بریه‌نه‌ ریه‌و ك جڵه‌و ده‌سڵات ها ده‌سیانه‌و، وه‌لى رویداگه‌یل ناوچه‌ى خوه‌رهه‌ڵات ناوین زه‌نگیگه‌ ئه‌را وه‌رچه‌رخان و ئاڵشتكارى، ك وه‌و خاتریشه‌ ئومید ئه‌وه‌ كریه‌ید كورد له‌ پارچه‌یل تر كوردستانیش نزیكه‌و بوون له‌ خوه‌ر ئاسوو.

 

وه‌لى ئیمه‌ له‌یرا باس له‌ وه‌سه‌رهات پیكهاته‌یگ كورد عراق كه‌یم له‌ ماوه‌ى سه‌ره‌تاى ساڵه‌یل هه‌یشتاى وه‌رین وه‌ به‌راوه‌رد وه‌ل جه‌مڕه‌ویه‌ ملیۆنیه‌گه‌ى ساڵ 1991 ك بویه‌ مایه‌ى مایه‌ى كووچكردن ملیۆنه‌ها كورد وه‌ره‌و مه‌رز ئیران و توركیاو شوونه‌یل تر.

 

له‌ سه‌ره‌تاى مانگ نیسان 1980 له‌سه‌رده‌م رژیم به‌عس، كووچ وه‌پیكردن كورده‌یل فه‌یلى جیا له‌گشت روداگیگ تر، گه‌وراترین كاره‌سات بوى دژ ئنسانیه‌ت، چوینكه‌ مه‌رام حكوومه‌ت به‌عس له‌ى كرده‌وه‌ى نائنسانیه‌ ئه‌وه‌ بوى كووچ و مه‌رگ وه‌یه‌ك بڕه‌سنیدو پیكهاته‌یگ ره‌سه‌ن و دڵسووز نیشتمان له‌تى له‌ناو بووه‌ید، ئه‌وه‌ بوى خیزانه‌یل كورد فه‌یلى گرته‌ ئامانج و خوسه‌و كینه‌ت خوه‌ى رشانه‌ ئى مه‌ردمان ره‌سه‌ن عراقه‌و پیسترین ره‌فتار ده‌رهه‌قیان ئه‌نجام دا، ك دویاى زه‌فتكردن ماڵ و موڵك و دارایى و به‌ڵگه‌یلیان ره‌وانه‌ى مه‌رزیان كرد و له‌واریش مین له‌ چاڵ نریاگ لاشه‌ى هه‌زاران له‌لیان كرده‌ قه‌ره‌برویت و گشت روڵه‌یل جایه‌ڵ جوانیانیش خریانه‌ زیندان و بى سه‌روشوون كریان، ماناى ئه‌وه‌سه‌ ئه‌و پیكهاته‌ى كورد فه‌یلیه‌ ك هه‌زاران خیزان بوین له‌و سه‌رده‌مه‌ زیاتر له‌ نیمه‌یان گیان له‌ده‌سدان و ئه‌و باقیه‌گه‌یانیش كه‌فتنه‌ وه‌ر سزاى به‌دبه‌ختى و مه‌ینه‌تى ئه‌را ساڵه‌یل فره‌یگ ، ك ته‌نانه‌ت له‌ناو كه‌مپه‌یلیش هه‌ر ژان و ئازار كریا نسیویان و مه‌ردمان فره‌یگیش له‌لیان هه‌ر وه‌و ناڕه‌حه‌تى و ئازاره‌و ماڵئاواى له‌ دونیا كردن وه‌بى ئه‌وه‌ك چه‌ویان بكه‌فیده‌ جگه‌رگووشه‌یل زیندانیكریاگ و بى سه‌روشوونه‌یلیان.

 

وه‌لى ئه‌گه‌ر ته‌ماشاى جه‌مڕه‌ویه‌گه‌ى ساڵ 1991 بكه‌یم ك خوه‌میش یه‌كیگ بویم له‌و مه‌ردمه‌ ك كووچ جه‌مڕه‌وى وه‌پیمان كریا له‌لایه‌ن ده‌سڵات به‌عس سته‌مكار، چوینكه‌ نیشته‌جى یه‌كیگ له‌شاره‌یل كوردستان بویم، ئه‌و جه‌مڕه‌ویه‌ له‌چه‌و كووچ وه‌پیكردن كورده‌یل فه‌یلى جیاواز بوى و تاڕاده‌یگ راسه‌ قوربانى فره‌یگ له‌لى كه‌فته‌و ك سه‌ر له‌مه‌ردم شیویاو بان گرتنه‌وه‌ر وه‌ره‌و مه‌رز وڵاته‌یل هاوسا، وه‌لى وه‌و جووره‌ نه‌وى ك پیاوه‌یل به‌عس راسه‌وخۆ ده‌رهه‌ق كورده‌یل فه‌یلى ئه‌نجامى دیان و سزاى ئى پیكهاته‌ى زوڵمكلیكریاگه‌ دیان له‌ تیه‌ریكى شه‌وه‌یل زمسان وه‌بى هویچ خواردن و خوه‌راكیگ  ك سه‌ر زه‌وى و ئاسمان له‌لیان نیشته‌ یه‌ك، چوینكه‌ له‌ جه‌مڕه‌ویه‌ ملیۆنیه‌گه‌ى 1991 حكوومه‌ت عراق هه‌ر له‌دویره‌و توپواران شوونه‌یل كورد نشین كریادو له‌وه‌ختیگ مه‌ردمه‌گه‌ ره‌سیه‌ مه‌رز دى سوپاى حكوومه‌ت نه‌ویرست زیاتر نزیكه‌و بوود، وه‌لى كورده‌یل فه‌یلى له‌ساڵ 1980 هیمان هیز سه‌دام له‌گشت عراق ده‌سڵات داشت و له‌ سزاداین كورده‌یل فه‌یلى هه‌ڵه‌په‌ڵه‌ نه‌كردو گشت ڕى و بانیگ ئه‌ڕاى واز بوى و هه‌ر له‌وه‌ر ئه‌وه‌یش وه‌گشت شیوازیگه‌و كورده‌یل فه‌یلى چه‌وسانه‌وه‌و له‌ژیر ئازار و شكنجه‌ى فره‌یگ زوورمیان گیان له‌ده‌سدان و دویاى ئه‌وه‌یش فره‌یگ له‌لیان له‌ تاقیگاى مادده‌یل كیمیاوى و بایلۆجى هاوریانه‌ كار ، ئنجا ئایا ژان كامیان فیشتر بوى له‌و هه‌مگه‌ ده‌رده‌سه‌ریه‌ ك هاته‌ بان كورد فه‌یلى له‌و ساڵه‌یل پڕ كاره‌سات و خویناویه‌ ك دوشمن ئه‌نجامى دا ده‌رهه‌قیان؟.

 

جه‌ماڵ ئه‌ركه‌وازى