جايه‌ڵه‌يل سپايكه‌ر ئمڕوو..جايه‌ڵه‌يل كورد فه‌يلی دويه‌كه‌

شفق نيوز

له‌ لێدوانه‌يل وه‌زير وه‌رگرييش ك باسی كرد له‌ناو ئه‌نجوومه‌ن نوێنه‌ره‌يل ئه‌وه‌ ده‌رخست ك ليژنه‌يليگ دامه‌زرياگه‌ ئه‌را په‌يجووريكردن له‌ مه‌سه‌له‌گه‌، يه‌يش مانای ئه‌وه‌سه‌ ك مه‌سه‌له‌گه‌ ئه‌كه‌فيده‌ تاقه‌يل فه‌رامووشكردن نويسينگه‌ی ئه‌و ليژنه‌يله‌ ك كه‌س نازانيد چه‌ وه‌سه‌ری ئه‌ياد.

ئمجا هه‌مان رويداگ له‌ساڵ ١٩٨٠ هاته‌ تويش كورده‌يل فه‌يلييش، له‌وه‌ختيگ ك كووچ زووره‌ملی وه‌ هه‌زاران خيزان كورد فه‌يلی كريا له‌ به‌غداو كووت و عماره‌و شوونه‌يل تر له‌ پاريزگاو قه‌زاو ناحيه‌يل ناوڕاس و باشوور عراق.

له‌و سه‌رده‌مه‌ هيزه‌يل ئاسايشی رژيم سه‌دام ده‌سكرده‌ گرتن هه‌زاران جايه‌ڵ جوان و له‌ زيندانه‌يل بيسه‌روشوونيان كردو بوينه‌ شه‌هيد و قوربانی له‌بان ده‌س چه‌ته‌يل به‌عس سه‌دامی.

دی هه‌رچه‌نی ئه‌نجوومه‌ن نوێنه‌ره‌يل عراقی له‌ خول وه‌رينی ئه‌وه‌ جيگير كرد ك كيشه‌ی كورده‌يل فه‌يلی كيشه‌ی له‌ناوبردن ره‌گه‌زی بويه‌، وه‌لی ئه‌و ڕی وشوونه‌يله‌ ك له‌لايه‌ن دام و ده‌زگايه‌يل حكوومی له‌وه‌ر گيرياگه‌ له‌ی باوه‌ته‌و له‌ ئاست قه‌واره‌ی ئه‌و تاوانه‌ نه‌وی و هيمان مافه‌يل كورد فه‌يلی فه‌رامووش كرياگه‌و له‌و وه‌ختيشه‌ نويسايم و باس كرديم ك پشتگووشخستن و خه‌مسه‌ردی له‌ جيوه‌جيكردن مافه‌يل كورد فه‌يلی و چه‌وپووشی له‌ سزاداين ئه‌و تاوانباره‌يله‌ ك وه‌رپرس بوينه‌ له‌بان كووچ وه‌پيكردن فه‌يليه‌يل تارمايی ئه‌يه‌ريده‌ بان كوومه‌ڵگای عراقی.

ئه‌وه‌سه‌ پياوه‌يل چه‌ته‌ی به‌عس و لايه‌نگره‌يليان تاوانيگ تر ئه‌نجام ده‌ن جوور كورته‌ تاوانيگ له‌ تاوان له‌ناوبردن كورده‌يل فه‌يلی و شيوه‌يگه‌ له‌و كرده‌وه‌يله‌ ك ئه‌نجاميدان ده‌رهه‌ق هه‌زاران جايه‌ڵ جوان كورد فه‌يلی له‌ كوشتن و برين و قه‌وره‌يل وه‌جه‌م.

ئمجا تاوانباره‌يل زانستن ك سزا نادريه‌ن و كه‌سه‌يليگ هه‌ن مقه‌يه‌تی له‌ليان بكا له‌ ده‌سڵات ياساو سياسيه‌يل و حكوومه‌ت و دادگايش كارئاسانی ئه‌را ئه‌و تاوانباره‌يله‌ ئه‌كه‌ن ك پيسترين تاوان ده‌رهه‌ق كورده‌يل فه‌يلی ئه‌نجام دان و نزيكه‌ی ده‌ هه‌زار جايه‌ڵ له‌ليان كوشتن، گشت ئه‌يانه‌ خاسترين به‌ڵگه‌س ئه‌ڕايان تا وه‌ره‌ده‌وامی بيه‌نه‌ تاوانه‌يليان ده‌رهه‌ق رووڵه‌يل ملله‌تمان و يه‌يش تاوان غه‌دركاری بوی ك له‌ی دوياخره‌ ده‌رهه‌ق جايه‌ڵه‌يلمان له‌ بنگه‌ی سه‌ربازی سپايكه‌ر ئه‌نجامی دان، چوينكه‌ ئه‌و تاوانباره‌يله‌ دڵنيايی وه‌رگرتنه‌ له‌ سزا.

ئه‌گه‌ريش بخوازيم ئمڕوو ئه‌و تاوانباره‌يله‌ بخه‌يمنه‌ وه‌ر پرس وپرسكاری، ئه‌وه‌ بايه‌سه‌ دوسيه‌ ئه‌رايان واز بكريه‌يد هه‌ر له‌ يه‌كه‌م تاوانيگه‌و ك رژيم سه‌دام و لايه‌نگره‌يلی ئه‌نجامی دانه‌ ده‌رهه‌ق كورده‌يل فه‌يلی و قه‌ره‌بوو كه‌س وكاريان بكريه‌يد له‌بان ئه‌و هه‌مگه‌ مه‌ويسی و زه‌ره‌ده‌يله‌و گشت ماڵ و موڵكه‌يل زه‌فتكرياگيان باريه‌يده‌و ك هيمان داروده‌سه‌يل سه‌دام له‌تی نيشته‌جيين و داگيری كردنه‌.

مادام له‌ عراق ڕی وه‌ ياسا نادريه‌يد ريڕه‌و خوه‌ی بگريده‌ وه‌ر و سزای تاوانباره‌يل بيه‌يد، مانای ئه‌وه‌سه‌ تاوان سپايكه‌ريش نادێده‌ دويا تاوان ده‌رهه‌ق كه‌س وكار و ملله‌تمان له‌لای ئه‌و تاوانباره‌يله‌ ك وه‌رده‌وامی دانه‌ ژيان له‌سای ئه‌نجامداين تاوان.

موئه‌يد عه‌بدلستار

ج . أ