ده‌سڵات و ڕووژنامه‌نویسه‌یل هه‌رێم "قانوون كار ڕووژنامه‌نویسى" شكنن!!

شفق نيوز

وه‌ " هه‌ڕه‌شه‌" و " تووقانن" كه‌ن دژ وه‌ شماره‌یگ له‌ كه‌ناڵه‌یل ڕه‌سانن له‌ هه‌رێم كوردستان وه‌ بوخت ناوزڕانن و خه‌راوداین وه‌ ده‌سڵاتداره‌یل هه‌رێم ك یانیش له‌ دادگا شكاتیان كردنه‌، و یه‌یشه‌ له‌ لاى بڕیگ له‌ ڕووژنامه‌نویسه‌یل وه‌و مه‌مه‌ره‌سه‌ ك له‌ ئازادى كه‌مه‌وبكریه‌ید و ده‌سڵات چوارم له‌ هه‌رێم وه‌پى بیده‌نگه‌و بكریه‌ید.

له‌ى باوه‌ته‌ دكتۆر ئه‌حمه‌د ئبراهیم وه‌رتێ نوێنه‌ر په‌رله‌مان كوردستان و ئه‌ندام لوجنه‌ى قانوونى له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:"قانوون ڕیكخستن كار  ڕووژنامه‌نویسى له‌ هه‌رێم كوردستان، ئازادیه‌یل ڕووژنامه‌نویسى مسۆگه‌ر كردیه‌، و وه‌ مه‌رجدار نه‌كردنیان ئاماژه‌ دایه‌، له‌وه‌ر ئه‌وه‌ هه‌ر هه‌ڕه‌شه‌یگ ئاڕاسته‌ى ڕووژنامه‌گه‌رى و ڕووژنامه‌نویسه‌یل بكریه‌ید چه‌واشه‌كارى ئى قانوونه‌سه‌ و ئه‌و قانوونه‌گانتر هه‌رێم كوردستان ك وه‌ هه‌ڕه‌شه‌داین قه‌بوول نیه‌كه‌ن".

ئه‌وه‌یشه‌ ڕووشنه‌وكرد ك :" جووریگ له‌ چه‌واشه‌كارى قانوون ڕیكخستن كار ڕووژنامه‌نویسى هه‌س؛ چ له‌ لایه‌ن خود ڕووژنامه‌نویسه‌یل، و چ له‌ لایه‌ن ده‌سڵات هه‌رێم".

له‌باوه‌ت ئه‌وه‌گ بڕیگ ڕووژنامه‌ نویساننه‌سه‌ى ك مه‌مه‌ر ئه‌و شكاتكاریه‌یله‌ دژ وه‌ ڕووژنامه‌نویسه‌یل كه‌مه‌وكرد ئاست ئازادیه‌یله‌، ك دویاجار ئه‌وه‌ ڕه‌سنێد ك توان ده‌سڵات چوارم بیده‌نگ بكه‌ن، ئه‌وه‌ ئاشكراكرد ك :" نه‌بایه‌د گشتاندن یا تعمیم ئى قسه‌ بكریه‌ید، چوینكه‌ ده‌یان ڕووژنامه‌ و كه‌ناڵه‌یل میدیایى هه‌س وه‌ئازادى كار كه‌ن، وه‌گووره‌ى قانوون كار ڕووژنامه‌نویسى".

زیاتریش وت ك :" ده‌سه‌ڵاتدارى هه‌رێم هانه‌بان ئه‌و باوه‌ڕه‌ ك ناوزڕانن و خه‌راوداین و تانه‌داین هه‌س له‌لایه‌ن بڕیگ له‌ ڕووژنامه‌نویسه‌یل وه‌ڕیگه‌ى ئه‌و خه‌وه‌ر و وتار و ڕاپۆرته‌یله‌ ك باس كاروه‌ده‌سه‌یل و ده‌سڵاتداره‌یل هه‌رێم كه‌ن؛ ئه‌وانیش له‌ لاى خوه‌یانه‌و وه‌ خه‌وه‌ره‌یل درووكانى زاننه‌ى، ك هویچ بنه‌ڕه‌تیگ له‌ ڕاسى نه‌یرن". و ئه‌وه‌یشه‌ وت ك :" ئه‌و ڕووژنامه‌نویسه‌یله‌ ك ئى جووره‌ خه‌وه‌ره‌یلیگ بڵاو كه‌ن وه‌ ئازادى ڕا شماره‌ى كه‌ن و ئاماده‌یشن له‌وه‌رده‌م دادگا بووسیه‌ن".

جه‌خت له‌ بان ئه‌وه‌یشه‌كرد ك :" بڕیگ له‌ ڕووژنامه‌ و كه‌ناڵه‌یل ڕه‌سانن وتار و خه‌وه‌ر و ڕاپۆرته‌یلیگ بڵاو كه‌ن، تویه‌نیمن وه‌ ناوزڕانن و خه‌راوداین بى بنه‌مایگ دژ وه‌ ده‌سڵات و دام و ده‌زگایه‌یل حكوومه‌ت شماره‌یان بكه‌یمن".

ئاماژه‌یش وه‌وه‌ دا ك :" هه‌ردوگلا هه‌ق ئه‌وه‌ دیرن په‌نا بووه‌نه‌ قانوون، چ ده‌سڵاتداره‌یل بوود له‌ باوه‌ت ئه‌و ناوزڕاندن و خه‌راوداینه‌ ك دژیان نویسریه‌ید، یا له‌ لایه‌ن ڕووژنامه‌نویسه‌یله‌و بوود، ئه‌گه‌ر شعوور وه‌ هه‌ڕه‌شه‌ و تووقانن كردن".

له‌ لاى خوه‌یه‌و فه‌رهاد عه‌ونى نه‌قیب ڕووژنامه‌نویسه‌یل كوردستان له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشى :" هویچ هه‌ڕه‌شه‌ و تووقاننیگ دژ وه‌ ڕووژنامه‌نویسه‌یل نیه‌، وه‌لى چه‌ن شكاتیگ دژ وه‌ شماره‌یگ ڕووژنامه‌ى هه‌رێم تۆمار كریاس، چوینكه‌ وتار و خه‌وه‌ر و ڕاپۆرته‌یل هه‌ڵواسیاى و دویر له‌ ڕاسى بڵاو كردنه‌".

زیاتریش وت :" وه‌گووره‌ى قانوون كار ڕووژنامه‌نویسى شماره‌ 35 ساڵ 2007، هه‌ق هه‌ر كه‌سیگه‌ تویش زه‌ره‌د و ناوزڕانن و خه‌راوداین هاتیه‌ له‌ لایه‌ن هه‌ر ڕووژنامه‌ و كه‌ناڵیگ ڕه‌سانن، شكات ئه‌و كه‌سه‌ بكه‌ید ك ئه‌و كاره‌ ئه‌نجام دایه‌".

ئه‌وه‌یشه‌ ڕووشنه‌وكرد ك :" په‌نابردن ئه‌را دادگا مه‌عناى ئه‌وه‌ نیه‌ ك هه‌ڕه‌شه‌ و تووقاننه‌، ئه‌را نموونه‌ له‌ فه‌ره‌نسا ده‌یان شكات دژ وه‌ ڕووژنامه‌ و كه‌ناڵه‌یل ڕه‌سانن تۆمار كریاس".

ئه‌ڵاجه‌وییشى وه‌وه‌ هات ك ئه‌و شكاته‌یله‌ ك دژ وه‌ ڕووژنامه‌نویسه‌یل هه‌رێم تۆمار كریانه‌، وه‌ هه‌ڕه‌شه‌ و تووقانن شماره‌ بكریه‌ن.

زیاتریش وت ك:" ئه‌و ڕووژنامه‌یله‌ ك شكاتیان كریاس هیمان وه‌رده‌وامن له‌ كار خوه‌یان و نه‌وسیانه‌، چوینكه‌ قانوون كار ڕووژنامه‌نویسى قه‌یه‌خه‌كردن كار و به‌شه‌وكردن ڕووژنامه‌یل قه‌یه‌خه‌ كه‌ید". و ئه‌وه‌یشه‌ پرسى ئه‌را له‌ شكات بترسیه‌ن، چوینكه‌ قه‌زا له‌ كوردستان بیلایه‌نه‌ و كه‌س ده‌سڵاتى نه‌یرى و كه‌سیش نیه‌تویه‌نى ده‌س بخه‌یده‌ ناو كاروبارى؟

ئه‌وه‌یشه‌ وت ك :" بایه‌ته‌ له‌ ئۆروپا و وڵاته‌یل پیشكه‌فتى هووكاره‌ بویمن و سوود وه‌ربگریمن له‌ باوه‌ت مه‌سه‌له‌ى شكاته‌یل قه‌زایى، چوینكه‌ ڕووژنامه‌نویسى ئازاده‌ له‌وه‌گ نویسنێده‌ى له‌ هه‌رێم كوردستان، و هه‌رله‌یوا هه‌ر هاووڵاتییگ هه‌ق خوه‌ى دیرێ وه‌ختى هه‌ست وه‌ ناوزرانن و خه‌راوداین كرد په‌نا بووه‌یده‌ دادگا، یه‌یشه‌ هه‌ق ده‌ستووریگه‌ ئه‌را گشتلایگ مسۆگه‌ر كریاس".

 

یاسر عماد