كه‌ى بریار یاساى ناسنامه‌ دریه‌ید؟

شفق نيوز

داواى داناین و كار وه‌پیكردنى كریه‌یدو گرینگیه‌گه‌یشى ها له‌ هه‌وه‌جه‌كردنى و هه‌ر له‌وه‌ر ئه‌وه‌یش یاسا ئه‌ڕاى دانریه‌ید نه‌ك له‌ژیر فشار هه‌وه‌جه‌كردن وه‌ ته‌نیا، به‌ڵكوو له‌وه‌ر مكوڕبوین و داواكارى چینه‌یل دیاریكریاگیگ له‌ ملله‌ت.

وه‌لى ئه‌وه‌ك له‌عراق رویده‌ید ئه‌ڵڵاجه‌وى و جیاس له‌ ده‌وڵه‌ته‌یل تر جه‌هان وه‌تایبه‌ت له‌ مه‌سه‌له‌ى بریار و داناین یاسا، چوینكه‌ له‌وه‌ختیگ دانریه‌ید حكوومه‌ت نه‌ف له‌و یاسا  وه‌ربگرید و ترس ئه‌وه‌یش دیرید زه‌ره‌د بكاو ملله‌تیش بیجگه‌ سه‌بركردن چشتیگ تر نه‌یرید، له‌وانه‌یش مه‌سه‌له‌ى ناسنامه‌ ك پیكهاته‌یلیگ وه‌گشت باوه‌ڕیگه‌و خوازیار داناین یاسایگن ئه‌ڕاى، یه‌یش له‌وه‌ختیگ ك زوورم ئه‌ندامه‌یل په‌رله‌مان و حكوومه‌ت و تا ڕاده‌یگیش وه‌رپرسه‌یل ئى مه‌سه‌له‌ ره‌ته‌و كه‌ن و ملله‌تیش هه‌وه‌جه‌ وه‌پى دیرید.

وه‌ل ئه‌وه‌یشا ئاشكراس ك زوورم ئه‌وانه‌ك ئمڕوو ده‌سڵاتدارن تا دویه‌كه‌ له‌ ده‌یشت عراق بوینه‌و له‌ ده‌وڵه‌ته‌یل تر نیشته‌جى بوین و ناسنامه‌ى ئه‌و ده‌وڵه‌ته‌ وه‌رگرتنه‌ وه‌ گووره‌ى یاسا، ئنجا له‌وه‌ختیگیش هاتنه‌و ئه‌را عراق مقه‌یه‌تى له‌ ناسنامه‌ى ئه‌و ده‌وڵه‌ته‌یله‌ كردن ك له‌تى ژیانه‌و ماناى داشتن دو ناسنامه‌یى خاس زانن چه‌سه‌و له‌لیانیش هانه‌ پۆسته‌یل باڵا له‌ده‌وڵه‌ت و غه‌ڵه‌ت و گه‌ناته‌كاریه‌یل فره‌یگیش له‌وه‌خت پۆستدارییان خسته‌یانه‌ وه‌رده‌م دادگاو ناچار بوین عراق بیلنه‌ جى و هه‌یواینه‌و ئه‌را ئه‌و ده‌وڵه‌ته‌یله‌ ك زویتر له‌تى بوینه‌و شایه‌تیده‌ر فره‌یگیش هه‌س له‌ى باوه‌ته‌و، یه‌یش له‌وه‌ختیگه‌ ك یاساى ناسنامه‌ هویچ وه‌زیفه‌یگ نه‌بایه‌د به‌یده‌ كه‌سیگ دو ناسنامه‌ داشتوود ته‌نیا ئه‌وه‌سه‌ ك بایه‌سه‌ واز له‌ ناسنامه‌ بیگانه‌گه‌ى بارید.

ئنجا له‌یرا سه‌ختى و گرفت داناین ئى یاسا ده‌ركه‌فیدو هه‌ر له‌وه‌ر ئه‌وه‌یش ریگرى له‌ داناین بڕیارداینى كریه‌ید چوینكه‌ ئه‌وانه‌ك دو ناسنامه‌ داشتنه‌و پۆست حكوومه‌ت گرتنه‌سه‌ ده‌س له‌تى زه‌ره‌دمه‌ن بوون وه‌ گووره‌ى یاسا.

ئه‌گه‌ریش بایم و باس ئه‌وانه‌ بكه‌یم ك ئمڕوو پۆسته‌یل باڵایگ ها ده‌سیانه‌و، دوینیم كه‌م له‌لیان هه‌س دو ناسنامه‌ نه‌یاشتوود، زوورم وه‌زیره‌یل و سه‌فیره‌یل ناسنامه‌ى بیگانه‌ دیرن بیجگه‌ ناسنامه‌ ره‌سه‌نه‌گه‌ى خوه‌یان، ئنجا ئایا ڕى وه‌ى یاسا دریه‌ید ریڕه‌و خوه‌ى بگریده‌ وه‌ر و جیوه‌جى بكریه‌ید و ئه‌و وه‌رپرسه‌یلیشه‌ ته‌نیا وه‌ ناسنامه‌ى عراقیه‌و له‌ پۆسته‌یل خوه‌یان بمینن و نه‌تویه‌نن له‌وه‌خت گه‌ناته‌كارى و غه‌ڵه‌ته‌یلیان بهه‌یوان ئه‌را ده‌وڵه‌ته‌یل تر و بكه‌فنه‌ ده‌س دادگا؟

وه‌ باوه‌ڕ ئیمه‌ ئه‌رك ئه‌نجوومه‌ن نوێنه‌ره‌یل ئى كاره‌ یه‌كلاوه‌ ئه‌كا له‌گشت چشتیگ نا دروس و نانیشتمانى و مكوڕبوینى له‌بان داناین ئى یاساو داناین خشته‌یگ وه‌ختى  ئه‌را جیوه‌جیكردنى و زاڵبوین له‌بان ئى حاڵه‌ت دو ناسنامه‌ییه‌ له‌لاى گه‌ورا وه‌رپرسه‌یل و له‌هه‌مان وه‌خت بایه‌سه‌ له‌بان ئه‌نجوومه‌ن ئیسه‌ى په‌رله‌مان رازى بوود وه‌ حوكم و خواست ملله‌ت .

كازم شه‌مه‌رى

ج. ا