قوڵنگه‌ى ویرانكارى و په‌یك مه‌سى

شفق نيوز

خوه‌ى له‌بوونه‌و دانیشتنه‌یل جووراوجوور دوینێده‌و و فره‌جاریش هه‌ر خود ئه‌و كه‌سه‌یله‌نه‌ ك هه‌میشه‌ له‌تى گرده‌و بوون وه‌بى ئاڵشتكارى.

ئمجا له‌یره‌ پرسیاریگ خوه‌ى خه‌ێده‌ ڕوى، ك ئه‌ویش ئه‌وه‌سه‌ ئى كیشه‌ى ئیمه‌ ئه‌راچه‌ پیشكه‌فتن وه‌خوه‌یه‌و نیه‌وینێد؟ ئه‌راچه‌ فه‌رامووش كردن ئاشكرایگ ده‌رهه‌قى دوینیم؟

زوورم ئه‌و كه‌سایه‌تى و دانیشتنه‌یله‌ ك گه‌ردنه‌ شوون هه‌قه‌یل ماددى و گیانى فه‌یلیه‌یل دویاى ئه‌و هه‌مگه‌ زوڵم ساڵه‌هاى ساڵه‌یله‌، هیمان هه‌ر باس له‌ ته‌وه‌ره‌یل وه‌رته‌نگیگ  كردنه‌و له‌گشت حاڵه‌تیگ ته‌نیا باسكردن یا موجامله‌یگ له‌لى كه‌فتیه‌سه‌و دویر له‌خوه‌ندنه‌وه‌و به‌ڵگه‌و تویژینه‌وه‌. وه‌ل ئه‌وه‌یشا كه‌م و كوڕى ئاشكرایگ  وه‌ دى ئه‌كریه‌ێد له‌باوه‌ت  هویروڕاى رووڵه‌یل چینه‌گه‌مان له‌ نویسه‌ر و تویژه‌ر و لێكۆڵه‌ره‌یل له‌چوارچیوه‌ى مه‌سه‌له‌ى فه‌یلى و دویره‌وخستنى و چوینیه‌تى ره‌سین ئه‌را ئه‌و ده‌رئه‌نجام خاسه‌ له‌بان زه‌وى واقع له‌وه‌رانوه‌ر به‌رهه‌مه‌یل فره‌یگ له‌مه‌یدانه‌یل تر. وه‌لى بڕیگ تر له‌وانه‌ك وه‌رگه‌ى وه‌رپرسیاریه‌تى نیه‌گرن وه‌ جووریگ ك وه‌ ده‌سیگ قوڵنگه‌ى ویرانكارى ئه‌ڵگرتنه‌و وه‌و ده‌سه‌گه‌یانیش شیشه‌یگ ئاڵكوڵ، ك وه‌رده‌وامن له‌مه‌یل یا هوایه‌ت خوه‌یان له‌كه‌مه‌وكردن ده‌ور ئه‌وانه‌ك خوازن كاریگ بكه‌ن یا چشتیگ پیشكه‌ش بكه‌ن، ته‌نانه‌ت ئه‌گه‌ر گیانییش بوود، نووڕید كردنه‌سه‌ى عاده‌تیگ و خه‌نه‌ى وه‌ر تومه‌ت به‌تاڵ و قسه‌ى ناشرین و ناونیتگ  له‌بان ماڵپه‌ڕه‌یل ئه‌لكترۆنى و نیه‌ویرن ناو ته‌واو خوه‌یان له‌تى ئاشكرا بكه‌ن، ك جى داخه‌ نموونه‌یلیگ  له‌ى جووره‌ كه‌سه‌یله‌ له‌چینه‌یل كوومه‌ڵگا وجوود دیرن و ئیمه‌ى فه‌یلییش به‌ش خوه‌مان له‌وانه‌ دیریم.

دیاره‌ ك ئیمه‌ هه‌وه‌جه‌ وه‌ نه‌وه‌ى تازه‌یگ دیریم غه‌ڵه‌ته‌یل ئه‌وانه‌ له‌ڕوى سیاسى و رووشنهویرى و ئابوورى و كوومه‌ڵایه‌تیه‌و راسه‌و بكه‌ن، چوینكه‌ نه‌وه‌ى گوزه‌یشته‌ وه‌گووره‌ى ریڕه‌و خوه‌ى ئسپات ئه‌وه‌ كرد تواناى پیشكه‌شكردن چشتیگ زیاتر نه‌یرێد له‌وه‌ك پیشكه‌شى كردگه‌و تواناى وه‌رپرسیاریه‌تى نه‌یرێ له‌وه‌رانوه‌ر ئى چینه‌ له‌ى قوناغه‌، وه‌لى نه‌وه‌ى ئیسه‌ جویر ته‌ماشاكه‌ره‌و هس وه‌ دڵته‌نگى و ناڕه‌حه‌تى ئه‌كاو چشته‌یل بنه‌ڕه‌تى له‌ده‌سداگه‌ ك تویه‌نێد وه‌پى ئسپات وجوود خوه‌ى بكا وه‌ره‌و ده‌سكه‌فتن ئامانجه‌یل چاره‌نویسساز، ك ئومیده‌وارم ئى حوزنه‌ نه‌وده‌ كاره‌سات.

نه‌وه‌ى تازه‌ هه‌وه‌جه‌ وه‌ماریفه‌ت دیرن و هه‌وه‌جه‌ وه‌قه‌بولكردن وه‌رپرسیاریه‌تى و په‌ند وه‌رگرتن دیرن له‌ئه‌زموون كه‌سه‌یل وه‌رجه‌ خوه‌یان وه‌شیواز تازه‌یگ ك وه‌جووریگ خه‌م سه‌رنه‌كه‌فتن بخه‌نه‌ تاى له‌هویره‌وبردن و قه‌واره‌ى تازه‌یگ دروس بكه‌ن تا شانازى وه‌پیه‌و بكه‌یم. ئمجا ئایا تویه‌نیم وه‌ى خاتره‌ له‌ڕى هساو وكتاو له‌شوون وه‌رز دره‌وكردن نه‌ف و زه‌ره‌د خوه‌مان نیشان بیه‌یم؟، یه‌یش ئاره‌زوو ئاسانیگه‌و ئومیده‌واریم باێده‌دى.