ئایا ژیان فه‌یلیه‌یل گشتى كووچكردنه؟

شفق نيوز

بته‌گه‌ى به‌غدا وه‌گووش قه‌یریگ  له‌ خیزانه‌یل ته‌سفیركریاگ فه‌یلى ك رژیم دكتاتۆر وه‌زوڵم و زوور ده‌ریانكرد له‌عراق وه‌مه‌هانه‌ى ته‌به‌عیه‌ى ئیرانى ، ئه‌وه‌ بوى كه‌موته‌ر خوه‌شى و به‌خته‌وه‌رى گه‌ردیه‌ ئاسمان ئه‌و خیزانه‌یل ته‌سفیركریاگه‌و داوا له‌لیان كرد بانه‌وه‌ ئه‌را وڵات و مه‌ڵوه‌ن خوه‌یان ك له‌لیان زه‌فتكریا له‌لایه‌ن رژیم به‌عس دكتاتۆره‌وه‌ . وه‌لى ئه‌و خیزانه‌یله‌ وه‌ختى هاتنه‌وه‌ ئه‌را وڵات خوه‌یان تویش قه‌یرانه‌یل فره‌یگ  هاتن و گشت ئومید و ئاره‌زووه‌یلیان ناته‌دى و هساو ئه‌وه‌ كردوین ك گوایا هه‌ر وه‌ختیگ  رژیم سه‌دام نه‌مینیگ  و بانه‌وه‌ ئه‌را عراق تویه‌نن بچنه‌ ناو ماڵ و موڵكه‌یل خوه‌یان ك ئه‌وسا زه‌فت كریاویگ  ، وه‌لى كاره‌گه‌ چه‌واشه‌ بوى ئه‌و پیشبینى خیزانه‌یله‌ له‌یوا نه‌وى ك مه‌زه‌نه‌ى كردوین.

ئمجا یه‌كه‌مین ناخوه‌شى ك هاته‌ تویش ئه‌و خیزانه‌یله‌ ، ئه‌وه‌ بوى له‌وه‌خت هاتنه‌وه‌یان روڵه‌یلیان نه‌كردنه‌ دى ك كه‌فتوینه‌ گووشه‌ى زندانه‌یل رژیم وه‌رین و ناویان له‌ناو كوشیاگه‌یل دینه‌وه‌ ك خریاوینه‌ قه‌وره‌یل وه‌جه‌م ، چوینكه‌ جویر ئه‌وه‌ك ئاشكراو دیاره‌ ده‌سڵات عراقى له‌و وه‌خته‌ ده‌سكرده‌ جیاوه‌كردن جایه‌ڵ جوانه‌یل له‌ خیزانه‌یلیان و خسته‌یانه‌ زندان و خیزانه‌یلیانیش برد ئه‌را مه‌رزه‌یل ئیران و دویاخر ئاواره‌ى ده‌وڵه‌ت ئیران بوین و له‌ورا نیشته‌جى بوین ، یه‌یش له‌وه‌ختیگ  ك هه‌ر یه‌كیگ  له‌و خیزانه‌یل ته‌سفیركریاگه‌ له‌شوون خوه‌ى له‌عراق خاوه‌ن ماڵ و موڵك و دارایى فره‌یگ  بوین و گشت ئه‌و موڵكه‌یلیانه‌ له‌لایه‌ن رژیمه‌وه‌ زه‌فت كریاو دریا داروده‌سه‌یل رژیم.

گرفت دویه‌م ئه‌وه‌ بوى ، ك زه‌حمه‌ت بوى گشت ئه‌و ماڵ وموڵكه‌یل زه‌فتكریاگه‌ ئه‌ڕایان بایگه‌وه‌ ، چوینكه‌ كورده‌یل فه‌یلى زوورمیان بازرگان گه‌ورا بوین له‌ بازاڕ شۆرجه‌و كیفاح و شێخ عومه‌ر و ده‌ور گه‌ورایگ  داشتن له‌ ئابوورى عراق ، له‌وه‌ر ئه‌وه‌ ده‌سڵات به‌عس وه‌رین ده‌سكرده‌ به‌شه‌وكردن دارایى كورده‌یل فه‌یلى له‌بان پیاوه‌یل خوه‌ى و ئه‌وانه‌ك حزبى بوین و ده‌ور داشتن له‌ده‌سڵات ، ئمجا ئه‌وه‌انه‌یش زه‌فتى كردیان و فرووشتیانه‌ى ئه‌را كه‌سیگ  تر.

له‌گرفته‌یل تر ك هاته‌ نویش ئى خیزانه‌یل كورده‌ ك هاتیانه‌وه‌ ئه‌را ناو خاك خوه‌یان ، ئه‌ویش كیشه‌ى شوناسنامه‌ى عراقى بوى و گرفته‌یل فره‌یگ  ئه‌ڕایان دروس بووگ تا بتویه‌نن ئه‌و شوناسنامه‌ى عراقیه‌ بارنه‌ ده‌س ك وه‌خت خوه‌ى له‌لیان زه‌فت كریا له‌لایه‌ن رژیم دكتاتۆره‌وه‌ . له‌شوون ئه‌وه‌یش له‌وه‌خت جه‌نگ  تایفى له‌ناونى شیعه‌و سونى ، ئه‌وه‌ بوى جاریگ  تر كورده‌یل فه‌یلى له‌به‌عزه‌ شوونه‌یلیگ  دوباره‌ باركریان و ڕوى كردیانه‌ شوونه‌یل تر له‌وه‌ر سه‌ڵامه‌تى گیان خوه‌یان و مناڵیان ، چوینكه‌ ره‌سیه‌ ڕاده‌یگ  كوشتن له‌بان شوناسنامه‌ بوى و دى نه‌زانستن كى خاس و كى خراوه‌كاره‌ ، ك وه‌داخه‌وه‌ یه‌یش دیارده‌ى ناشرین و ناپه‌سه‌نیگ  بوى له‌ى عراقه‌ ڕویداو بویه‌ سه‌به‌ب ئه‌وه‌ك خیزانه‌یل فره‌یگ  ماڵه‌یل خوه‌یان بیلنه‌جى و ڕوى بكه‌ن شوونه‌یل تر و ده‌یشت وڵات.

له‌یرا پرسیم و ئویشیم : ئایا خیزانه‌یل كورد فه‌یلى كه‌ى قورتاریان بووگ كیشه‌و گرفته‌یله؟ چوینكه‌ ژیانیان وه‌ ته‌سفیر و ته‌سفیكردن بردنه‌ سه‌ر ، هه‌ر له‌وه‌ر ئه‌وه‌یش ئومیده‌واریم حكوومه‌ت عراق ده‌س یارمه‌تى ئه‌را ئى خیزانه‌یل كورد فه‌یلیه‌ دریژ بكاو دراسه‌ت ئه‌و واقعه‌ بكه‌ن ك كورده‌یل فه‌یلى له‌تى ژیه‌ن و ئه‌و ماڵ و موڵكه‌یلیانه‌ گشتى ئه‌ڕایان بارنه‌ دویاوه‌ ك وه‌زوور له‌لیان زه‌فت كریا.