نه‌ورووز له‌ سه‌رده‌م ئبراهیم په‌یغه‌مبه‌ر كویه‌نتره‌

شفق نيوز

 

ئمجا حه‌زره‌ت ئبراهیم له‌و ده‌رفه‌ته‌ خوه‌ى كرده‌ نه‌خوه‌ش و له‌ ماڵ مه‌نده‌و، دى وه‌ختیگیش نیمه‌ڕوو بوى و شار چووڵ و بیده‌نگ بوى، ئبراهیم ته‌وره‌گه‌ى هه‌ڵگرد و روى كرده‌ بتخانه‌گه‌و ده‌سكرده‌ شكانن بته‌ گه‌وراگه‌و گشت بته‌یل تر بویچگ .

ئیواره‌ مه‌ردم شار له‌وه‌ختیگ ك گله‌وخوه‌ن ئه‌را ماڵه‌یلیان، دوینن هه‌رچى بته‌ شكیاگه‌و گشتیانیش گومان له‌ ئبراهیم په‌یا كه‌ن و ده‌سگیرى ئه‌كه‌ن و وه‌فه‌رمان نه‌مروود ئه‌خریه‌یده‌ ناو ئاگر گه‌ورایگ .

وه‌لى دویاى چه‌ن رووژیگ له‌ گڕگرتن ئه‌و ئاگره‌، ئبراهیم وه‌ سه‌ڵامه‌ت له‌لى ده‌رچوودو بویه‌ موعجزه‌یگ له‌وه‌رچه‌و مه‌ردم، ئمجا له‌شوون چه‌ن سه‌ده‌یگ و له‌ شوون مردن ئبراهیم په‌یغه‌مبه‌ر دى ئه‌و رویداگه‌ هه‌ر ده‌ماوده‌م بویه‌ ئه‌فسانه‌و ئاگریش بویه‌ جه‌شن سه‌ره‌تاى وه‌هار و نه‌ورووزیش كریاو یاده‌گه‌یش بویه‌ سێ یاد:

یه‌كه‌م: نه‌رووز و وه‌هار سه‌ر ساڵ.

دویه‌م: ئاگركردنه‌وه‌ وه‌بوونه‌ى قورتاربوین ئبراهیم په‌یغه‌مبه‌ر له‌و ئاگره‌ ك نه‌سزانه‌ى.

سێیه‌م: شووڕش كاوه‌ له‌ دژ زوحاك ك له‌رووژ نه‌ورووز بویه‌، یه‌یش بیجگه‌ ئه‌وه‌گ ئبراهیم نه‌ورووز هه‌ڵوژان ئه‌را شكانن بته‌یل، ك وه‌و جووره‌ سێ جه‌شن و فیشتریش له‌ یه‌ك جه‌شن گرده‌و كریا.

دى وه‌ى جووریشه‌ ئه‌رامان ده‌ركه‌فید ك نه‌ورووز ئاگرپه‌رسى نیه‌، به‌ڵكوو له‌ زه‌ره‌ده‌شتییش كویه‌نتره‌و ئه‌وه‌نه‌یش گه‌ورا بویه‌ نه‌ك هه‌ر ئاریه‌یل، به‌ڵكوو فریه‌یگیش له‌ سامیه‌یلیش هاورده‌سه‌ جویله‌و ئه‌وانیش له‌ هه‌مان وه‌رز وه‌هار جه‌شن ساز كردنه‌و ته‌نانه‌ت ملله‌ته‌یل كلدانى و ئاشوورى و ئه‌كه‌د و بابلیش جه‌شن نه‌ورووز داشتنه‌و فریه‌یش وه‌ گه‌ورا ته‌ماشاى كردنه‌.

هاشم زوورئاوه‌ر

ج . أ