هه‌م دووس و هه‌م دوشمن!

شفق نيوز

ئمجا له‌وه‌ر ئه‌وه‌ك ئاده‌ميزاد هويچ وه‌ختيگ نه‌كه‌فێده‌ ناو كيشه‌و ئه‌نگه‌مه‌ی په‌شيمانی، په‌ند كورده‌واری ئويشيد(وه‌ل دووس و دوشمن خوه‌شڕه‌فتار به‌)، وه‌لی په‌نديگ تر هه‌س ك به‌ڵگه‌يگ حاشاهه‌ڵنه‌گره‌و ئويشيد(ئه‌گه‌ر که‌له بووده پووس...دوشمن نیه‌وده دووس)يه‌يش مانای ئه‌وه‌سه‌ ك (دووس هه‌ر دووسه‌و دوشمنيش هه‌ر دوشمنه‌)و ئيچنه‌ سفه‌ته‌يليگيش له‌ ئاده‌ميزاد وجوود ديريدو حاڵه‌تيگن ئاشكرا له‌لای مه‌ردم و بايه‌سه‌ ئاگادار بويم له‌گشت ره‌فتار و هه‌ڵسووكه‌فت دوشمنه‌يلمان.

له‌يرا خوازيم كه‌سه‌يل دوشمن بناسيم و بزانيم نيشانه‌و جووره‌يل دوشمنايه‌تی چوينه‌و هووكار په‌يابوين ئی حاڵه‌ته‌ چه‌س له‌ناو مه‌ردم؟ له‌ڕاسی ئه‌يه‌ پرسياريگه‌و هه‌وه‌جه‌ وه‌ شيه‌وكردن و جواو شيه‌وكرياگيگ ديريد.

من هه‌ميشه‌ باس كردمه‌و ئويشم(كه‌سيگ نه‌ دووس و نه‌ دوشمن خاستره‌ له‌ كه‌سيگ هه‌م دووس و هه‌م دوشمن!)، چوينكه‌ كه‌سيگ ئه‌گه‌ر نه‌ دووسد بوود نه‌يش دوشمن جوور هه‌ر ئاده‌ميزاديگ ئاساييه‌ ك ده‌خاڵه‌ت له‌ كاروبار و كرده‌وه‌يلد نه‌كا، وه‌لی كه‌سيگ ك هه‌م دووس و هه‌ميش دوشمنه‌ ئه‌وه‌سه‌ ك هه‌ميشه‌ بايه‌سه‌ وشيار بويد له‌لی و راز دڵد ئه‌رای باس نه‌كه‌يد و نه‌يليد له‌ كه‌م و كوڕيه‌يلد نه‌ف وه‌ربگريدو له‌ خوه‌شيه‌يلد هه‌ناسه‌ی حه‌ساده‌ت هه‌ڵكيشی.

ئی ئاده‌ميزاده‌ وه‌ختيگ له‌دايگ ئه‌دێ، ئی دونيا وه‌ شيواز جوانيگه‌و باوه‌ش ئه‌رای واز ئه‌كاو لاونيده‌ی، وه‌لی وه‌ گووره‌ی رووژگار خوه‌ی ئه‌دێده‌ی دروسكه‌ر ژيان ئه‌را خوه‌ی، دی له‌يرا وه‌ گووره‌ی ره‌فتار و هه‌ڵسووكه‌فتی نياز و مه‌رامه‌يلی له‌وه‌رانوه‌ر كه‌سه‌يل تر ده‌ركه‌فێدو سفه‌ته‌يلی ره‌نگه‌و ئه‌ياد و ئه‌تويه‌نيد وه‌گشت ئاسانييگ ئه‌و سفه‌ته‌يليه‌ بناسيد و ئاشنای كرده‌وه‌يلی بويدو بزانيد دووسه‌ يا دوشمن، چوينكه‌ دوشمن هه‌ر ئه‌وه‌ نيه‌ جه‌نگ يه‌قه‌گر وه‌لدا بكا، به‌ڵكوو دوشمن سه‌رسه‌خت ئه‌وه‌سه‌ له‌بانه‌و جووريگه‌و له‌ژيره‌و جووريگ تر، دوشمن ئه‌وه‌سه‌ له‌ڕويه‌و خه‌نيد وه‌لداو له‌دڵه‌و ئه‌زه‌رتمه‌ن مه‌رگده‌، وه‌ چه‌و وه‌لدا گيريد وه‌ دڵ نوڕد ئه‌كا، وه‌ شكه‌ستد شاده‌و وه‌ سه‌ركه‌فتند خه‌مين.

له‌ڕاسی له‌يوا كه‌سه‌يليگ هه‌ميشه‌ هانه‌ هه‌وڵ ئه‌وه‌ك زه‌فه‌ر خراو له‌ليد بارن و هه‌واڵ كه‌فتند بژنه‌فن له‌گشت بواريگه‌و، چوينكه‌ له‌يوا كه‌سه‌يليگ وژدانيان له‌كه‌داره‌و جی متمانه‌ نين دڵ وه‌پيان خوه‌ش بكه‌يدو هه‌ر جاريگيش نزيكده‌و بوون بيگومان له‌وه‌ر مه‌سه‌له‌ی نه‌فوه‌رگرتن و به‌رژه‌وه‌نديه‌، وه‌تايبه‌ت له‌ناونی قه‌وم وخيش ئی حاڵه‌ته‌يليه‌ فيشتر ره‌نگه‌و داگه‌ له‌ رووژگار ئمڕوومان، ئمجا دوينيد هه‌ميشه‌ تاريف مه‌ردم بيگانه‌ وه‌ خاسی ئه‌كه‌ن و خوه‌يان ئه‌كه‌نه‌ خزمه‌تچی و پاڵدويته‌كنيان، وه‌لی له‌وه‌رانوه‌ر قه‌وم وخيش خوه‌يان ئه‌كه‌نه‌ يه‌يگه‌ر و ره‌خنه‌گر و كورد وه‌ته‌نی(قسه‌ ئه‌يه‌نه‌ قوشا)و قينده‌و ئه‌يه‌ن تا به‌ڵكه‌م ت بايده‌و جواو و ئه‌وانيش قه‌سايقه‌س له‌لی بكه‌ن و بتويه‌نن وه‌ گفت به‌د و ناوه‌جی سه‌نگه‌سارد بكه‌ن.

مانای ئه‌وه‌سه‌ فريه‌جار زووان كاريگه‌ره‌و مه‌ردمانيگ هه‌ن قسه‌ی زووانيان له‌ تير و شمشير و چزه‌ی مار و كوڵه‌نجی به‌تره‌و چه‌ك دوشمنايه‌تيكردنيان زووانه‌و ئامانجيش له‌لی دروسكردن ئاشووگه‌ری و كاڵين خوسه‌و كينه‌ته‌.

ئمجا هويچ وه‌ختيگ ڕی وه‌ له‌يوا كه‌سه‌يليگ مه‌يه‌ وه‌و نه‌خوه‌شی كوشنده‌وه‌ دوشمنايه‌تی هويروڕاو نه‌خشه‌يل ژياند بكه‌ن و هويچ وه‌ختيگ ڕی وه‌پيان مه‌يه‌ ده‌خاڵه‌ت كاروبارد بكه‌ن و خواست و ئيراده‌ی ژه‌نگداريان بچه‌سپنن له‌بان مه‌رامه‌يل پاك و په‌سه‌ند.

ج . عه‌ليمری