كورده‌یل فه‌یلى له‌ناونی قه‌وڵه‌يل حكوومه‌ت و جيوه‌جی نه‌كردن ئيداره‌يلی

شفق نيوز

ده‌ركردیه‌ ئه‌را وه‌شوونكه‌فتن داواكاریه‌یل ئیدارى و قانوونییان و وه‌گه‌رمى پیشوازى كردیه‌ له‌ بڕیاره‌گه‌ى دادگاى باڵاى تاوان عیراقى ك تاوانه‌یل كووچوه‌پیكردن و كوشتن ده‌سه‌جه‌مى كورده‌یل فه‌یلى وه‌ جینۆساید شماره‌كرد، وه‌لى هیمان زوورمى ڕووڵه‌یل ئى چینه‌ ڕوى وه‌ڕوى هاوكارى نه‌كردن فره‌ له‌ فه‌رمانگه‌یل په‌یوه‌ندیدار و په‌یڕه‌ویكه‌ره‌یل پیرۆكراتیه‌ت بوینه‌ ك پشت وه‌و بڕیار و قانوونه‌یله‌ به‌سن ك ڕژیم وه‌رین ده‌ریانكردیه‌ و پیرۆكراتیه‌ت بویه‌سه‌ ئه‌و به‌ڕه‌ ك هه‌رچى ئومید و دڵخوه‌شى كورده‌یل فه‌یلیه‌ له‌بانى هوڕووش بوود ك چه‌وه‌ڕى كردیان كاره‌یلیان بخریه‌نه‌ ڕى و هه‌قه‌یل مادى و مه‌عنه‌وییان بسیننه‌وه‌.

هاووڵاتى كورد فه‌یلى نه‌جات مووسا له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌وه‌ ئاشكراكرد ك :" برایگ داشتم ناوى جلال مووسا موراد بوى و داموده‌زگایه‌یل ڕژیم وه‌رین، دویاى ئه‌وه‌گ ده‌سگیرى كردن، سه‌رنوقمى كردن و ئیمه‌یش وه‌ى جووره‌ تا ئیسه‌ هویچ خه‌وه‌ریگ له‌لى نه‌یریمن. ئیمه‌یش هاتیمنه‌ ده‌نگ  هاواره‌گه‌ى نورى مالكى ئه‌را هاتنه‌وه‌ ئه‌را نیشتمان ئه‌زیز، وه‌لى وه‌داخه‌وه‌ وه‌ختى چیمن ئه‌را لایه‌نه‌یل په‌یوه‌ندیدار تا هه‌قه‌یل خوریایمان بسینیمنه‌وه‌، هویچكام له‌ فه‌رمانگه‌یل و داموده‌زگایه‌یل حكوومى ئمڕوو گووش له‌لیمان نه‌ته‌كان، و هویچ كوومه‌ك و هاوكارییگ له‌ دادگایه‌یل تایبه‌ت وه‌ كه‌یسه‌گه‌مان وه‌رنه‌گرتیمن، چمانى ئیمه‌(تاوانباریمن)، داوا له‌ كاروه‌ده‌سه‌یل حكوومه‌ت كه‌یمن كه‌میگ كوومه‌كمان بكه‌ن به‌شكه‌م بڕیگ له‌ داواكاریه‌یل ڕه‌وامانجیوه‌جى بكه‌ن ئه‌را نموونه‌ (به‌یان وه‌فات) ئه‌را سه‌رنقومكریایه‌یلمان ده‌ربكه‌ن".

له‌لاى خوه‌یه‌و عامر عبدالكریم ئه‌ندام ده‌سته‌ى ئه‌مینه‌یل ده‌زگاى شه‌هیده‌یل له‌ په‌یوه‌ندیگ ته‌له‌فۆنى وه‌ل ماڵپه‌ڕ شه‌فه‌ق ئه‌وه‌ ئاشكراكرد ك :"له‌ باوه‌ت مسته‌مسه‌كات و دۆكیمه‌نته‌یل شه‌هیده‌یل (مقتبس حوكم)  یا هه‌ر به‌ڵگه‌نامه‌یگ تر سه‌رده‌م ڕژیم وه‌رینه‌، چوینكه‌ بیگومان ئه‌وان دۆكیمه‌نت له‌ سه‌رده‌م ڕژیم وه‌رین نه‌یرن، ته‌نیا چه‌ن كه‌سیگ نه‌ود ك دیرنه‌ى، و ئیمه‌یش چه‌ن لیست ناو بڕیگ له‌ شه‌هیده‌یل كورده‌یل فه‌یلى دیریمن، ك وه‌گووره‌ى ئه‌و لیسته‌یله‌ كتاب ده‌یمنه‌ كه‌سوكاره‌یلیان ئه‌را دادگایه‌یل بار كه‌سایه‌تى ك وه‌پى (حجه‌ وه‌فات) ده‌نه‌ پیان و له‌شوون ئه‌وه‌ دى ئه‌و شه‌هیده‌یله‌ له‌ (قه‌ید نفووس) وه‌زینى نشماریه‌ن، وه‌لى ئه‌و كه‌سه‌یله‌ ك ناویان له‌ لامان نیه‌، بڕیگ له‌ ڕیكخریایه‌یل كوومه‌ڵگاى مه‌ده‌نى و ڕیكخریایه‌یل كورده‌یل فه‌یلى ناو بڕیگتر دانه‌سه‌ پیمان، ك نیه‌تویه‌نیمن 100% پشت وه‌و ناوه‌یله‌ بووه‌سیمن چوینكه‌ بڕیگیان نادروسه‌، له‌وه‌ر ئه‌وه‌ داوا له‌و ڕیكخریایه‌یله‌ كردیمن وه‌رپرسیارى ئه‌و ناوه‌یله‌ هه‌ڵگرن، كه‌سوكار شه‌هیده‌یلیش بایه‌ته‌ سه‌ربیه‌نه‌ ده‌زگاى شه‌هیده‌یل و ئه‌گه‌ر ناو شه‌هیده‌یلیان دینه‌وه‌ بایه‌ته‌ بچن ئه‌را دادگایه‌یل تایبه‌تمه‌ند، وه‌لى وه‌داخ فره‌یگه‌و هویچ هاوكارییگ له‌لایه‌ن ئه‌و دادگایه‌یله‌و نیه‌.

عادل موراد به‌ڕێوه‌به‌ر ده‌سته‌ى كاروبار كورده‌یل فه‌یلى له‌ نویسینگه‌ى سه‌رۆك كۆمار له‌ په‌یوه‌ندییگ ته‌له‌فۆنى وه‌ل ماڵپه‌ڕ شه‌فه‌ق له‌ى باوه‌ته‌وه‌ ئویشى:" له‌ نویسینگه‌ى ده‌سته‌ى كاروبار كورده‌یل فه‌یلى چه‌ن قازى تایبه‌تمه‌ند هه‌س ئه‌را وه‌شوونكه‌فتن دۆسیه‌یل كورده‌یل فه‌یلى و هه‌رله‌یوا فایلیگ وازكه‌یمن ئه‌را مینه‌كردن چاره‌نویس هه‌زاران جایڵو جوان سه‌رنوقمكریاى كورد فه‌یلى و به‌رپرسیگ ئه‌راى دانریه‌ید، و هه‌رله‌یوا وه‌ى جووره‌ هه‌ر قازى یاهه‌ر پارێزه‌ریگ فایلیگ له‌ى شیوه‌ وه‌ربگرید خوه‌ى وه‌رپرسیاره‌ له‌بانى".