جه‌نگ سه‌رد له‌ ناونى به‌غداو ئه‌نكه‌ره‌!

شفق نيوز

په‌يوه‌نديه‌يل ناونى به‌غداو ئه‌نكه‌ره‌ خراو نه‌ويه‌. گه‌وراترين هێماى خراو بوين ئه‌ى په‌يوه‌نديه‌يله‌، له‌ توركيا خوه‌ى له‌ وه‌ پێشوازچين جيگر سه‌رۆك كۆمار(تارق هاشمى) دوينێده‌و ك له‌ عيراقيش قسيه‌يل توند سه‌رۆك وه‌زيره‌يل عيراق(نورى مالكى) ك له‌ ناوقسيه‌يل خوه‌ى توركيا وه‌ ده‌وڵه‌تێ(دوژمن) ناو ئه‌باد!.

له‌ روى ئيتيكت ديپلۆماسيه‌و، ناوهاوردن ده‌وڵه‌تێ وه‌(دوژمن) وه‌ى ماناسه‌ ك دى مه‌فه‌ر(ده‌رفه‌ت) گه‌نه‌و بوين باڵ خوه‌ى كێشاسه‌ بان مه‌فه‌ر ئاسايى په‌يوه‌نديل و له‌سه‌ر زاڵيشه‌و بويه‌و ئه‌گه‌ره‌يل خراويش وه‌ وازى مه‌ننه‌.

توركه‌يل خوه‌يانيش هه‌ست وه‌ يه‌ ئه‌كه‌ن ك سياسه‌ت ده‌يشت حكومه‌ته‌گه‌يان، پسا گێچه‌ڵه‌يل توركيا وه‌ل هاوسايل ئه‌ى وڵاته‌ زياده‌و ئه‌كا. رووژنامه‌ى(ئايدنلك) وه‌ يه‌ ئشاره‌ ئه‌كا ك توركيا بويسه‌ شوون گرده‌و بوين ئوپۆزيسيۆنه‌يل وڵاته‌يل هاوساى. يه‌ وه‌ى ماناسه‌ ك دى توركيا له‌ سياسه‌ت ريشه‌كێشان كێشه‌يل وه‌ل وڵاته‌يل هاوساى خوه‌ى په‌شيمانه‌و بويه‌و ئه‌ڵه‌وگردياسه‌ بان سياسه‌ته‌يل كوينه‌ى خوه‌ى و هێشتن په‌يوه‌‌نديه‌يل وه‌ شێوه‌ى گرژ و گه‌ن.

له‌ يه‌ك دويره‌وكه‌فتن به‌غداو ئه‌نكه‌ره‌ فێشتر له‌ دوياى سه‌رئه‌ڵدان قه‌يران له‌ سوريا هاته‌ دى و ئه‌ى قه‌يرانه‌ نه‌ ته‌نيا كارگه‌رى خراو نا له‌ بان په‌يوه‌نديه‌يل توركياوعيراق، به‌ڵكو توركياو ئيرانيش له‌يه‌ك زيوره‌و كرد. قه‌يرانه‌يل سوريا رۆڵێ ديارى له‌ خراوكردن په‌يوه‌نديه‌يل توركيا وه‌ل هاوسايلێ ديرێد.‌

له‌لێ قسيه‌كردن و ئه‌ڵسوبنيش وه‌رپرسه‌يل تورك چشتێ ئيچنه‌ نيشان ئه‌ياد ك ئه‌نكه‌ره‌ واز له‌ يه‌ هاورديه‌ ك مالكى وه‌ دوس خوه‌ى بزانێ و ها له‌ ته‌قلا ئه‌را فره‌و كردن په‌يوه‌نديه‌يلێ وه‌ل نه‌ياره‌يل مالكى!. په‌يامه‌گه‌ى به‌غدا له‌يه‌كه‌ودان خراو ئه‌راى ئه‌كا. به‌غدا ئيچنه‌ ئه‌دوينێد ك ئه‌نكه‌ره‌ له‌ى سياسه‌ته‌ ك ئه‌كا له‌ كارخسن مالكيه‌. ئه‌ى ره‌وشه‌ ئه‌نكه‌ره‌و به‌غدا هان ئه‌دا تا وه‌ دوياى هاوپه‌يمانێ بگه‌ردن و جه‌نگ سه‌رد له‌ دژ يه‌كتر ده‌س وه‌پێ بكه‌ن.

خراوترين ره‌نگه‌ودان له‌ى جه‌نگ سه‌رده‌ ك شايه‌د ململانى ئيران – توركيا بارێد ئه‌را ناو عيراق.

چوين ك خروا بوين په‌يوه‌نديه‌يل تاران و ئه‌نكه‌ره‌، مه‌فه‌رێ ئاسان ئه‌را مالكى دروس ئه‌كا تا تاران وه‌ره‌و لاى خوه‌ى بكێشێ. جيا له‌وه‌ ك تاران رازى ناده‌ێ ئه‌نكه‌ره‌ رۆڵ له‌ لاوردن و  هاوردن سه‌رۆك وه‌زيره‌يل عيراق داشتوود.

كريه‌يد خراو بوين په‌يوه‌نديه‌يل ناونى ئه‌نكه‌ره‌و به‌غدا، ره‌نگه‌دانێ خراو ئه‌را هه‌رێم داشتوودو بڕێ گێچه‌ڵيش دروس بكا. كه‌م كه‌م، كريه‌يد ئه‌ى ره‌وشه‌ له‌ سێ لاو ئه‌را هه‌رێم كوردستان خراو بوود.

يه‌كم) له‌ولايه‌و ك كريه‌يد ئه‌ى مه‌سه‌له‌ بووده‌ مايه‌ى قويله‌و بوين قه‌يران ناونى به‌غداو هه‌رێم وه‌ تايبه‌تى ك شايه‌د وه‌رداوم بوين بازرگانى و ئابووريه‌يل ناونى هه‌رێم و توركيا له‌ به‌غدا له‌يه‌كه‌ودان خراو ئه‌راى بكريه‌يد.

دويم) له‌ سويكه‌ ته‌ماشايگه‌و ك ململانى توركيا- ئيران له‌ ناو عيراق، ململانى سه‌خته‌و بوودو دايره‌ى مانۆره‌يل هه‌رێم تنگه‌وه‌ر بكاو شايه‌د كارگه‌ريش له‌ بان به‌رژه‌وه‌نديه‌يل و ئاسايش هه‌رێم داشتوود.

سێم) له‌ وه‌يشه‌سه‌ ك كريه‌يد ئه‌ى ره‌وشه‌ كارگه‌ر خراو له‌ بان يه‌كرێزى ناو ماڵ كورد داشتوودو بووده‌ مايه‌ى ده‌ركه‌فتن هه‌ڵوێست جياواز له‌ ناونى لايه‌نه‌يل سه‌ره‌كى له‌ هه‌رێم ك يه‌يشه‌ وه‌ دڵنياييه‌و كار ئه‌كا له‌ بان تواناى پياه‌ بوين سياسه‌ت يه‌كگرتێ هه‌م له‌ هه‌رێم وهه‌ميش له‌ به‌غدا.

ئه‌گه‌رچه‌ هێمان په‌يوه‌ندى ناونى هه‌رێم و ماڵكى گرژه‌و بويه‌، وه‌لى هه‌ر ته‌قلاى ئه‌را وه‌ كار هاوردن كارت ئه‌نكه‌ره‌ له‌ دژ به‌غداو په‌ياكردن هه‌ل خروا بوين په‌يوه‌نديه‌يل به‌غدا وه‌ل ئه‌نكه‌ره‌ وه‌ مه‌به‌س ته‌نگ ئه‌ڵچنين له‌ مالكى، كريه‌يد له‌ به‌غدا كاره‌ودانێ خراو داشتوودو بوود مايه‌ى هه‌ڕه‌شه‌ له‌ بان به‌رژه‌وه‌نديه‌يل وه‌ل بڕێ له‌ هاوسايل.

وه‌پيا پليان هه‌رێم له‌ جه‌نگ سه‌رد له‌ ناونى لايه‌نه‌يل نه‌يار، مه‌فه‌رێ گونجيا ئه‌را پاراستن به‌رژه‌وه‌نديه‌يل هه‌رێم وه‌ل خوه‌يان نايرێد وه‌ تايبه‌ت يه‌گ كه‌س نازانێ ئه‌ى جه‌نگ سه‌رده‌ هه‌تا كه‌ى وه‌ سه‌ردى بمێنێد!؟./ش

فه‌رید ئه‌سه‌سه‌رد‌