ئه‌و شاره‌ ك جاریگ بوو كوورده‌وارى له‌لى ئه‌یه‌ێ

شفق نيوز

دویرى(50)كم له‌شار كوت له‌ڕویوه‌ریگ فراوان و خاكه‌گه‌ى ئه‌را كشتوكاڵ نه‌خته‌و ریژه‌ى نیشته‌جیبویه‌یلى نزیكه‌ى سه‌د هه‌زار كه‌سه‌، سێكوت مه‌ردمه‌گه‌ى له‌كورد پێكهاتگه‌.

 

ئاو غه‌ڕاف وه‌ناوڕاس شار حه‌ى ڕه‌ى بوودو شاره‌گه‌ كردیه‌سه‌ دو به‌شه‌و"ناوه‌ند شاره‌گه‌و كه‌ڕاده‌"، ئى شاره‌ ناوداره‌ وه‌ باخه‌یل خورماو داره‌یل میوه‌، وه‌ل ئه‌وه‌یشا سه‌رچه‌وه‌یگ نه‌فتى له‌ناوچه‌ى كه‌ڕاده‌ى شاره‌گه‌ دیرێد بیجگه‌ جووه‌یل فره‌یگ ئاویارى ك كه‌فته‌سه‌ په‌ڕ شار و ده‌وروه‌رى.

 

شار حه‌ى بیجگه‌ كشتوكاڵى گه‌نم و جویه‌، له‌ڕوى كشتوكاڵى به‌رهه‌م زمسانه‌یش ده‌وڵه‌مه‌نه‌، ئمجا شوونه‌وار ده‌روازه‌ى واستیش له‌تى وجوود دیرێد بیجگه‌ شوونه‌واریگ تر سه‌ربازگاى سه‌رده‌م عوسمانى، وه‌ل ئه‌وه‌یشا حوسه‌ینیه‌و مزگفته‌یل فره‌یگیش له‌تى دروس كریاگه‌ له‌لایه‌ن كوورده‌یل فه‌یلى ك ساڵانه‌ عه‌زادارى له‌تیان ئه‌نجام دریه‌ێد له‌رووژه‌یل عاشوراى ئیمام حوسه‌ین(س.خ)و له‌وانه‌یش:

1- مزگفت عه‌باسى

2- مزگفت حه‌یده‌رى

3- مزگفت عه‌بدوڵڵاى ره‌زیع

 

هووزه‌یل فره‌یگ كورد له‌شاره‌گه‌ نیشته‌جیین و خاوه‌ن هه‌ڵویست نیشتمانى بوینه‌ دژ رژیمه‌یل سته‌مكار، ك له‌ساڵ 1956 به‌شدارى راپه‌ڕین كردنه‌ دژ رژیم ئه‌و سه‌رده‌مه‌ له‌وه‌ختیگ ك رژیم رمیاگ به‌عس یه‌كیگ له‌ فكرمه‌ن و سه‌رچه‌وه‌یل دینى دا له‌سێداره‌، ك ئه‌ویش محه‌مه‌د باقر سه‌در بوى، دویاى ئه‌وه‌یش له‌راپه‌رێن شه‌عبانیه‌ى ساڵ 1991 له‌ پاریزگاى كوت خاوه‌ن هه‌ڵویست ئازایانه‌ بوینه‌.

 

له‌شار حه‌ى شماره‌یگ له‌ مه‌زارگه‌و شوونه‌یل دینى موسڵمانه‌یل هه‌س، له‌وانه‌یش:

 

* مه‌زارگه‌ى سه‌عید كوڕ جه‌بر ئه‌سه‌دى ك دادوه‌ر بوى له‌ كوفه‌و له‌لایه‌ن حه‌جاج سه‌قه‌فى والى واست له‌سه‌رده‌م ئه‌مه‌وى كوشیا.

* مه‌زار عه‌قار له‌نه‌وه‌ى ئیمام مووساى كازم(س.خ).

* ئه‌بو زه‌ر له‌نه‌وه‌ى ئیمام مووسا(س.خ).

بیجگه‌ شوون و مه‌زارگه‌یل تر ك ده‌وروه‌ر شاره‌گه‌ وجوود دیرن و بوینه‌سه‌ شوون زیاره‌تگاى مه‌ردم ناوچه‌گه‌و له‌بوونه‌یل جیاجیا چنه‌ زیاره‌تیان.

 

تویه‌نیم بویشیم شار حه‌ى تام و بوو كوورده‌وارى هاپیه‌و، چوینكه‌ ساڵه‌یل دویر و دریژیگه‌ كورد له‌تى نیشته‌جیه‌و ئیسه‌یش وه‌ روح كوردایه‌تیه‌و هه‌ڵویست خوه‌یان نیشانده‌ن له‌وه‌رانوه‌ر مه‌سه‌له‌ى ڕه‌واى نه‌ته‌وه‌ى كورد.

 

ج. ا