ئدريس بارزانی ده‌نگ نه‌ته‌وه‌يگ

شفق نيوز

وه‌و شيوه‌ كاك ئدريس بويه‌ پشتگير و داينه‌مۆ شووڕش كوردستان. ئه‌و وتياد: ئيوه‌ خاوه‌ن په‌يام و كيشه‌ی گه‌ورايگين و بايه‌سه‌ وه‌ گه‌ورايی ئه‌و كيشه‌ گه‌ورا بوين، شووڕش جوور شه‌مه‌نده‌فه‌ر مێژووه‌و ئه‌ڕه‌سيده‌ ئامانجه‌يلی، ك خوه‌يشی په‌يامهه‌ڵگر شووڕش بوی و وه‌هه‌مان شيوه‌يش هيز و توانا دياده‌ مه‌ردم و خوةش مةردميش تواسياد و گيان وه‌خشين بڵاو كردياد و هه‌ميشه‌ له‌ مه‌يدان جه‌نگيش ئاماده‌ بوی، ئمجا ئه‌و شوونه‌يله‌ بان جه‌وه‌ڵه‌يل بوياتاد يا بان مێز گفتگوو، وه‌ل ئه‌وه‌يشا باوه‌ڕ وه‌ گوزه‌يشته‌ داشت و ئاينده‌يش خستياده‌ وه‌رچه‌و و پلان ئه‌را ئاينده‌ی رووشن كورد دانا.

ئدريس بارزانى جوور كه‌سايه‌تييگ كاريگه‌ريش هه‌ميشه‌ كاريگه‌ری له‌بان مه‌ردم داشت و له‌بان ريڕه‌و بارزانی نه‌مر كيشه‌ی كورد جيا له‌ كيشه‌ی ئنسانی نه‌زانست و كه‌سيگ مه‌ردم دووس و راسگوو بوی و سياسه‌تيش له‌بان بنه‌مای واقع كردياد.

ئه‌و يه‌ك كه‌س بوی ئه‌را گشت مه‌ردم و خه‌بات كردياد ئه‌را ئه‌وه‌ك گشن مه‌ردم له‌ژير يه‌ك به‌ره‌ گرده‌و بكاو بكاده‌يانه‌ يه‌ك هيز و ئه‌و كاريشه‌ ئه‌نجامدا، ك هه‌ر وه‌و خاتريشه‌ وه‌ ئه‌ندازيار به‌ره‌ی كوردستانی ناسرياو به‌ره‌ی كوردستانی جواو پيلان و ته‌ڵه‌كه‌بازی دوشمنه‌يل داوه‌و هه‌ر ئه‌و به‌ره‌يشه‌ بوی ك سه‌ركردايه‌تی راپه‌ڕين پيرووز ئادار ١٩٩١ كردياد ك دوياخر حكوومه‌ت هه‌رێم كوردستان له‌لی كه‌فته‌وه‌و بويه‌ ئوميد و ئاره‌زوو كورد له‌ هه‌ر چوار پارچه‌ی كوردستان.

ژيان و خه‌بات سياسی كاك ئدريس په‌يوه‌ندی وه‌ ژيان هه‌ر تاكيگ كورد نيشتمانپه‌ره‌وه‌ر ديريد و به‌شيگ دانه‌وڕياگه‌ ئه‌وسای كورده‌، هه‌ر له‌وه‌ر ئه‌وه‌يش ژيان ئه‌و ئاده‌ميزاده‌ كويه‌يگ سه‌بردار و سامدار بويه‌ وه‌رانوه‌ر دوشمنه‌يل كورد، ك دويای مه‌رگيش بويه‌ ريڕه‌ويگ وه‌رده‌وام به‌رهه‌مدار نه‌ته‌وه‌يی.

وه‌ڕاسی كاك ئدريس ده‌نگيگ بوی ئه‌را بيده‌نگه‌يل، جوور باوگ و براو پشت وپه‌نای فه‌قير و ليقه‌ومياگه‌يل بوی و هه‌ر كيشه‌يگيش بوياتاد خوه‌ی كردياده‌ خاوه‌نی و هه‌ردوگ لايه‌ن كيشه‌گه‌يش وه‌ بڕيار كاك ئدريس رازی بويان، ك وه‌و خاتريشه‌ هه‌ميشه‌ ماڵ و باره‌گای ئه‌را گشت كه‌سيگ واز بوی، ئشق ناونی مه‌ردم و كاك ئدريس بی مه‌رز بوی، چوينكه‌ كه‌سيگ كه‌س دووس بوی و ئيمه‌يش ك باس ئی ئاده‌ميزاد شووڕشكاره‌ ئه‌كه‌يم بايه‌سه‌ شيواز خه‌باته‌گه‌ی په‌يڕه‌و بكه‌يم و ته‌نيا باسكردنی به‌س نيه‌، چوينكه‌ ئمڕوو ئه‌رك بان شانمان قورستره‌، وه‌تايبه‌ت ئه‌و ده‌سدريژيه‌ ك داعش ئه‌نجاميدا ئه‌را بان مه‌ردم كوردستان هه‌وه‌جه‌ وه‌ يه‌كده‌نگی كورد ديريد له‌ سه‌رانسه‌ر دونيا، ئه‌را ئه‌وه‌ك جاريگتر هويچ بيگانه‌يگ جورئه‌ت ئه‌وه‌ نه‌كا ده‌سدريژی بكاده‌ بان خاك كوردستان.

كاك ئدريس توانی فريه‌يگ داشت له‌ كار، وه‌ ده‌گمه‌ن له‌يوا ئاده‌ميزاديگ له‌ مێژوو كورد و جه‌هان هه‌ڵكه‌فتگه‌، هه‌رچه‌نی ك وه‌ لاشه‌ له‌ناومان نيه‌، وه‌لی كرده‌وه‌يلی سه‌رمه‌شق خه‌بات كورده‌و بايه‌سه‌ جوور ئه‌وه‌ك چوين په‌ند و ده‌رسه‌يلی رينيشانده‌ر خه‌بات دويه‌كه‌ بوی، وه‌و جووره‌ رينيشانده‌ر ئمڕوويش بوود و نه‌ف له‌ ئه‌زموون خه‌باتی وه‌ربگريم.

له‌ هه‌ر شوونيگ كاك ئدريس وجوود بياشتاد ئوميد و ئه‌زره‌ت له‌ورا بوی، هه‌ميشه‌ ئازادانه‌ هويره‌و كردياد و زانستياد ئه‌را ره‌سين وه‌ ئازادی هه‌وه‌جه‌ وه‌ قوربانی ئه‌كريه‌يد و هه‌ميشه‌ ئه‌ركه‌يل قورس گرتياده‌ مل و باوه‌ڕيش وه‌ زانست و زانيارييش داشت، چوينكه‌ زانستياد خه‌بات ملله‌ته‌يل وه‌ زانست سه‌ركه‌فيد.

كاك ئدريس له‌ ده‌روينه‌و ئازاد و پاك بوی، بويه‌ نموونه‌ی بی وينه‌يگ له‌چه‌و مه‌ردم، هه‌ر وه‌و خاتريشه‌ بايه‌سه‌ له‌ ئاينده‌يش ژيان و خه‌بات كاك ئدريس ئه‌را نه‌وه‌يل تازه‌ باس بكريه‌يد، چوينكه‌ ده‌ريايگ په‌ند و عبره‌ت ئه‌رامان هيشته‌جی، ك بايه‌سه‌ له‌بانی ريڕه‌وی بچيم.

سه‌عيد مه‌موزينی

ج . أ