ترۆر ئابووری

شفق نيوز

ئه‌را نمنوونه‌: ئمڕوو چه‌نه‌ها شيوه‌ی تر ترۆر وه‌كار ئه‌يه‌رن جوور ترۆر سياسی يا ترۆر ئايينی يا ترۆر بنيادگه‌ری ك له‌شوون ١١ی سپته‌مبه‌ر ٢٠٠١ فيشتر وه‌كار ئه‌يه‌رنه‌ی، هه‌ڵبه‌ته‌ له‌بان ئاست تاك و كوومه‌ڵيش جووره‌يل تر له‌ شيواز وه‌كاربردن ناو ترۆر وجوود ديريد جوور ترۆر ده‌روينی و فه‌رهه‌نگی ..هتد.

يه‌كيگ له‌ جووره‌يل فريه‌ مه‌ترسيدار ترۆر له‌بان ئاست ناوخوه‌يی ملله‌ته‌يل و له‌بان ئاست ناوده‌ڵه‌تی، ئه‌ويش ترۆر ئابووريه‌، وه‌لی جی داخه‌ ترۆر ئابووری له‌وه‌ر بڕيگ هووكار ك له‌يرا بوار نيه‌ باس بكريه‌يد نه‌كرياسه‌ كيشه‌يگ گه‌ورايگ جه‌هانی و باس ناكريه‌يد جوور ترۆر سياسی.

وه‌لی له‌ڕاسی كه‌م يا فريه‌ له‌گشت دونيا ئه‌و چشته‌ هه‌س ك ئاده‌ميزاده‌يل وه‌ جووره‌ها ريه‌يل جياواز تويش ترۆر ئابووری نه‌ون؟ ئايا كام وڵات هه‌س وه‌تايبه‌ت له‌ جه‌هان سێيه‌م ك نه‌ويده‌ قوربانی ترۆر ئابووری له‌لايه‌ن مافيايه‌يل ئابووری جه‌هان و سه‌روه‌ت و سامان و كه‌رامه‌ت مللی و نيشتمان پاشيل نه‌كريه‌يد؟

له‌ وڵاته‌يل ئسلامی و عه‌ره‌بی چه‌نه‌ها ده‌يه‌س ك ترۆر ئابووری وه‌ دڕنده‌ترين شيوه‌ هاووڵاتيه‌يل ترۆر ئه‌كاو كه‌سيش باسی ناكا، وه‌لی وه‌ختی كه‌سيگ له‌لايه‌ن ديكتاتۆريگ جه‌هان سێيه‌مه‌و بدريه‌يد له‌سێداره‌ گشت دونيا ئه‌يه‌نه‌ ده‌نگ، هه‌رڵبه‌ته‌ يه‌يش كاريگ ئنسانيه‌و مايه‌ی ده‌سخوه‌شيه‌، وه‌لی هه‌ر بايه‌سه‌ ترۆر ئابوورييش وه‌ فه‌رمی بناسريه‌يد.

ئايا چ جياوازييگ هه‌س له‌ناونی ترۆر سياسی ك رژم مه‌ردم ئه‌كوشيد يا نرخ ئنسانی له‌ده‌س ئه‌ياد وه‌ بوونه‌ی فشار ئابووريه‌و ك رژيمه‌يل له‌لی وه‌رپرسن؟ ئمجا يه‌كه‌م گام ئه‌را قورتاربوين له‌ ترۆر ئابووری، ئه‌ويش دامه‌زرانن سيستميگ دادپه‌روه‌رانه‌س ك بتويه‌نيد هه‌وه‌جه‌يل سه‌ره‌كی ژيان ئه‌را گشت مه‌ردم ده‌سه‌وه‌ر بكا، دی هه‌ر رژيم و حكوومه‌تيگ نه‌توه‌ينيد ئه‌يه‌ بكا، ئه‌وه‌ بيگومان هويچ شه‌رعيه‌تيگ نيشتمانی و مه‌ردمی و ئه‌خلاقی و ئنسانی نه‌يريد تا وه‌رده‌وام بوود.

د. محه‌مه‌د ئه‌مين

ج . أ