شوانكاره ‌و ناوداره‌يلی

شفق نيوز

ئمجا سه‌ركرده‌یل تیره‌ى ئسماعیلى خوه‌یان وه‌ نه‌وه‌ی"سپه‌هبود"ه‌یل زانستیان ك له ‌بنه‌ڕه‌تيان ئه‌چێده‌و ئه‌را بان مه‌نووچه‌هر نه‌وه‌ى فه‌ره‌یدون، موعین نه‌زه‌رى مێژوونويسيش ئويشيد: پاشایه‌یل ئێڵ شوانكاره‌ دو ده‌سه‌ بوینه‌، ده‌سه‌يگيان وه‌رجه‌ په‌لاماره‌يل مه‌غوول خاوه‌ن ده‌سڵات بوینه‌و ده‌سه‌يگيانيش دویاى په‌لاماره‌يل مه‌غوول ده‌سڵات داشتنه‌.

ئه‌گه‌ريش ته‌ماشای مێژوو شوانكاره‌ بكه‌يم، دوينيم ك ئه‌و ئه‌دیب و زانایه‌یله‌ ك خه‌ڵك شار و شاروچكه‌ و ئاوایه‌یل سه‌ر وه‌شوانكاره‌ن فريه‌ن و ده‌س باڵايگ له‌ بواره‌يل جياجيا داشتنه‌ ك له‌يرا بڕيگ له‌ليان ئاشكرا ئه‌كه‌يم:

*عه‌زودودین شوانكاره‌یى: مه‌لایگ گه‌وراو زانایگ وه‌ناوبانگ بوى، سوڵتان محه‌مه‌د جونه‌ى پادشاى هندستان ك پایته‌خته‌گه‌ى ده‌لهى بوى ناوبانگ ئى زانا ژنه‌فتوید و كلكرده‌ شوونى و 10 هه‌زار دیناریش ئه‌راى كلكرده‌ شوانكاره‌، وه‌لى عه‌زودودین نه‌چى و ئه‌و پويليشه‌ نه‌تواس.

*محه‌مه‌د عه‌لى شوانكاره‌: یه‌كیگ بوى له‌ ئه‌ديب وشاعره‌یل نزيك له‌ خواجه‌ غه‌یاسه‌دین محه‌مه‌د وه‌زیر سوڵتان ئه‌بوو سه‌عید به‌هادرخان موغوول وكتاوه‌یل فريه‌یگيش داناگه‌و له‌وانه‌يشكتاو"مه‌جمه‌ع ئه‌لئه‌نساب"ك باس له‌ مێژوو شوانكاره‌ ئه‌كا.

*عومه‌ر شوانكاره‌: یه‌كیگ بوى له‌ ئه‌دیبه‌یل پايه‌به‌رز سه‌رده‌م خوه‌ى و چه‌ن كتاویگیش داناگه‌.

*شێخ شه‌مسه‌دین محه‌مه‌د كوڕ فه‌خره‌دین ئه‌بوبه‌كر كوڕ كه‌ماڵ شوانكاره‌یى.

*محه‌مه‌د كوڕ مه‌حموود كوڕ محه‌مه‌د شوانكاره‌یى.

*خواجه‌ سه‌یفه‌دین مزه‌فه‌ر شوانكاره‌یى: یه‌كیگه‌ له‌ گه‌ورایه‌یل شوانكاره‌و ماوه‌یگيش له‌ هیرات بوى و سوڵتان حسێن میرزا كرده‌ى وه‌زیر خوه‌ى، وه‌لى دویاى ماوه‌یگ له‌ پۆسته‌گه‌ی ده‌ریكرد و خسته‌ى زيندان و ده‌ستوور دا بكوشنه‌ى.

*خواجه‌ غه‌یاسه‌دین مه‌نسوور شوانكاره‌: يه‌يش براى خواجه‌ سه‌یفه‌دین بوى و ماوه‌یگ له‌ ناوچه‌ی"مه‌رو" وه‌زیر ئه‌بولموحسن بوى و ماوه‌يگ كه‌فته‌ وه‌ر سزاو ماوه‌یگیش زيندانى كرياو دوياخريش روى كرده‌ هیرات و له‌لايه‌ن سوڵتان حسێنه‌و كريا وه‌زیر، وه‌لى دویاى ساڵیگ ماڵئاوايی له‌ دونيا كرد و مرد.

مه‌لا جه‌ميل رۆژبه‌يانی

ج . أ