وه‌يه‌كه‌وژيان بی ئاره‌زوومه‌ندانه‌..!

شفق نيوز

 

وه‌لی جی داخه‌ فريه‌جار بارو دووخه‌گه‌ وه‌ كوده‌تا كووتايی وه‌پی هاتياد، ك يه‌يش هويچ له‌ مه‌سه‌له‌گه‌ ئاڵشت ناكا، ته‌نيا ئه‌وه‌ نه‌ود ك ئی پيكهاته‌ له‌ ده‌سڵات هاتياده‌ خوار و پيكهاته‌يگ تر شوونی گرتياد، ك وه‌ هه‌مان به‌رنامه‌و نه‌خش و پلان پيكهاته‌گه‌ی تر كار كردياد.

ئمجا هه‌ر قوربانييگ درياويد دوياخر ئه‌و قوربانيه‌ بويه‌سه‌ به‌رهه‌م لايه‌نيگ و كاره‌ساتيگ ئه‌را لايه‌نه‌يل تر. وه‌ل ئه‌وه‌يشا هه‌ميشه‌ هويچ لايه‌نيگ دگان وه‌ ئه‌و لايه‌نه‌گه‌ نه‌ناگه‌، به‌ڵكوو گشت لايه‌نيگ له‌ هه‌وڵ ئه‌وه‌ بويه‌ ك چوين هه‌وڵه‌يل خوه‌ی تونتر بكا وه‌ل كاركردن ئه‌را يه‌كپارچه‌يی وڵات، چوينكه‌ ئه‌گه‌ر وڵات يه‌ك پارچه‌ بدێ، ئه‌وه‌ حوكم له‌بان گشتی ئه‌كاو ده‌س ئه‌گريده‌ بان سامان و دارايی وڵات، وه‌ چه‌وايشه‌وه‌ ئه‌گه‌ر عراق به‌شبشه‌و بدێ، ئه‌وه‌ ته‌نيا حوكم له‌ به‌شه‌گه‌ی خوه‌ی ئه‌كا.

هه‌ر وه‌و خاتريشه‌ فريه‌ وشه‌ی وه‌يه‌كه‌وژيان و يه‌كپارچه‌يی خاك نيشتمان ژنه‌فتيايم له‌ ده‌م وه‌رپرسه‌يل ئی وڵاته‌، ك فريه‌ وه‌ جوانی ئاواز ئه‌رای ژه‌نيان، دی نازانيم وه‌يه‌كه‌وژيان چ مانايگی مه‌ندگه‌ دويای ئه‌وه‌وك چشتيگ نه‌مه‌ند له‌وه‌رانوه‌ر يه‌كتری ئه‌نجامی نه‌يه‌ن جوور كوشتن و له‌ناوبردن و تاڵانكردن...هتد.

ئه‌گه‌ر ئيمه‌ داوای وه‌يه‌كه‌وژيان و يه‌كپارچه‌يی بكه‌يم، قه‌ور ئه‌را ئه‌و كه‌سه‌ هه‌ڵناكه‌نيم ك ئه‌خوازيم وه‌ليا بژيه‌يم وه‌يه‌كه‌و، له‌يرا بايه‌سه‌ ئه‌وه‌ بزانيم ك مه‌سه‌له‌ی وه‌يه‌كه‌وژيان وه‌ زوور نادێ و ناكريه‌يد، چوينكه‌ زه‌حمه‌ته‌ كه‌سانيگ يه‌كتری ره‌ته‌و بكه‌ن و دژايه‌تی يه‌كتری بكه‌ن له‌ وڵاتيگ ك داوای وه‌يه‌كه‌وژيان له‌لی بكه‌يد.

عه‌بدولغه‌فار حاجی ئه‌ردوێلی

ج . أ